ކްރިކެޓް ބޯޑް އޮފް މޯލްޑިވްސް (ސީބީއެމް) ގެ ރައީސްގެ މަގާމަށް އިތުރު ދައުރަކަށް މުޙައްމަދު ފައިސަލް އިންތިޚާބުވެވަޑައިގެންފިއެވެ. ކްރިކެޓް ބޯޑުގެ އައު ހިންގާ ކޮމިޓީ އިންތިޚާބުކޮށްފައިވަނީ ޝީ ބިލްޑިންގުގައި މިއަދު ހަވީރު ބޭއްވި، އެ ބޯޑުގެ އިންތިޚާބީ ޖަލްސާގައެވެ.
ކްރިކެޓް ބޯޑުގެ އިންތިޚާބުގައި ވޯޓިލާފައިވަނީ 16 ކުލަބުގެ އިތުރުން ސްކޫލުތަކުގެ ފަރާތުން ދަރުމަވަންތަ ސްކޫލެވެ. މި އިންތިޚާބުގައި ރައީސްގެ މަގާމަށް ފައިސަލްގެ އިތުރުން ވާދަކުރައްވާފައިވަނީ ފަރުހަތު ޖަލީލެވެ. ރައީސްގެ މަގާމަށް އިތުރު ދައުރަކަށް ހޮވިވަޑައިގެންނެވި ފައިސަލަށް 10 ވޯޓު ލިބިވަޑައިގެންނެވިއިރު، ފަރުހަތަށް ލިބިވަޑައިގަތީ ހަތް ވޯޓެވެ.
ކްރިކެޓް ބޯޑުގެ ރައީސްގެ މަގާމަށް އިތުރު ދައުރަކަށް ފައިސަލް އިންތިޚާބުވެވަޑައިގެންނެވިއިރު، އޭނާ އެންމެ ފުރަތަމަ އެ މަގާމަށް އިންތިޚާބުވެވަޑައިގަތީ 2020 ވަނަ އަހަރުގެ ސެޕްޓެމްބަރު މަހުގެ 26 ވަނަ ދުވަހު ބޭއްވި އންތިޚާބު ކާމިޔާބުކުރައްވައިގެންނެވެ. މީގެ އިތުރުން މި އަހަރުގެ އޭޕްރީލް މަހު ފައިސަލް ވަނީ އިންޓަރނޭޝަނަލް ކްރިކެޓް ކައުންސިލް (އައިސީސީ) ގައި އޭޝިއާ ސަރަހައްދުގެ ނޮން-ވޯޓިން ގައުމުތައް ތަމްސީލުކުރައްވާ ބޭފުޅާގެ މަގާމަށް އިތުރު ދެ އަހަރަށް އިންތިޚާބުވެވަޑައިގެންފައެވެ.
މި ފަހަރުގެ އިންތިޚާބުގައި ކްރިކެޓް ބޯޑުގެ ނައިބު ރައީސްގެ މަގާމަށް އިންތިޚާބުވެވަޑައިގަތީ އަޙްމަދު އިސްހާގެވެ. އޭނާއަށް 10 ވޯޓު ލިބިވަޑައިގެންނެވިއިރު، ނައިބު ރައީސްގެ މަގާމަށް ދެން ވާދަކުރެއްވި އަޙްމަދު އާމިރަށް ލިބިވަޑައިގެންނެވީ ހަތް ވޯޓެވެ.
ކްރިކެޓް ބޯޑުގެ ފުލް މެންބަރުންގެ ގޮތުގައި ހޮވިވަޑައިގެންނެވި ހަތަރު ބޭފުޅުންނަކީ އަޙްމަދު އައްސަދު ވަހީދާއި، އަބްދުﷲ ސައުދާން އިބްރާހީމާއި، އިސްމާޢީލް ނަޝްވާން ނާސިރުގެ އިތުރުން އަޙްމަދު ހުސައިންއެވެ. މި މަގާމަށް ހަތް ބޭފުޅަކު ވަނީ ވާދަކުރައްވާފައެވެ. އަދި އެސޯސިއޭޓް ދެ މެންބަރުންގެ ގޮތުގައި ހޮވިވަޑައިގެންނެވީ އަލީ ތޯލިބާއި އިބްރާހީމް މޫސާއެވެ. ދެން މި މަގާމަށް ވާދަކުރެއްވީ އިޝްރަތު ހަމީދެވެ. މީގެ އިތުރުން ފަރުދީ މެންބަރުގެ މަގާމަށް އެންމެ ބޭފުޅަކު ކުރިމަތިލެއްވުމުން ނަގާފައިވަނީ ފެންނަ ނުފެންނަ ވޯޓެކެވެ. އެ މަގާމަށް އަޙްމަދު ކަލީމް ކުރިމަތިލެއްވިއިރު، ފެންނަ ކަމަށް ނުވަ ވޯޓު ވަނީ ލިބިވަޑައިގެންފައެވެ.
ކްރިކެޓް ބޯޑުގެ އައު ހިންގާ ކޮމިޓީ އިންތިޚާބުކުރިއިރު، އެ ކޮމިޓީގެ ދައުރު ހަމަވާނީ 2028 ވަނަ އަހަރެވެ.