މައި އެޑިއު ޕޯޓަލް އޮޓޮމޭޓްކުރެވުމާއެކު ލޯނު ދޫކުރުމުގެ މަސައްކަތް އަވަސްވާނެ: ހަޔަރ އެޑިއުކޭޝަން

މަތީ ތަޢުލީމު ހާސިލުކުރުމަށް ސަރުކާރުން ދޫކުރާ ލޯނު އަވަސްކުރުމަށް "މައި އެޑިއު ޕޯޓަލް" މެދުވެރިކޮށް ކުރާ ހުރިހާ މަސައްކަތެއް އޮޓޮމޭޓް ކުރުމުގެ މަސައްކަތް ކުރަމުން އަންނަކަމަށް މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާ ބެހޭ ވުޒާރާއިން ވިދާޅުވެއްޖެއެވެ.

މައި އެޑިއު ޕޯޓަލްއަށް ދަރިވަރުން ހުށައަޅާ ފޯމުތައް ޕްރޮސެސްކުރުމުގެ މަސައްކަތް މިހާރުކުރަމުންދަނީ ފޯމުތައް ވަކިވަކިންނެވެ.

މަތީ ތަޢުލީމު ޙާސިލުކުރުމަށް ސަރުކާރުން ދޫކުރާ ލޯން ސްކީމްތައް މެދުވެރިކޮށް ގިނަ ޢަދަދެއްގެ ދަރިވަރުން ތަޢުލީމު ޙާސިލުކުރަމުން އަންނައިރު، އެތައް ދަރިވަރުންނެއް މިއަހަރުވެސް ލޯނަށްވަނީ ހުށައަޅާފައެވެ. މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާ ބެހޭ ވުޒާރާއިން ވިދާޅުވީ، މިއަހަރު މިހާތަނަށް 3201 ދަރިވަރުންނަށް މަތީ ތަޢުލީމުގެ ފުރުސަތު ފަހިކޮށްދީފައިވާކަމަށެވެ. އެކުދިންނާއެކު މިވަގުތުވެސް ބޭރުގެ އެކި ޤައުމުތަކުގައި ކިޔަވަމުންދާ 10،595 ކުދިންގެ ފީތައްވެސް ޕްރޮސެސްކުރުމުގެ މަސައްކަތް މިދުވަސްވަރާ ދިމާކޮށް ކުރަންޖެހޭކަމަށެވެ.

މިހުރިހާ ކުދިންނަށް މިއަހަރުގެ މިހާތަނަށް އެކަނިވެސް 689 މިލިއަން ރުފިޔާ ޕްރޮސެސްކުރުމުގެ މަސައްކަތްކުރުމަށް ބޭނުންވާ ލިޔެކިޔުންތައް ހަމަކޮށް މާލީ ވުޒާރާއަށް ފޮނުވުމުގެ މަސައްކަތްކޮށްފައިވާކަން އެވުޒާރާއިން ފާހަގަކުރައްވައެވެ.

މަތީ ތަޢުލީމާއި ބެހޭ ވުޒާރާގެ ސްޓޭޓް މިނިސްޓަރ ޑރ.ޢަބްދުﷲ ނަޒީރު ވިދާޅުވީ ކޮންމެ އަހަރެއްގެވެސް ވަކި މުއްދަތަކާއި ދިމާކޮށް މަތީ ތަޢުލީމު ޙާސިލުކުރުމަށްޓަކައި ސަރުކާރުން ދޫކުރާ ލޯނު ޕްރޮސެސްވުމުގައި މައްސަލަތަކެއް އުޅޭކަމުގެ ކަންބޮޑުވުން އޮންނަކަމަށެވެ.

