ޢާއްމުންނަށް ދަތިވާގޮތަށް މަގުތަކުގައި ބަހައްޓާފައި ހުރި އުޅަނދުތައް ނަގަނީ

މާލޭގެ މަގުތަކަކީ އަމާން ތަނަކަށް ހެދުމަށް ރައީސުލްޖުމްހޫރިއްޔާގެ އިރުޝަދުފުޅާއެކު ވަނީ "މާލެ ފަހި" މަޝްރޫޢު އިފްތިތާޙްކޮށްފައެވެ. އެ މަސައްކަތުގެ ދަށުން އެކި މުވައްސަސާތަކުން އެކި މަސައްކަތް ކުރަމުން އަންނައިރު، މަގުމަތީގެ ސަލާމަތާއި ރައްކާތެރިކަން ކަށަވަރުކުރުމަށް ފުލުހުންވެސް ގެންދަވަނީ މަސައްކަތް ކުރައްވަމުންނެވެ. އެގޮތުން މަގުމަތީގައި ޤަވާއިދާ ޚިލާފަށް ހުރި އުޅަނދުތަކާއި، ގިނަ ދުވަސްވެ ބާވެފައިވާ އުޅަނދުތައް ނެގުމުގެ މަސައްކަތްވެސް ފުލުހުން ގެންދަވަނީ ކުރައްވަމުންނެވެ.

ޕީއެސްއެމް ނިއުސްއަށް މަޢުލޫމާތު ދެއްވަމުން ޗީފް އިންސްޕެކްޓަރ އޮފް ޕޮލިސް، ހެޑް އޮފް ޓޯ ފެސިލިޓީ މެނޭޖްމަންޓް ޢަލީ މުސްޠަފާ ވިދާޅުވީ، މަގުމަތިން ވެހިކަލް ނެގުމުގައި ފުލުހުން ބަލާނީ އުޅަނދު ބާއްވާފައިވަނީ ޢާއްމުންނަށް ދަތިވާ ފަދަ ސަރަޙައްދުތަކުގައިތޯއާއި ވެހިކަލްއަކީ ބާވެ ގިނަ ދުވަސްވީ ވެހިކަލެއްތޯކަމަށެވެ. އަދި ޢާއްމު ޚިދުމަތްތަކަށް ދަތިވާގޮތަށް ހުންނަ އުޅަނދުތައްވެސް ނަގަމުންދާނެކަމަށް ވިދާޅުވިއެވެ.

މާލޭގެ މަގުތަކުގައި ގަވާއިދާ ހިލާފަށް ޕާކުކޮށްފައި ހުރި އުޅަނދުތައް ނެގުމުގެ މަސައްކަތް ފުލުހުންދަނީ ކުރަމުން.

މި މަސައްކަތަކީ މާލޭގެ މަގުތަކަކީ އަމާން ރައްކާތެރިތަނަކަށް ހަދައި މަގުތައް ތަރުތީބުކުރުމަށް ކުރަމުންދާ މަސައްކަތުގެ ތެރެއިން ކުރަމުންދާކަމެއް. pic.twitter.com/GMM4011IUg

— Maldives Police (@PoliceMv) September 29, 2024

"އަޅުގަނޑުމެން ވެހިކަލްތައް ނެގުމަށްފަހު 48 ގަޑިއިރުފަހުން މިދޫކުރަނީ. ދޫކުރާއިރު އަޅުގަނޑުމެން ދޫކޮށްލަނީ އެމީހެއްގެ ނަމުގައި ހުރި ހުރިހާ ޖޫރިމަނާތަކެއް ދައްކާ ޚަލާސްކުރުމަށްފަހު. އަޅުގަނޑުމެން އެދެން އުޅަނދުތައް ޕާކުކުރާއިރު ގަވާއިދާ އެއްގޮތަށް ޕާކިން ޒޯނެއްގައި ޕާކުކުރަން." ވިދާޅުވިއެވެ.

މަގުތަކުގައި އުޅަނދުތައް ތޮށްޖެހުމުގެ ސަބަބުން ހިނގާ ބިނގާވެ އުޅުމަށާއި އުޅަނދު ދުއްވުމަށްވެސް ގިނަ ދަތިތަކެއް ވަނީ ކުރިމަތިވެފައެވެ.

އުޅަނދުތައް ގިނަވުމުގެ ސަބަބުން ހިނގާ އެކްސިޑެންޓުތަކާއި ގަވާއިދާ ޚިލާފަށް ދުއްވުމުގެ ނުރައްކާތެރި އެތައް ޙާދިސާތަކެއް ކައިރި މާޒީއަށް ބަލާއިރުވެސް ވަނީ ހިނގާފައެވެ. އެފަދަ ކަންކަން ހުއްޓުވުމަށްވެސް މަގުމަތީގައި ފުލުހުންގެ ޙަރަކާތްތެރިވުން އިތުރުކުރުމަށްވެސް ވަނީ ނިންމަވާފައެވެ. މިގޮތުން ބާރު ބޮޑުވާ އެކި ސަރަޙައްދުތަކުގައި ޓްރެފިކް ބެލެހެއްޓުމަށް ހުރިހާ ވަގުތެއްގައިވެސް ފުލުހުން ޑިއުޓީކުރެއެވެ.

މާލެއަށް ދިމާވެފައިވާ އުޅަނދު ތޮށްޖެހުމުގެ މައްސަލަ ޙައްލުކުރުމަށް އުސޫލުތަކަށް ގެނަންޖެހޭ ބަދަލުތައް ގެނައުމުގެ މަސައްކަތްވެސް މާލެ ފަހި ޕްރޮގްރާމްގެ ތެރެއިން ދަނީ ކުރަމުންނެވެ. ހަމައެއާއެކު ޕާކިން ޒޯނުތައް ތަރައްޤީކުރުމުގެ އެކި މަޝްރޫޢުތައްދަނީ ހިންގަމުންނެވެ. މިގޮތުން ހުޅުމާލޭގައި ޕާކިން އަށް ޚާއްސަ 15 ޢިމާރާތް ތަރައްޤީކުރުމުގެ މަސައްކަތް ކުރަމުންދާއިރު، އެއާއެކު 4000 އުޅަނދު ޕާކުކުރެވޭނެ ޖާގަ ލިބޭނެކަމަށް ސަރުކާރުން ވިދާޅުވެއެވެ.