އ.ދގެ ބައްދަލުވުމުގައި އެންމެ އިސްކަން ދޭނީ އިއާދަކުރަނިވި ހަކަތައިގެ ދާއިރާ ކުރިއެރުވުމަށް: ޠާރިޤް

މިފަހަރުގެ އ.ދގެ އާއްމު މަޖިލީހުގެ ބަންދަލުވުންތަކުގައި ރާއްޖެއިން އެންމެ ބޮޑު އިސްކަމެއްދޭނީ ހަކަތައިގެ ދާއިރާއިން ކަނޑައަޅާފައިވާ ލަނޑުދަނޑިތައް ހާސިލްކުރުމަށް ބޭނުންވާ އެހީ ހޯދުމާއި، ރާއްޖޭގައި މި ދާއިރާއިން ހުރި ފުރުޞަތުތަކަށް އިންވެސްޓަރުންގެ ޝަޢުގުވެރިކަން އިތުރުކުރުމަށްކަމަށް ތިމާވެއްޓާ ހަކަތައާބެހޭ ވަޒީރު ޠާރިޤް އިބްރާޙިމް ވިދާޅުވެއްޖެއެވެ.

ވަޒީރު މިހެން ވިދާޅުވީ އދ.ގެ 79ވަނަ އާއްމު މަޖިލިހުގެ ބައްދަލުވުންތަކުގައި ބައިވެރިވެވަޑައިގެންނެވުމަށް ފުރާވަޑައިގަތުމުގެ ކުރިން، މި ދަތުރުފުޅުގެ މަޢުލޫމާތު ޙިއްސާކުރެއްވުމަށް ބޭއްވި ނޫސްވެރިންގެ ބައްދަލުކުރެއްވުމުގައެވެ.

ވަޒީރު ވިދާޅުވީ މިފަހަރުގެ ބައްދަލުވުމުގައި ރާއްޖެއިން އިސްނަގައިގެން ސައިޑް އިވެންޓެއް ބޭއްވުމަށް ހަމަޖެހިފައިވާކަމަށެވެ. މިއީ އިއާދަކުރަނިވި ހަކަތައިގެ ދާއިރާއިން ރާއްޖެއިން ހޯދާފައިވާ ކާމިޔާބީއާއި އެކަމުގައި ރާއްޖެއިން ކުރަމުންދާ މަސައްކަތުގެ ތަޖުރިބާ ޤައުމުތަކާ ޙިއްސާކުރުމަށް ބާއްވާ ބައްދަލުވުމެކެވެ. "ރިނިއުބަލް އެނަރޖީ ޓްރާންސިޝަންސް ސިޑްސް، ދަ މޯލްޑިވްސް ސްޓޯރީ"ގެ ނަމުގައި ބާއްވާ ބައްދަލުކުރެއްވުމުގައި ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ބައިވެރިވެވަޑައިގަންނަވާނެއެވެ. މީގެއިތުރުން ރާއްޖެއަށް މި ދާއިރާއިން އެންމެ ބޮޑު އެހީތެރިކަމެއް ފޯރުކޮށްދެމުންދާ، ވޯލްޑް ބޭންކް، އޭޑީބީ އަދި އައިރީނާ ފަދަ ބޭންކް/ޖަމިއްޔާ ތަކުން ބައިވެރިވާނެއެވެ.

މީގެއިތުރުން ރާއްޖޭގެ ރަށްތަކަށް ދިމާވާ ރަށްގިރުމުގެ މައްސަލައާއި ގުޅޭގޮތުން ދިވެހިރާއްޖެއާއި އެމެރިކާގެ އިންސްޓިއުޓަކާ ގުޅިގެން ކުރިއަށްގެންދާ ދިރާސާއާއި ގުޅޭ ސެޝަނެއް ބާއްވާނެއެވެ. މި ސެޝަންގެ ބޭނުމަކީ ދިރާސާގެ ވާހަކަތައް ޙިއްސާކޮށް އަދި އެކަމުގައި އިތުރު އެހީ ހޯދުމަށް މަގުފަހިކުރުމެވެ. މި ބައްދަލުކުރެއްވުމުގައިވެސް ރައީސުލްޖުމްހޫރިއްޔާ ބައިވެރިވެވަޑައިގަންނަނާވާނެއެވެ.

އދ.ދެ މަޖިލީހުގެ ހަވާސާގައި ކުރިއަށްގެންދާ 14 ބައްދަލުކުރެއްވުމުގައި ރާއްޖެއިން ބައިވެރިވުމަށް ވަނީ ހަމަޖެހިފައެވެ. މީގެތެރޭގައި ޤައުމުތަކުގެ ލީޑަރުންނާއި އިސް ފަރާތްތަކުން ބައިވެރިވާ މަތީ ފަންތީގެ ބައްދަލުވުންތައް ހިމެނެއެވެ.

