ކާވާ ވިމެންސް ވޮލީބޯލް ކުލަބު ޗެމްޕިއަންޝިޕް: ނޭޕާލުގެ ޕޮލިސް ކުލަބުގެ މޮޅުވުމުގެ ސިލްސިލާ ކުރިއަށް، ރާއްޖޭގެ ކުލަބުތަކަށް ނާކާމިޔާބު

މާލޭގައި މިހާރު ކުރިއަށްދާ ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ) ވިމެންސް ވޮލީބޯލް ކުލަބު ޗެމްޕިއަންޝިޕް 2024 ގައި މިއަދު ކުޅުނު މެޗު ކާމިޔާބުކޮށް ނޭޕާލުގެ ޕޮލިސް ކުލަބުން މޮޅުވުމުގެ ސިލްސިލާ ދެމެހެއްޓިއިރު، ރާއްޖޭގެ ކުލަބު ވެމްކޯ އާއި ޕޮލިސް ކުލަބުން ކުޅުނު މެޗުތަކުން ބަލިވެއްޖެއެވެ.

އަންނަ ހޮނިހިރު ދުވަހުގެ ނިޔަލަށް ޒުވާނުންގެ މަރުކަޒުގެ އެތެރޭ ކޯޓުގައި ކުރިއަށްދާ މި މުބާރާތުގައި ފަސް ގައުމަކުން ހަ ކުލަބު ވާދަކުރެއެވެ. އެއީ ރާއްޖޭގެ ވެމްކޯ އާއި ޕޮލިސް ކުލަބުގެ އިތުރުން ނޭޕާލުގެ ޕޮލިސް ކުލަބާއި، ސްރީ ލަންކާގެ އެއަރ ފޯސް އާއި، އުޒްބެކިސްތާންގެ ހުމޯ ވޮލީބޯލް ކުލަބު އަދި ތަޖިކިސްތާންގެ ވޮލީބޯލް ކުލަބު ޑިއަމެޑް އެވެ.

މުބާރާތުގައި މިއަދު މެންދުރުފަހު ކުޅުނު މެޗުން ނޭޕާލުގެ ޕޮލިސް ކުލަބު މޮޅުވީ ތަޖިކިސްތާންގެ ޑިއަމެޑް އަތުން ސީދާ ތިން ސެޓުންނެވެ. މި މެޗުގެ ސެޓުތައް ނޭޕާލުގެ ޕޮލިސް ކުލަބުން ގެންދިޔައީ 25-15، 25-12 އަދި 25-14 އިންނެވެ. މި މެޗުން ނޭޕާލުގެ ޕޮލިސް ކުލަބު މޮޅުވިއިރު، މުބާރާތުގައި މިހާތަނަށް ކުޅުނު ތިން މެޗުންވެސް އެ ޓީމު ވަނީ މޮޅުވެފައެވެ.

މީގެ އިތުރުން މި މުބާރާތުގައި މިއަދު ހަވީރު ކުޅުނު މެޗުން ވެމްކޯ ބަލިވީ އުޒްބެކިސްތާންގެ ހުމޯ އަތުން 3-1 ސެޓުންނެވެ. މި މެޗުގެ ފުރަތަމަ ސެޓު 25-19 އިން ކާމިޔާބުކުރީ ވެމްކޯ އިންނެވެ. އެކަމަކު ހުމޯ އިން ވަނީ ޖެހިގެން އައި ތިން ސެޓު ކާމިޔާބުކޮށް، މެޗުން މޮޅުވެފައެވެ. މި ސެޓުތައް ހުމޯ އިން ގެންދިޔައީ 25-18، 25-19 އަދި 25-18 އިންނެވެ. މި މެޗުން ވެމްކޯ ބަލިވިއިރު، މިއީ މި ފަހަރުގެ މުބާރާތުގައި އެ ޓީމު ބަލިވި ފުރަތަމަ މެޗެވެ.

މި މުބާރާތުގައި މިރޭ ކުޅުނު މެޗުން ރާއްޖޭގެ ޕޮލިސް ކުލަބު ބަލިވީ ލަންކާގެ އެއަރ ފޯސް އަތުން ސީދާ ތިން ސެޓުންނެވެ. މި މެޗުގެ ސެޓުތައް ލަންކާގެ އެއަރ ފޯސް އިން ގެންދިޔައީ 25-12، 25-15 އަދި 25-19 އިންނެވެ.

މި މުބާރާތް ރޭވިފައިވާ ގޮތުން ލީގު ބުރުގައި ކޮންމެ ޓީމެއް ކޮންމެ ޓީމަކާ ބައްދަލުކުރާއިރު، އެއްވަނަ އާއި ދެވަނަ ހޯދާ ޓީމުތައް ފައިނަލަށް ދަތުރުކުރާނެއެވެ. އަދި ތިންވަނަ އާއި ހަތަރުވަނައިގެ މެދުގައި ލޯ މެޑެލް މެޗު ކުޅޭއިރު، ފަސްވަނަ އާއި ހަވަނައިގެ މެދުގައި ރޭންކިން މެޗެއް ކުޅޭނެއެވެ.