ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގައި ހިމެނޭ މައްސަލަތައް ހައްލުކުރުމަށް ފީފައިން އެކުލަވާލި ނޯމަލައިޒޭޝަން ކޮމިޓީގެ މަސައްކަތްތަކަށް އެއް އަހަރު ދުވަހުގެ މުއްދަތެއް ދީފައިވީ ނަމަވެސް، އެ މުއްދަތުގެ ތެރޭގައި އެ މަސައްކަތް އެއްކޮށް ނިންމާނުލެވޭ ކަމަށް އެ ކޮމިޓީގެ ޗެއާމަން އަޙްމަދު ޒުހޫރު ވިދާޅުވެއްޖެއެވެ. ޒުހޫރު މިހެން ވިދާޅުވީ ގައުމީ ފުޓްބޯޅަ ދަނޑުގެ ވީއައިޕީ ރޫމުގައި މިއަދު ހަވީރު ބޭއްވި ނޫސްވެރިންގެ ބައްދަލުވުމުގެ ތެރެއިންނެވެ.
ނޯމަލައިޒޭޝަން ކޮމިޓީގެ މަސައްކަތްތަކާ ގުޅޭގޮތުން ފުރަތަމަ ފަހަރަށް ނޫސްވެރިންނާ ބައްދަލުކޮށް، އެ ކޮމެޓީގެ ޗެއާމަން ޒުހޫރު ވިދާޅުވީ ވިދާޅުވީ ކުރިއަށް ހުރި މަސައްކަތްތައް ގިނަ ކަމަށާއި، މައްސަލަތައް ފުނިޖެހިފައިވާ އެފްއޭއެމް ހަމަ މަގަށް އެޅުވުމަކީ އުނދަގޫ އަދި ބޮޑު ޗެލެންޖެއް ކަމަށެވެ. ހަމަ އެހެންމެ އޯގަނައިޒޭޝަނެއްގެ ސިފައިގައި ގިނަ ކަންކަން އެފްއޭއެމްގައި ފެއިލްވެފައިވާ ކަމަށް ޒުހޫރު ވިދާޅުވިއެވެ.
ޒުހޫރު ވިދާޅުވީ ހަމައެކަނި ކުރެވެނީ އެފްއޭއެމް އެންމެ ފަހުން ހިންގަން ތިބި ވެރިންގެ ޚިޔާނާތުގެ މައްސަލަ އެކަނި ނޫން ކަމަށާއި، ރަނގަޅު އޮނިގަނޑެއްގެ މަތީގައި ކޮމިޓީތައް އެކުލަވާލެވި، ހަރުދަނާ އޮނިގަނޑެއްގެ ދަށުން އެފްއޭއެމް ހިންގުމަށް މަގުފަހިކޮށްދިނުމަކީވެސް މުހިންމު ކަމެއް ކަމަށެވެ. އެގޮތުން ހުރި މައްސަލަތައް ރަނގަޅުކޮށް، އެއް އަހަރުގެ ތެރޭގައި އެފްއޭއެމް ހިންގަން ފެށުމަކީ ބޮޑު އުއްމީދެއް ކަމަށްވެސް ވިދާޅުވިއެވެ.
"މި ވަގުތު އަޅުގަނޑުމެންނަށް ފެންނަށް ހުރި ސްޓެޓްތަކުން ބައެއް ކޮމިޓީތަކަކީ ހުސްވެފައިވާ ކޮމިޓީތައް. ކޮމިޓީތައް އެކުލަވާނުލެވި އަޅުގަނޑުމެންނަށް މަސައްކަތްތައް ފައްޓައިގަނެވެންވެސް ނެތް. އަދި ހަމަ އެއާކު އަޅުގަނޑުމެންނަށް ފައިސާގެ ދަތިކަން އެބައޮތް. އަދި އަޅުގަނޑުމެން މަސައްކަތް ހަމަ މި ފެށުނީ." ޒުހޫރު ވިދާޅުވިއެވެ.
