ދެކުނު އެމެރިކާ ބައްރުގެ ފީފާ ވޯލްޑް ކަޕް ކޮލިފައިންގައި އެންމެ ފަހުގެ ޗެމްޕިއަން އާޖެންޓީނާއާ ދެކޮޅަށް ވެނެޒުއޭލާ ކުޅުނު މެޗު 1-1 ގެ ނަތީޖާއަކުން އެއްވަރުވެއްޖެއެވެ.
ކޮޕާ އެމެރިކާ ފުޓްބޯޅަ މުބާރާތުގެ ފައިނަލުގައި ކެޕްޓަން ލިއޮނެލް މެސީއަށް ލިބުނު އަނިޔާއަށްފަހު އޭނާ ގައުމީ ޓީމަށް ކުޅުނު ފުރަތަމަ މެޗުގެ 13 ވަނަ މިނިޓުގައި އާޖެންޓީނާގެ ނިކޮލަސް އޮޓަމެންޑީ ވަނީ ލަނޑެއް ކާމިޔާބުކޮށްދީ އެ ޓީމަށް ކުރި ހޯދަދީފަ އެވެ.
އާޖެންޓީނާއިން ގިނައިރު ބޯޅަ ހިފަހައްޓައިގެން ކުޅެފައިވާ މި މެޗުގައި އެ ޓީމުން ވަނީ ވެނެޒުއޭލާގެ ގޯލަށް ނުރައްކާތެރި ގިނަ ހަމަލަތަކެއް ފޮނުވާލާފަ އެވެ. މެޗުގެ ފުރަތަމަ ހާފްގައި އިތުރު ގޯލެއް ނުފެނުނު ނަމަވެސް ވެނެޒުއޭލާއިން ވެސް ވަނީ ލަނޑު ޖަހާނެ ރަގަޅު ފުރުސަތުތަކެއް ހޯދާފައެވެ.
އާޖެންޓީނާގެ އެއްވަނަ ކީޕަރު މާޓިނޭޒް ސަސްޕެންޑް ކޮށްފައިވާތީ މި މެޗުގައި ގޯލު ބަލަހައްޓާފައިވަނީ ޖެރޮނީމޯ ރުލީ އެވެ. މި މެޗުގެ ނަތީޖާ ވެނެޒުއޭލާއިން އެއްވަރުކޮށްފައިވަނީ މެޗުގެ 65 ވަނަ މިނިޓުގައި ސަލޮމޮން ރޮންޑޮން ކާމިޔާބުކޮށްދިން ލަނޑުންނެވެ.
މި މެޗު އެއްވަރުވެފައިވާއިރު ދެކުނު އެމެރިކާގެ ކޮލިފައިންގެ އެއްވަނަ މަގާމް ހޯދާފައިވަނީ ކުޅުނު 9 މެޗުން 19 ޕޮއިންޓާއެކު އާޖެންޓީނާ އެވެ. ދެވަނައިގައި އޮތް ކޮލަމްބިއާއަށް 9 މެޗުން 16 ޕޮއިންޓް ލިބިފައިވާއިރު ވެނެޒުއޭލާއަށް 9 މެޗުން ލިބިފައިވާ 11 ޕޮއިންޓާއެކު އޮތީ 7 ވަނައިގަ އެވެ.