ގިނަ ދުވަސްތަކަކަށް ފަހު ގައުމީ ވޮލީބޯޅަ ޓީމާ ހަވާލުވެގެން ހުރި ރާއްޖޭގެ ވޮލީބޯޅައިގެ އެންމެ ތަޖުރިބާކާރު ކޯޗު މުޙައްމަދު ޝަރަފަށް އޮތް އެންމެ ބޮޑު ޓާގެޓަކީ 2027 ވަނަ އަހަރުގެ އިންޑިއަން އޯޝަން އައިލެންޑް ގޭމްސް (އައިއޯއައިޖީ) ކަމަށް ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އިން ބުނެފިއެވެ.
2014 ވަނަ އަހަރުގެ އޭޝިއަން ގޭމްސްއަށް ފަހު ގައުމީ ޓީމުން ރިޓަޔާކޮށް، ކުލަބު ވޮލީގައި ގިނަ ޓީމުތަކަށް އިރުޝާދުދީ ޝަރަފް ވަނީ އެޓީމުތަކަށް ކާމިޔާބީތައް ހޯދައިދީފައެވެ. އަލުން ގައުމީ ޓީމާއި ޝަރަފް ހަވާލުވެފައި ވަނީ ވީއޭއެމް އިން ގައުމީ ޓީމުތަކަށް ކޯޗުން ހޯދަން ކުރި އިއުލާންގެ ތެރެއިން އެކަމަށް ކުރިމަތިލައިގެންނެވެ. ވީއޭއެމްގެ ރައީސް މުޙައްމަދު ލަތީފް ވިދާޅުވީ ކާވާ މެންސް ވޮލީބޯޅަ ޗެލެންޖް ކަޕަށް ގައުމީ ޓީމު، ޝަރަފާއި ހަވާލުކޮށްފައިވީ ނަމަވެސް މައިގަނޑު އަމާޒު އޮތީ އައިއޯއައިޖީގެ ރަން މެޑެއްޔަށް ކަމަށާއި ޝަރަފާއި ހަވާލުކުރެވިފައިވާ މަސައްކަތަކީ އެއީ ކަމަށެވެ.
ކުރިއަށް އޮތް މުބާރާތަށްވެސް ގޮންޖެހުން ބޮޑު
ގިނަ އަހަރުތަކަށް ފަހު ގައުމީ ސީނިއާ ޓީމުގެ ކޯޗުކަމުގެ މަގާމާ ޝަރަފް ހަވާލުވިއިރު، އޭނާ ފުރަތަމަ ބޭނުންވީ 20 އަހަރުންދަށުގެ ގައުމީ ފިރިހެން ޓީމަށް އިރުޝާދުދިނުމަށެވެ. އެހެން ނަމަވެސް އޭނާގެ ވިސްނުން ބަދަލުކުރީ ވީއޭއެމްގެ މެނޭޖްމަންޓްގެ އެދުމުގެ މަތިން، ދިވެހި ވޮލީއަށް އެއްމެ ރަނގަޅުގޮތަކީ އެގޮތް ކަމަށް ގަބޫލުކުރެވޭތީއެވެ. މި މަހުގެ 18 އިން 24 އަށް ކުރިޔަށްދާ ކާވާ މެންސް ވޮލީބޯޅަ ޗެމްޕިއަންޝިޕަށް ގައުމީ ޓީމުގެ ފަރިތަކުންތައް ފަށާފައިވާއިރު، ޝަރަފަށް އިންތިހާ ދަރަޖައިގެ ކަންބޮޑުވުންތައް އެބަހުއްޓެވެ. އެގޮތުން އެންމެ ބޮޑު ނުތަނަވަސްކަމަކީ ފަރިތަކުންތައް ކުރިޔަށްގެންދަން އޮތް ގޮންޖެހުމެވެ. ތިން ކުޅިވަރެއް ބޭނުން ކުރަމުންދާ ޒުވާނުންގެ މަރުކަޒުގެ އެތެރޭ ކޯޓު މީގެ ކުރިން ހާއްސަވެފައި އޮތީ ބާސްކެޓްބޯޅައަށެވެ. އެހެންކަމުން މީގެ ކުރިން ގައުމީ ޓީމުގެ ފަރިތަކުންތައް ކުރިޔަށްގެންގޮސްފައިވަނީ ދަންވަރު ގަޑީގައެވެ. އެއާއެކު އެންމެ އެކަށީގެންވާ ގޮތަށް ފަރިތަކުރުންތައް ކުރިޔަށްގެންދަން ގިނަ ދަތިތަކެއް ހުރި ކަމަށް ޝަރަފް ވަނީ ފާހަގަކޮށްފައެވެ.
ކުރިޔަށް އޮތް މުބާރާތުގައި ވާދަކުރާ ގިނަ ގައުމުތަކަކީ ހުރިހާ ގޮތަކުންވެސް ރާއްޖެއަށް ވުރެން ވަރުގަދަ ޓީމުތަކެވެ. ތުރުކުމެނިސްތާން، އުޒްބަކިސްތާން، އަފްޣާނިސްތާން، ބަންގްލަދޭޝް މި ގައުމުތަކަކީ މުބާރާތުގެ ފޭވަރިންޓުން ކަމަށް ޝަރަފް ގަބޫލުކުރެއެއެވެ.
