އިޓާލިއަން ލީގުގައި ރޭ ރަށުން ބޭރުގައި ފަހަތުންއަރައި 2-3 އިން ޕާމާ ބަލިކޮށް، އުދިނޭޒީ އިން ތާވަލްގެ އެއްވަނަ އަށް ޖެހިލައިފިއެވެ.
މިއީ ލީގުގައި އެންމެ ފަހުން ކުޅުނު ތިން މެޗުގެ ތެރެއިން އުދިނޭޒީ މޮޅުވި ތިންވަނަ ފަހަރެވެ. އަދި އުދިނޭޒީ އަކީ މިހާތަނަށްއައިއިރު ލީގުގައި މެޗަކުން ބަލިނުވެ، އޮތް ހަތަރު ޓީމުގެ ތެރެއިން އެއް ޓީމެވެ. އަނެއް ތިން ޓީމަކީ، އެންމެ ފަހުގެ ޗެމްޕިއަން، އިންޓަ މިލާނާއި، ޔުވެންޓަސް އަދި ޓޮރީނޯ އެވެ.
ރޭގެ ނަތީޖާއާއެކު އުދިނޭޒީ އޮތީ މިހާތަނަށް ކުޅުނު ހަތަރު މެޗުން ލިބުނު 10 ޕޮއިންޓާއެކު އެއްވަނައިގައެވެ. އޭގެ އެއްޕޮއިންޓް ފަހަތުން ދެވަނައިގައި ނާޕޮލީ އޮތްއިރު، ތިނެއްގައި އޮތް އިންޓަ އާއި ހަތަރުވަނައިގައި އޮތް ޔުވެންޓަސް އަށް ހަތަރު މެޗުން ލިބިފައިވަނީ 8 ޕޮއިންޓެވެ. އިންޓަ އަށް ކުރިލިބެނީ ޖެހި ގޯލްގެ ތަފާތުންނެވެ.
ޕާމާގެ ސްޓާޑިއޯ އެނިއޯ ޓާޑީނީގައި ރޭ ކުޅުނު މެޗު ފެށިގެން ދެވަނަ މިނެޓުގައި އެ ޓީމުން ވަނީ ލީޑްނަގައިފައެވެ. ޕާމާގެ ފުލްބެކަށް ކުޅެމުން އަންނަ އެންރީކޯ ޑެލް ޕްރާޓޯ މި ލަނޑުޖެހީ އެ ޓީމުގެ ރުމޭނިއާ މިޑްފީލްޑަރު، ވަލެންޓިން މިހާއިލާ ދިން ބޯޅައަކުންނެވެ. އޭގެފަހުން، ފުރަތަމަ ހާފު ނިމެންދަނިކޮށް، އަންގޭ-ޔޯއަން ބޮނީ ކާމިޔާބުކުރި ގޯލާއެކު ޕާމާ އިން ނިންމާލީ 2-0 އިން ކުރީގަ އޮވެގެންނެވެ.
ދެވަނަ ހާފު ފެށިތާ ފަސްވަނަ މިނެޓުގައި އުދިނޭޒީގެ ފޯވާޑް، ލޮރެންޒޯ ލޫކާ ބޮލުން ވައްދާލި ލަނޑުން ފަރަގު ކުޑަކުރިއިރު، އޭގެފަހުން މެޗުގެ 68 ވަނަ މިނެޓުގައި ފްލޯރިއަން ތޯވާންގެ ގޯލުން ނަތީޖާ އެއްވަރުކޮށްފައެވެ.
އުދިނޭޒީ އިން ނަތީޖާ ހަމަހަމަކުރިތާ ފަސްވަރަކަށް މިނެޓުގެ ތެރޭގައި، ޕާމާގެ ބެލްޖިއަމް މިޑްފީލްޑަރު، މަންޑޭލާ ކެއިޓާ އަށް ދެވަނަ ރީނދޫ ކާޑާއެކު ރަތެއް ދެއްކުމުން އެ ޓީމުން ބާކީބައި ފުރިހަމަކުރީ އެއްކުޅުންތެރިއަކު މަދުކޮށެވެ. މިއީ ޕާމާގެ ޖާޒީގައި ކެއިޓާ ކުޅުނު ފުރަތަމަ މެޗެވެ. އޭނާ ކުޅެން ނިކުތީ ފަހު ހާފުގެ ކުރީކޮޅު އެވެ.
މި މެޗުން އުދިނޭޒީ މޮޅުވި ލަނޑު، 77 ވަނަ މިނެޓުގައި ކާމިޔާބުކޮށްދިނީ ތޯވާން އެވެ. ރެފްރީ މި ލަނޑު ބަލައިގަންނަން ނިންމީ ވިއޭއާރް އިން ބެލުމަށްފަހު އެވެ. މިއީ ކުރީން، އިންގްލެންޑްގެ ނިއުކާސަލް ޔުނައިޓެޑާއި ފްރާންސްގެ އޮލިމްޕިކް މާސޭ އަށް ކުޅެފައިވާ ތޯވާން މި ފަހަރުގެ ސީޒަނުގައި އުދިނޭޒީ އަށް ޖަހައިދިން ތިންވަނަ ގޯލެވެ.
ލީގުގައި ރޭ ކުޅުނު އަނެއް މެޗުގައި ލާޒިއޯގެ ދަނޑުގައި އެ ޓީމުން ވަނީ 2-1 އިން ހެލާސް ވެރޯނާ ބަލިކޮށްފައެވެ. މި މެޗުގައި ފެނިގެންދިޔަ ހުރިހާ ގޯލެއް ވެސް ކާމިޔާބުކުރީ ފުރަތަމަ ހާފުގައެވެ. ލާޒިއޯގެ ލަނޑުތައް ޖަހައިދިނީ ބުލާއެ ޑިއާ އާއި ވަލެންޓިން ކަސްޓެޔާނޯސް އެވެ. ވެރޯނާގެ ހަމައެކަނި ލަނޑުޖަހައިދިނީ ކެސްޕާ ޓެންގްސްޓެޓް އެވެ.