އެންމެ ފަހުގެ ބަލޮންޑޯ ހާސިލުކުރި ބޮންމާޓީގެ އެއްބަސްވުން ބާސެލޯނާގެ އަންހެން ޓީމުން އައުކޮށްފި

މިދިޔަ އަހަރުގެ އެންމެ މޮޅު އަންހެން ކުޅުންތެރިޔާއަށްދޭ ބަލޮންޑޯ އެވޯޑް ހާސިލުކުރި ސްޕެއިނުގެ މިޑްފީލްޑަރު އައިޓާނާ ބޮންމާޓީގެ އެއްބަސްވުން ބާސެލޯނާގެ އަންހެން ޓީމުން އައުކޮށްފިއެވެ.

ބޮންމާޓީ، 26، އާއެކު ބާސެލޯނާ ވިމެންސް ޓީމުން ހެދި މި އައު އެއްބަސްވުމުގެ ދަށުން، 2028 ވަނަ އަހަރުގެ ޖޫން މަހުގެ ނިޔަލަށް އެ ޓީމުގައި މަޑުކުރާނެ ކަމަށް އެ ކްލަބުން ބުނެއެވެ.

ބޮންމާޓީގެ އައު އެއްބަސްވުމާއެކު އޭނާ އަކީ މިވަގުތު ދުނިޔޭގައި ހުރި އެންމެ ބޮޑު މުސާރައެއް ލިބޭ އަންހެން ކުޅުންތެރިޔާ ކަމަށް ވެސް ފަހުގެ މީޑިއާ ހަބަރުތައް ބުނެއެވެ.

މިހާތަނަށް ބާސެލޯނާ ވިމެންސް ޓީމަށް 275 މެޗު ކުޅެ، ހުރިހާ މުބާރާތެއްގައި 96 ލަނޑުޖަހައިފައިވާ ބޮންމާޓީ އަކީ އެ ކްލަބުގެ ތާރީޚުގައި އެންމެ ގިނަ ލަނޑުޖެހި އަންހެން ކުޅުންތެރިޔާ އެވެ. މީގެތެރެއިން، ޔުއެފާ ވިމެންސް ޗެމްޕިއަންސް ލީގުގައި މިހާތަނަށް 22 ލަނޑުޖަހައިގެން އަލެކްސިއާ ޕުޓެޔާސް އާއެކު އެ މުބާރާތުގައި ބާސެލޯނާ ވިމެންސް ޓީމަށް އެންމެ ގިނަ ލަނޑުޖެހުމުގެ ރެކޯޑް އޮތީ ވެސް އޭނާ އަތުގައެވެ.

ބާސެލޯނާ ވިމެންސް ޓީމަށް ޔުއެފާ ވިމެންސް ޗެމްޕިއަންސް ލީގުގައި ބޮންމާޓީ ޖަހައިދިން ލަނޑުތަކުގެ ތެރެއިން އެންމެ ފާހަގަކޮށްލެވޭ އެއްގޯލަކީ ނިމިދިޔަ ސީޒަނުގެ މުބާރާތުގެ ފައިނަލްގައި ޖެހި ލަނޑެވެ. އެ މެޗުގައި ބާސެލޯނާ ވިމެންސް ޓީމުން ވަނީ އޮލިމްޕިކް ލިޔޯންގެ ވިމެންސް ޓީމު ބަލިކޮށް، ތިންވަނަ ފަހަރަށް އެ މުބާރާތް ކާމިޔާބުކޮށްފައެވެ. މިއާއެކު، ބޮންމާޓީ ވަނީ މިހާތަނަށް ބާސެލޯނާ އާއެކު މިހާތަނަށް 23 ޓްރޮފީ ކާމިޔާބުކޮށްފައެވެ. އޭނާ އަކީ އެ ކްލަބުގެ ތާރީޚުގައި މިހާތަނަށް އެންމެ ގިނަ ޓްރޮފީ ކާމިޔާބުކުރި ކުޅުންތެރިންގެ ލިސްޓުގެ އަށްވަނައިގައި އޮތް ކުޅުންތެރިޔާ އެވެ.

ސްޕެއިނުގެ ވިމެންސް ގައުމީ ޓީމާއެކު އެންމެ ފަހުގެ ފީފާ ވިމެންސް ވޯލްޑް ކަޕާއި، ޔުއެފާ ވިމެންސް ނޭޝަންސް ލީގު ކާމިޔާބުކޮށްފައިވާ ބޮންމާޓީ ވަނީ އެ ޓީމަށް 65 މެޗު ކުޅެދީފައެވެ.