2013 ވަނަ އަހަރުގެ ފައިނަލްގައި ސަރީލަންކާ އަތުން ރާއްޖެ ބަލިވެފައިވާއިރު، 2015 ވަނަ އަހަރުގެ ފައިނަލްގައި ރާއްޖެ ބަލިވެފައި ވަނީ ތުރުކުމަނިސްތާން އަތުންނެވެ. އެއަށް ފަހު 2016 ވަނަ އަހަރުގެ ތިންވަނަ މަގާމު ރާއްޖެއިން ވަނީ ހޯދާފައެވެ. ގައުމީ ޓީމާއެކު ޝަރަފް ހޯދި ކާމިޔާބުތަކަށް ބަލާއިރު 2011 ވަނަ އަހަރުގެ އައިއޯއައިޖީގެ ސެމީ ފައިނަލާއި، 2013 ވަނަ އަހަރުގެ ސެންޓަރަލް އޭޝިއަން މުބާރާތުގެ ފައިނަލް ކުޅެ ރިހި މެޑަލް ހޯދުން ހިމެނެއެވެ. މިއީ ވޮލީބޯޅައިގައި ރާއްޖެ ހޯދި ފުރަތަމަ މެޑެއްޔެވެ. އޭގެ ފަހުން ރަން މެޑެއްޔަކަށް ރާއްޖެއިން އުންމީދުކުރާތާ 11 އަހަރު ވަނީ ވެފައެވެ.
އެވްރެޖް ޓީމެއް
ގައުމީ ޓީމުގެ ކޯޗުގެ މަގާމާ ހަވާލުވުމަށްފަހު ޝަރަފް ވަނީ ގައުމީ ޓީމާއި ދުރުގައި ގިނަ ދުވަސްތަކެއް ވަންދެން ތިބި ގިނަ ކުޅުންތެރިންތަކެއް އެއްތަންކޮށް، ގައުމީ ޓީމުގެ ފަރިތަކުންތަކަށް ނެރެފައެވެ. މިހާރުގެ ގައުމީ ޓީމަކީ ދުވަސްވީ ކުޅުންތެރިން ގިނަ ޓީމެއް ކަމަށް ބުނާ ބުނުމަށް ޝަރަފްގެ ޖަވާބަކީ މިހާރު އެކުލަވާލާފައިވާ ސްކޮޑަކީ ތަޖުރިބާ އާއި ޒުވާން ޖޯޝް އެކުލެވޭ އެވްރެޖް ސްކޮޑެއް ކަމަށެވެ. ސްކޮޑްގައި ހިމެނޭ 18 ކުޅުންތެރިންގެ ތެރެއިން އެއްމެ ދުވަސްވީ ކުޅުންތެރިއަކީ 40 އަހަރުގެ އަލީ އާމިރު (ދިގު އައްޔަ) އެވެ. ދެން ސްކޮޑްގައި ހިމެނޭ މުހިންމު ކުޅުންތެރިންތަކެއް އުފަންވެފައި ވަނީ 2000 ވަނަ އަހަރުގެ ފަހުންނެވެ. އެހެން ކަމުން ސްކޮޑްގެ އެވްރެޖް އުމުރަކީ 28 އަހަރެވެ. މުބާރާތަށް ޓީމު ފުރާނީ މީގެ ތެރެއިން ހަތަރު ކުޅުންތެރިން އުނިކުރުމަށް ފަހުގައެވެ.
ޝަރަފްގެ ދަށުން މަސައްކަތް ކުރަން ހަމަޖައްސާފައިވަނީ ކުރީގެ މަޝްހޫރު ދެ ކުޅުންތެރިން ކަމަށްވާ އަޙްމަދު އަބްދުލް ކަރީމް (ލޯންގޭ) އާއި އަބްދުﷲ ޖުނައިދުގެ އިތުރުން ޚާލިދު މުޙައްމަދެވެ. މި ޓީމަކީ ގައުމީ ޓީމުގެ ސްކޮޑް ރަނގަޅަށް އެނގޭ، ވަރަށް ގާބިލު ކޯޗުންގެ ޓީމެއް ކަމަށް ޝަރަފް ވަނީ ބުނެފައެވެ.
ގައުމީ ޓީމާއެކު ޝަރަފް ކުރަންޖެހޭ މަސައްކަތް ބުރަވެފައިވާއިރު، ގައުމީ ފިރިހެން ވޮލީ ޓީމަށް ކާމިޔާބެއް ހޯދައިދޭން ފުރަތަމަ ކުރިމަތިލާން ޖެހޭ އިމްތިހާނަކީ ކާވާ މެންސް ވޮލީބޯލް ޗެމްޕިއަންޝިޕެވެ. އުޒްބެކިސްތާން، ތުރުކުމެނިސްތާން، އަފްޣާނިސްތާން، ނޭޕާލް، ބަންގްލަދޭޝް، ތަޖަކިސްތާން ވާދަކުރާ މި މުބާރާތުގެ ފައިނަލްގައި ރާއްޖެ ވާދަކުރުން އެއީ ގައުމުވެސް ބޭނުންވާ ގޮތް ކަމަށްވާއިރު، ޝަރަފް ގަބޫލުކުރާ ގޮތުގައި މި އޮތް ޓީމާއެކު އެއީ ކުރެވިދާނެ ކަމެކެވެ.
އަހަރުތަކަކަށް ފަހު ގައުމީ ޓީމާއި ޝަރަފް ހަވާލުވީ ޓީމުގެ ހާލަތު ރަނގަޅަށް ވަޒަންކުރުމަށްފަހު، އުނދަގޫތަކާއެކު ކުރިއަށް ދިޔުމަށެވެ. އެހެން ކަމުން 2027 ވަނަ އަހަރާ ހަމައަށް އޭނާއާ ހަވާލުކޮށްފައިވާ ބޮޑު ޒިންމާ އަދާކޮށް, ކުލަ ޖައްސާނެ ކަމަށް ޝަރަފް ވަނީ ބުނެފައެވެ.