ސްރީލަންކާގެ އައު ބޮޑުވަޒީރަށް ރައީސުލްޖުމްހޫރިއްޔާ މަރުޙަބާ ވިދާޅުވެއްޖެ

ސްރީލަންކާގެ ބޮޑުވަޒީރު ކަމުގެ މަޤާމަށް އައްޔަން ކުރެއްވި ޑރ. ހަރީނީ އަމަރަސޫރިޔެއަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ތަހުނިޔާ ވިދާޅުވެއްޖެއެވެ.

ސްރީލަންކާގެ އައު ބޮޑުވަޒީރަށް މަރުހާބާ ދަންނަވައި، ރައީސުލްޖުމްހޫރިއްޔާ ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ، ބޮޑުވަޒީރު ޑރ. ހަރީނީގެ ބެލުމުގެ ދަށުން ސްރީލަންކާއަށް ކުރިއެރުންތަކެއް ލިބިގެންދާނެކަމަށް ޔަޤީންކުރައްވާކަމަށެވެ. އަދި އެތައް ގަރުނެއްވެފައިވާ ރާއްޖެއާއި ލަންކާ ގުޅުން އިތުރު ބަދަހިކުރެއްވުމަށް ގުޅިގެން މަސައްކަތް ކުރެވޭނެކަމަށް އުންމީދު ކުރައްވާކަމަށްވެސް އެމަނިކުފާނު ވިދާޅުވިއެވެ.

Heartfelt congratulations to Her Excellency Dr. Harini Amarasuriya @Dr_HariniA on being appointed as the 16th Prime Minister of Sri Lanka. I am confident that under your able leadership, Sri Lanka will see a new dawning of progress. I look forward to working together to further…

— Dr Mohamed Muizzu (@MMuizzu) September 24, 2024

ސްރީލަންކާގެ ބޮޑުވަޒީރު ކަމުގެ މަޤާމަށް ޑރ. ހަރީނީ އަމަރަސޫރިޔެ ޢައްޔަންކުރައްވަން އެ ޤައުމުގެ އައު ރައީސް އަނުރަ ކުމާރަ ދިސާނަޔަކަ ނިންމެވުމާއި ގުޅިގެން، އެކަމަނާ ވެފައިވަނީ ސްރީލަންކާގެ 16 ވަނަ ބޮޑުވަޒީރަށެވެ. އެކަމަނާއަކީ ޤާނޫނު ހަދާ މަޖިލީހުގައި ދިސާނަޔަކަގެ ނޭޝަނަލް ޕީޕަލްސް ޕަވަރ (އެންޕީޕީ) އިއްތިޙާދު ތަމްސީލު ކުރައްވާ މެންބަރެކެވެ. އެކަމަނާ, ޤާނޫނު ހަދާ މަޖިލީހަށް އިންތިޚާބުވެ ވަޑައިގަންނަވާފައި ވަނީ 2020ވަނަ އަހަރުއެވެ.

އަމަރަސޫރިޔެއަކީ ޔުނިވަރސިޓީ އޮފް އެޑިންބްރާއިން ސޯޝަލް އެންތުރޮޕޮލޮޖީގެ ދާއިރާއިން ޑޮކްޓަރޭޓު ހާސިލު ކުރައްވާފައިވާ ބޭފުޅެކެވެ. އޭނާއަކީ ސްރީލަންކާގެ ބޮޑުވަޒީރުކަމުގެ މަޤާމާ ހަވާލުވެ ވަޑައިގަންނަވާ ތިންވަނަ އަންހެން ބޭފުޅާއެެވެ.