މީގެ އިތުރުން ޒުހޫރު ވަނީ މިހާރު ހުރި މައްސަލަތަކާއެކު ފުޓްބޯޅަ ސީޒަން ފެއްޓުމަށް ދަތިތަކެއް ހުރިކަން ފާހަގަކުރައްވާފައެވެ. އެކަމަކު އެފްއޭއެމް ރަނގަޅު މުއައްސަސާއެއްގެ ގޮތުގައި ހިނގައިގަނެވޭނެ ކަމުގެ އުންމީދު ބޮޑު ކަމަށާއި، އެ މަސައްކަތުގައި ދެމިހުންނާނީ އެ އަމާޒަށް ވާސިލުވުމަށް ކަމަށްވެސް ޒުހޫރު ވިދާޅުވިއެވެ.
"މި ވަގުތު ދަރާ މިއޮތީ ވަރަށް ބޮޑު އަދަދެއް. އިތާދަކުރެއްވިޔާ އަޅުގަނޑުމެން މައްސަކަތުން މި ދަރަނިން އަޅުގަނޑުމެން އަރައިގަނެވި، ދުވަހުން ދުވަހަށް ހިންގޭ ތަނެއް ގޮތުގައި އެފްއޭއެމް އަޅުގަނޑުމެން ދައްކާނަން. އެ ކޮމިޓްމެންޓުވެސް އަޅުގަނޑުމެން ދެން،" ކުރީގެ ކުޅިވަރާ ބެހޭ ވަޒީރު ޒުހޫރު ވިދާޅުވިއެވެ.
ރާއްޖޭގެ ފުޓުބޯޅައިގެ މައި އިދާރާ ނޯމަލައިޒިން ކޮމިޓީއެއްގެ ދަށަށް ގެންނަން ފީފާއިން ނިންމާފައިވަނީ ޖުލައި މަހުގެ 23 ވަނަ ދުވަހެވެ. ނޯމަލައިޒިން ކޮމިޓީގެ މެންޑޭޓުތަކުގެ ތެރޭގައި ހިމެނެނީ އެފްއޭއެމް އިން ދުވަހުން ދުވަހަށް ކުރާ މަސައްކަތް ކުރުމާއި، އެފްއޭއެމްގެ އަސާސީ ގަވާއިދު އަދި އިލެކްޓޯރަލް ކޯޑު ފީފާގެ ސްޓެޓިއުޓްސްއާ އެއްގޮތަށް މުރާޖާކޮށް، އެ އުސޫލުތަކާ އެއްގޮތަށް އަމަލުކުރާކަން ކަށަވަރުކުރުމާއި، އެފްއޭއެމްގެ އިސްވެރިންނާއި އެހެނިހެން ފަރާތްތައް ގުޅިގެން ފީފާ އާއި އޭއެފްސީން ދީފައިވާ ފައިސާ ނަހަމަ ގޮތުގައި ބޭނުންކޮށްފައިވާނަމަ، އެ ފައިސާ ހޯދުމަށް ރާއްޖޭގެ ގާނޫނީ ނިޒާމުގެ ތެރެއިން ކުރަންޖެހޭ ކަންކަން ކުރުމާއި، ފީފާ އިން އައްޔަން ކޮށްފައިވާ އެކްސްޓާނަލް ފައިނޭންޝިއަލް ކޮންސަލްޓަންޓާ ގުޅިގެން އެފްއޭއެމްގެ ދަރަނިތައް ރީސްޓްރަކްޗާ ކުރުމުގެ ޕްލޭނެއް ހެދުމާއި، ފީފާގެ އޮޑިޓް ރިޕޯޓުގައި ބަޔާންކޮށްފައިވާ ކަންތައްތައް ތަންފީޒުކުރަން ފެށުމުގެ އިތުރުން އެފްއޭއެމްގެ ހިންގާ ކޮމިޓީއެއް އިންތިޚާބުކޮށް، އައު ގާނޫނީ އޮނިގަނޑެއްގެ މައްޗަށް ބިނާކޮށް ކުރިއަށް ގެންދިއުމެވެ.