"ކުދިންގެ ފީތަކުގެ މަސައްކަތާއި ޕީ ޝެޑިއުލްކުރުމުގެ މަސައްކަތް ކުރަމުން އަޅުގަނޑުމެން ވުޒާރާގެ ކުދިން މެއިލްތަކާއި ފޯނަށްވެސް ޖަވާބުދެމުންދާނީ ހަމަ ވަކިވަކިން. ލޯނު ހަމަޖެއްސުމަށް ކުދިން ހުށައަޅާ ހުރިހާ ފޯމެއް ޕްރޮސެސްކުރުމުގެ މަސައްކަތެއް ކުރަނީ މިހާރު މެނުއަލީ. މިހާރު ހުންނާނީ އޮޓޮމޭޓެޑް ފޯން ލައިނެއް ޤާއިމުކޮށްފައި. ކުދިންނަށް ގުޅޭނެ ލައިން އެންގޭޖްވުމާއި ކެނޑުމުގެ މައްސަލަ ހައްލުވާނެ. އަދި މެސެޖު ފޯރުކުރުމުގެ މައްސަލަ މިއާއެކު ހައްލުވާނެ." ސްޓޭޓް މިނިސްޓަރ ޑރ.ޢަބްދުﷲ ނަޒީރު ވިދާޅުވިއެވެ.

މަތީ ތަޢުލީމާއި ބެހޭ ވުޒާރާއިން ވިދާޅުވީ ކުދިންގެ ލޯނުގެ ކަންކަން ޕްރޮސެސްކުރުމުގެ މަސައްކަތް ލަސްވުމަށް މެދުވެރިވާ މައިގަނޑު ސަބަބަކީ އެމަސައްކަތް ވުޒާރާގެ މުވައްޒަފުން މެނުއަލީ ކުރަންޖެހުމުންކަމަށެވެ.

މީގެކުރިން ލޯނަށް އެދޭ ފޯމުތައް ވުޒާރާއަށް ހާޒިރުވެގެން ހުށައެޅުމަށް އޮތްއޮތުން ނިމުމަކަށްއައީ މައި އެޑިއު ޕޯޓަލްއާއެކުގައިކަމަށާއި، އެޕޯޓަލް އަޕްޑޭޓްކުރުމުގެ މަސައްކަތް މިހާރުކުރަމުން އަންނަކަމަށެވެ. މިމަސައްކަތް ނިމޭއިރު ކުދިންގެ ލޯނު ޕްރޮސެސްކުރުމުގެ މަސައްކަތް މިހާރަށްވުރެ އަވަސްކުރެވޭނެކަމަށް އެވުޒާރާއިން ވިދާޅުވެއެވެ.

"ވޯލްޑް ބޭންކްގެ އެހީގައި މައި އެޑިއު ޕޯޓަލް އެއްކޮށް އޮޓޮމޭޓްކުރުމުގެ މަސައްކަތްދަނީ ކުރަމުން. ޓެންޑަރަށް ހުޅުވާލާ މިކަމަށް ޕާޓީއެއްވެސް މިހާރު ހޮވާފައި އޮތީ. އެހެންވީމަ އަޅުގަނޑު އުއްމީދުކުރަނީ އަހަރެއްހާ ދުވަހުގެ ތެރޭގައި މިމަސައްކަތް އޮޓޮމޭޓްކުރެވޭނެކަމަށް." ޑރ.ޢަބްދުﷲ ނަޒީރު ވިދާޅުވިއެވެ.

ޕޯޓަލް އަޕްގްރޭޑުކުރެވިގެން އަންނައިރު ލައިވް ޗެޓްކުރެވޭނެ އިންތިޒާމު ހަމަޖެހިގެން ދިޔުމާއެކު އެއްފަހަރާ ގިނަ ކުދިން ހަޔަރ އެޑިއުކޭޝަނަށް ކުރާ އީމެއިލްތައް ނުފެނުމުގެ މައްސަލައާއި ކުދިންކުރާ މެއިލްތަކަށް ޖަވާބު ނުލިބުމުގެ މައްސަލައަށްވެސް ހައްލު ލިބޭނެކަމަށް އެވުޒާރާއިން ވިދާޅުވެއެވެ. ހަމައެއާއެކު ލޯނު ދޫކުރުމުގެ މަސައްކަތްކުރާ މުއްދަތުގައި ވުޒާރާގެ މުވައްޒަފުން އުފުލާ ތަކުލީފުތަކާއި ލޯނު ފައިސާ ހަމަޖެހުން ލަސްވުމުގެ ސަބަބުން ދަރިވަރުންނަށް ދިމާވާ މައްސަލަތައްވެސް ހައްލުވާނެކަމަށް މަތީ ތަޢުލީމާ ބެހޭ ވުޒާރާއިން ވިދާޅުވެއެވެ.