ރާއްޖެއާއި އިންޑޮނޭޝިއާއާއި ދެމެދު ވިޔަފާރިއާއި އިޤްތިޞާދީ ގުޅުން ވަރުގަދަކުރުމަށް މަޝްވަރާކުރައްވައިފި

ރާއްޖެއާއި އިންޑޮނޭޝިއާއާއި ދެ ޤައުމުގެ ދެމެދު ވިޔަފާރިއާއި އިޤްތިޞާދީ ގުޅުން އިތުރަށް ވަރުގަދަކުރުމަށް މަޝްވަރާކުރައްވައިފިއެވެ. މި މަޝްވަރާތައް ބާއްވާފައިވަނީ އިންޑޮނޭޝިއާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ޑޭވީ ގުސްޓީނާ ޓޮބިން އިޤްތިޞާދީ ތަރައްޤީއާއި ވިޔަފާރިއާއި ބެހޭ ވަޒީރު މުޙައްމަދު ސަޢީދުގެ އަރިހަށް ކުރެއްވި އިޙްތިރާމްގެ ޒިޔާރަތުގައެވެ.

މި ބައްދަލުވުމާއި ގުޅޭގޮތުން ޕީއެސްއެމް ނިއުސްއަށް މައުލޫމާތުދެއްވަމުން ސަޢީދު ވިދާޅުވީ، ދެ ޤައުމުން ކުރާ ވިޔަފާރިއާއި އިޤްތިޞާދީ ކަންކަން އިތުރަށް ފުޅާކުރުމާއި ގުޅޭގޮތުން މި ބައްދަލުވުމުގައި މަޝްވަރާކުރެވުނުކަމަށެވެ.

H.E. Dewi Gustina Tobing, the Ambassador of the Republic of Indonesia to the Republic of Maldives, paid a courtesy call on H.E. @em_saeed

Discussions focused on strengthening ties through increased B2B activities aimed at boosting trade and investment between 🇲🇻🇮🇩 pic.twitter.com/Dq5bik4KxS

— Ministry of Economic Development and Trade (@MoEDmv) September 25, 2024

އިންޑޮނޭޝިއާއަކީ މިހާރުވެސް ދިވެހި ވިޔަފާރިވެރިން ވަރަށް ގިނައިން ދަތުރުކުރާ އަދި ރާއްޖެއަށް ގިނަ އަދަދަކަށް މުދާ އެތެރެކުރާ ޤައުމެއްކަން ވަޒީރު ފާހަގަކުރެއްވިއެވެ. އެގޮތުން 62 މިލިއަން ޑޮލަރުގެ ވިޔަފާރި ދެ ޤައުމުގެ ދެމެދުގައި ކުރާކަމަށް ވަޒީރު ވިދާޅުވިއެވެ.

އިޤްތިޞާދީ ތަރައްޤީއާއި ވިޔަފާރިއާއި ބެހޭ ވަޒީރު މުޙައްމަދު ސަޢީދު ވިދާޅުވީ، ރައީސުލްޖުމްހޫރިއްޔާ ގެންގުޅުއްވާ ސިޔާސަތަކީ އެކި ޤައުމުތަކާއި އެކުގައި ވިޔަފާރީގެ ގުޅުން އިތުރަށް ޤާއިމްކުރުންކަމަށެވެ. އަދި ވިޔަފާރީގެ ގުޅުން ޤާއިމްކޮށްފައި ހުރި ޤައުމުތަކާއި އެކުގައި ގުޅުން އިތުރަށް ބަދަހިކުރުމަށް ރައީސް މަސައްކަތްކުރައްވާކަމަށް ވަޒީރު ވިދާޅުވިއެވެ. މީގެއިތުރުން އެކި ބާޒާރުތަކަށް ރާއްޖޭގެ މުދާ އެކްސްޕޯޓްކުރުމަށް ލުއި ހޯދުމަށްވެސް ސަރުކާރުން މަސައްކަތްކުރަމުންދާކަމަށް އިޤްތިޞާދީ ތަރައްޤީއާއި ވިޔަފާރިއާބެހޭ ވަޒީރު މުޙައްމަދު ސަޢީދު ވިދާޅުވިއެވެ.