ތިމާވެއްޓާ ހަކަތައާބެހޭ ވަޒީރު ޠާރިޤް އިބްރާޙީމް ވިދާޅުވީ ރާއްޖެއިން ބައިވެރިވާ ބައިނަލްއަޤްވާމީ މިފަދަ ބަންދަލުވުންތަކުން ރާއްޖެއަށް ގިނަ ފައިދާތަކެއް ކުރާކަމަށާއި ޚާއްސަކޮށް އިއާދަކުރަނިވި ހަކަތައިގެ ދާއިރާއިން ރާއްޖެ ޙޯދާފައިވާ ކާމިޔާބީއަކީ ތަރައްޤީވަމުން އަންނަ ކުދި ޖަޒީރާ ޤައުމުތަކަށް ނަމޫނާ މަސައްކަތެއްކަމަށެވެ. ވަޒީރު ވިދާޅުވީ މިފަހަރުގެ ބައްދަލުވުންތަކުގައި އެންމެ ބޮޑަށް މަސްއްކަތެއްގެ ގޮތުގައި ކުރާނި އެއް މަސައްކަތަކީ މި ދާއިރާއިން ރާއްޖޭގައި ޕްރައިވެޓް އިންވެސްޓްމަންޓްތައް އިތުރުކުރުމަށް އެކަމުގެ ޝައުގުވެރިކަން އުފެއްދުމުގެ މަސައްކަތްކަމަށެވެ. އެކަން ކުރާނީ ރާއްޖެއިން ހޯދާފައިވާ ކާމިޔާބީތައް ޙިއްސާކޮށްގެންކަންވެސް ވަޒީރު ފާހަގަކުރެއްވިއެވެ.

"އިއާދަކުރަނިވި ހަކަތައިގެ ދާއިރާއިން ސިޑްސްގެ ޤައުމުތަކުގެ ތެރެއިން ރާއްޖެ މިއައޮތީ ވަރަށް ފާހަގަކޮށްލެވޭ އުފާވާ ހިސާބެއްގައި. އެހެންޤައުމުތަކާ ބަލާއިރު ވަރަށް އެޑްވާންސް ލެވެލްއެއްގައި ރާއްޖެ އޮތީ. މި ދާއިރާއިން ރައީސްގެ މުހިންމު ވަޢުދުތައް އެބަހުރި." ހަކަތައާއި ބެހޭ ވަޒިރު ޠާރިޤް އިބްރާޙިމް ވިދާޅުވިއެވެ.

ވަޒީރު ވިދާޅުވީ މިފަދަ ބައްދަލުވުންތަކުގައި ރައީސުލްޖުމްހޫރިއްޔާ އަމިއްލަފުޅަށް ބައިވެރިވެވަޑައިގަތުމަކީ ރާއްޖެއިން ކުރާ މަސައްކަތުގެ އިތުބާރު ބޮޑުވެ، ރާއްޖެއިން މި ދާއިރާއިން ދޭ އިސްކަން އެހެން ޤައުމުތަކަށް ހާމަވާކަމެއްކަމަށެވެ.

"ރައީސް ބައިވެރިވެވަޑައިގަންނަވާތީ އެބަ ފެނޭ އެންމެ މަތީ ލެވެސްލައި މި ދާއިރާތަކުން ރާއްޖެއިން އިސްކަން ދޭކަން. ދުނިޔޭގެ ޤައުމުތަކާ، ވިޔަފާރިގެ ޝައުގުވެރިކަން ފާޅުކުރާ ފަރާތްތަކަށްވެސް އެކަން އެބަ ފެނިގެންދޭ." ހަކަތައާއި ބެހޭ ވަޒިރު ޠާރިޤް އިބްރާޙިމް ވިދާޅުވިއެވެ.

ވަޒީރު ވިދާޅުވީ ރާއްޖޭގައި އިތުރު 4 ބައޮސްފިއަރ ރިޒަރވް ޤާއިމްކުރުމަށް ރައީސުލްޖުމްހޫރިއްޔާ ވެފައިވާ ވަޢުދާއި ރާއްޖޭގެ އެކި ސަރަޙައްދުތައް ޙިމާޔަތްކޮށް މެނޭޖުކުރުމަށް ކުރާ މަސައްކަތަށްވެސް އެހީ ހޯދުމަށް މަސައްކަތް ކުރައްވާނެކަމަށެވެ.

މީގެއިތުރުން ޤައުމުތަކުގެ ކަނޑުގެ އިޙްޞާސުން ބޭރުގައިވާ ދިރޭތަކެތީގެ ނަސްލު ދެމެހެއްޓުމާއި ތިމާވެއްޓާ އިންސާނީ ސިއްޙަތާ ގުޅޭގޮތުން އުފައްދާފައިވާ މުއާހަދާއާއި ގުޅޭ ބައްދަލުވުންތަކުގައި ބައިވެރިވާނެއެވެ. އަދި ޕްލާސްޓިކްގެ މައްސަލައަށް ޙައްލު ހޯދުމާއި ވެށި ޙިމާޔަތްކުރުމަށް ކުރާ މަސައްކަތްތަކާ ގުޅޭ ރައުންޑް ޓޭބަލް ބައްދަލުވުންތަކުގައި ރާއްޖެއިން ބައިވެރިވާނެއެވެ.