އަހަރެއްގެ މެދުކެނޑުމަކަށްފަހު ޔުއެފާ ޗެމްޕިއަންސް ލީގުގައި ކުޅުނު ފުރަތަމަ މެޗުގައި ނެދަލެންޑްސްގެ ޕީއެސްވީ އެއިންދޯވަން އަތުން 3-1 ގެ ނަތީޖާއަކުން ޔުވެންޓަސް މޮޅުވެއްޖެއެވެ.
ޗެމްޕިއަންސް ލީގުގައި ގަވާއިދުން ކޮންމެ އަހަރަކު ކުޅެމުން އައިސްފައިވާ، ޔުވެންޓަސްއަށް މިދިޔަ ފަހަރުގެ ސީޒަނުގައި އެ މުބާރާތުގައި ވާދަކުރެވޭގޮތް ނުވީ، ޓްރާންސްފާ ބާޒާރުގައި ކުޅުންތެރިން ގަތުމަށް ހޭދަކޮށްފައިވާ ގޮތާއި ގުޅޭ މައްސަލައެއްގައި ޕޮއިންޓް އުނިކުރުމުންނެވެ.
ޔުއެފާއިން ޔުވެންޓަސްއަށް އަދަބު ދޭން ނިންމީ، އެ ފަހަރުގެ ސީޒަނުގައި ޔުއެފާ ކްލަބް ލައިސެންސިންގ އަދި ފައިނޭންޝަލް ފެއަރ ޕްލޭ ގަވާއިދުތަކާ ޚިލާފުވުމުގެ ސަބަބުންނެވެ. މި މައްސަލައިގައި ޔުވެންޓަސްއިން ވަނީ އެއްވެސް ކަމެއް ގޯސްކޮށް ކޮށްފައިނުވާ ކަމަށް ބުނެފައެވެ. މިއީ 2011 އަދި 2012 ވަނަ އަހަރުގެ ސީޒަނުގެ ފަހުން ޗެމްޕިއަންސް ލީގުގައި އެ ޓީމަށް ވާދަނުކުރެވުނު ފުރަތަމަ ފަހަރެވެ.
ޕީއެސްވީން މިރޭގެ މެޗަށް ނިކުތްއިރު ދިމާވެފައިވާ އެންމެ ބޮޑު މައްސަލައަކީ އާއިލީ ސަބަބަކާހުރެ އެ ޓީމުގެ އެއްވަނަ ގޯލްކީޕަރު، ވޯލްޓާ ބެނީޓޭޒަށް ނުކުޅެވުމެވެ. އޭނާ ވަނީ މި މެޗު ފެށުމުގެ ކުޑަވަގުތުކޮޅެއް ކުރީން، އަންހެނުން ވިހެއުމާ ގުޅިގެން، އާއިލާއާއެކު ވަގުތު ހޭދަކުރުމަށް ކްލަބުގެ ހުއްދައާއެކު ޓީމުގެ ހުރިހާ ކުޅުންތެރިން ތިބި ހޮޓެލް ދޫކޮށް ގޮސްފައެވެ.
ޔުވެންޓަސްގެ އެލިއާންޒް ސްޓޭޑިއަމްގައި ކުޅުނު މި މެޗު ފެށިގެން 21 ވަނަ މިނެޓުގައި އެ ޓީމުން ލީޑު ނެގީ ތުރުކީގެ ޒުވާން ފޯވާޑް ކެނާން ޔިލްޑީޒް ކާމިޔާބުކުރި ލަނޑުންނެވެ. ޕެނަލްޓީ އޭރިއާ ތެރެއިން ޔިލްޑީޒް ފޮނުވާލި މި ބޯޅަ ސަލާމަތްކުރަން ޕީއެސްވީގެ ދެވަނަ ކީޕަރު ޖޮއެލް ޑްރޮމެލްއަށް މާ ބޮޑު މަސައްކަތެއް ނުކުރެވުނެވެ. މިއީ މި ފަހަރު މުޅިން އައު ފޯމެޓަކަށް ކުޅެމުން އަންނަ ޗެމްޕިއަންސް ލީގުގެ ފުރަތަމަ ލަނޑެވެ.
މި ލަނޑާއެކު ޔިލްޑީޒް ވަނީ ޔުވެންޓަސްގެ ތާރީޚުގައި މި މުބާރާތުގައި ލަނޑު ޖެހި އެންމެ ހަގު ކުޅުންތެރިޔާގެ ޝަރަފު ހޯދާފައެވެ. މި މެޗުގައި ލަނޑު ޖެހިއިރު ޔިލްޑީޒްގެ އުމުރަކީ 19 އަހަރާއި 136 ދުވަހެވެ. ކުރީން މި ރެކޯޑް އޮތީ އިޓަލީ އާއި ޔުވެންޓަސްގެ ލެޖެންޑް، އަލެސަންދްރޯ ޑެލްޕިއޭރޯ އަތުގައެވެ. މީގެ 29 ވަރަކަށް އަހަރު ކުރިން ޗެމްޕިއަންސް ލީގުގައި ބޮރޫޝިއާ ޑޯޓްމުންޑް ކޮޅަށް ލަނޑު ޖެހިއިރު، ޑެލްޕިއޭރޯގެ އުމުރަކީ 20 އަހަރާއި 308 ދުވަހެވެ.
މި މެޗުގައި ޔުވެންޓަސްއިން ޖެހި ދެވަނަ ލަނޑު 27 ވަނަ މިނެޓުގައި ކާމިޔާބުކޮށްދިނީ އެމެރިކާގެ މިޑްފީލްޑަރު ވެސްޓަން މެކެނީއެވެ. އަދި ދެވަނަ ހާފުގެ ކުރީކޮޅު، ޔުވެންޓަސްގެ ތިންވަނަ ލަނޑު ޑޫސާން ވްލާހޮވިޗް ނަގައިދިން ހުރަހަކުން ކާމިޔާބުކޮށްދިނީ ނިކޮލަސް ގޮންޒާލެޒްއެވެ. މިއީ މި މުބާރާތުގައި އޭނާ ކާމިޔާބުކުރި ފުރަތަމަ ލަނޑެވެ. އޭގެފަހުން މެޗުގެ އިތުރުވަގުތުގެ ތެރޭގައި ޕީއެސްވީއަށް ސުން ކަނޑުވާލައިދިނީ އިސްމާއިލް ސައިބާރީއެވެ.
މި މުބާރާތުގައި ޔުވެންޓަސް ދެން ކުޅުމަށް ހަމަޖެހިފައިވާ މެޗުގައި އަންނަ އޮކްޓޫބަރު މަހުގެ ހަވަނަ ދުވަހު ޖަރުމަނުގައި ނިކުންނާނީ އާރްބީ ލައިޕްޒީގާ ދެކޮޅަށެވެ.