މިފްކޯގެ "ރަސް އައިން" ބްރޭންޑުގެ ތަކެތި އުފެއްދުމަށް އާންމުންނަށް ހުޅުވާލައިފި

މޯލްޑިވްސް އިންޑަސްޓްރިއަލް ފިޝަރީޒް ކޮންޕެނީ ލިމިޑެޓް، މިފްކޯގެ ސީއެސްއާރު ނުވަތަ އިޖުތިމަޢީ ޒިންމާގެ ދަށުން "ރަސް އައިން" ބްރޭންޑްގެ ބާވަތްތައް އުފެއްދުމަށް ޢާންމުންނަށް ހުޅުވާލައިފިއެވެ. މިފްކޯއިން ވިދާޅުވީ، މީގެ މައިގަނޑު މަގްސަދަކީ މަހުގެ ބާވަތްތައް އުފައްދާ ކުދި ވިޔަފާރިތަކަށް އިތުރު ފުރުސަތުތައް ހޯދައިދިނުމާއި، އެ ފަރާތްތަކުގެ ވިޔަފާރި ފުޅާކުރުމަށް އެހީތެރިވެދިނުންކަމަށެވެ.

މިފްކޯގެ "ރަސްއައިން" އުފެއްދުންތަކުގެ ތެރޭގައި ހިމެނެނީ މަހުން އުފައްދާ، އަގު އެއްކޮށްފައިވާ ދިވެހި ކާނާގެ ބާވަތްތަކެވެ. އޭގެ ތެރޭގައި އަތުޖެހި، ހަނޑުލު ގުޅަ، ކުޅި ކާޖާ އަދި ތެލުލި ބަޖިޔާ ފަދަ ބާވަތްތައް ހިމެނެއެވެ. މީގެ އިތުރުންވެސް މިފްކޯގެ ރޯ މެޓީރިއަލް ބޭނުންކޮށްގެން ގިނަ ދުވަހަށް ތާޒާކަންމަތީ ބެހެއްޓޭނެ އެފަދަ ކާބޯތަކެތި ތައްޔާރު ކުރެވޭނެކަމަށް އެކުންފުނިން ވިދާޅުވިއެވެ.

މިފްކޯގެ ބިޒްނަސް ޑިވެލޮޕްމަންޓް ޖެނެރަލް މެނޭޖަރު އައިމިނަތު ސަނިއްޔާ ޝަރީފް ވިދާޅުވީ ކުރިން މި ޕްރޮގްރާމް މެދު ކަނޑާލަން ޖެހުނީ ކޯވިޑް-19 ގެ ހާލަތާ ގުޅިގެންކަމަށެވެ. މިފަހަރުގެ އަމާޒަކީ މުޅި ރާއްޖެއަށް ހުޅުވާލައިގެން އެކި އަތޮޅުތަކުންވެސް މި ޕްރޮގްރާމުގައި ބައިވެރިކުރުވުމަށް ބާރުއެޅުންކަމަށް އޭނާ ވިދާޅުވިއެވެ.

"މި މަސައްކަތް އަޅުގަނޑުމެން އަލުން މި ފަށަނީ. އިރާދަކުރެއްވިއްޔާ މި ޕްރޮގްރާމް އިތުރަށް ފުޅާކޮށް، ރަނގަޅު ފެންވަރެއްގެ ޕްރޮޑަކްޓް ރޭންޖަކަށް މިކަން ގެންދާނަން. މިސާލަކަށް ހޮވޭ ބޭފުޅުންނަށް އަޅުގަނޑުމެން ހެޔޮއަގެއްގައި ކުނޑިމަސް ފޯރުކޮށްދޭނަން. އެގޮތަށް ވަރަށް ގިނަ ބާވަތްތަކުން ރަނގަޅު އަގެއް ދެވޭނެ." ސަނިއްޔާ ވިދާޅުވިއެވެ.

ސަނިއްޔާ ވިދާޅުވިގޮތުގައި މި މަސައްކަތަށް ހޮވޭ ފަރާތްތަކުން އާންމުންގެ މެދުގައި އިތުބާރު ހޯދާފައިވާ މިފްކޯގެ ރޯ މެޓީރިއަލް ބޭނުންކޮށްގެން ގިނަ ބާވަތްތައް އުފެއްދުމަށް ބާރުއަޅާނެކަމަށެވެ. އަދި އައު ގިނަ ބާވަތްތައް ބާޒާރަށް ނެރުމަކީ އެންމެ ބޮޑު އަމާޒުކަން ސަނިއްޔާ ފާހަގަކުރެއްވިއެވެ.

މިކަމަށް ޝައުގުވެރިވާ ފަރާތްތަކުން މިފްކޯއަށް ޕްރޮޕޯސަލް ހުށަހެޅަންޖެހޭއިރު، ގޭގައި ކާބޯތަކެތި ތައްޔާރުކުރުމަށް މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން ދޫކޮށްފައިވާ ހުއްދައިގެ ކޯޑު މިފްކޯއަށް ހުށަހަޅަންޖެހެއެވެ. އަދި ސަޕްލައި ކޮށްދެވިދާނެ ބާވަތްތަކުގެ ނަމާއި އޭގައި އެކުލެވޭ ބައިތަކުގެ ތަފްސީލު ހިމަނަންޖެހެއެވެ.

މިފްކޯއިން ވިދާޅުވީ، ޕްރޮޕޯސަލް ހުށަހަޅާ ފަރާތުގެ ނަމާއި އެޑްރެސް އަދި ގުޅޭނެ ފޯނު ނަންބަރުގެ އިތުރުން ކޮންމެ ބާވަތަކުން 500 ގްރާމްގެ ސާމްޕަލް ހުށަހަޅަން ޖެހޭނެކަމަށެވެ. އަދި ހުށަހެޅޭ ޕްރޮޕޯސަލްތަކުގެ ތެރެއިން ހޮވޭ ފަރާތްތަކަށް އިތުރު އެހީތެރިކަން ފޯރުކޮށްދޭނެކަމަށް މިފްކޯއިން ވިދާޅުވެއެވެ.

ޕްރޮޕޯސަލްތައް ހުށަހެޅުމުގެ ސުންގަޑިއަކީ މި މަހުގެ 7 ވަނަ ދުވަހުގެ މެންދުރު ފަހު 14:00 އެވެ.