ނ.އަތޮޅުގައި މަސްތުވާތަކެތީގެ މައްސަލަ ޙައްލުކުރުމަށް ޚާއްޞަ މަސައްކަތްތަކެއް

މަސްތުވާތަކެތި ބޭނުންކުރާ މީހުންނަށް ފަރުވާދީ، މުޖުތަމަޢުއަށް އަލުން އަނބުރާ އެފަދަ މީހުން ނެރުމަށް ނ.އަތޮޅު ކައުންސިލާއި ނޭޝަނަލް ޑްރަގް އެޖެންސީ ގުޅިގެން ޕްރޮގްރާމެއް ފެށުމަށް ތައްޔާރުވެއްޖެއެވެ.

މި ޕްރޮގްރާމްގެ މަޤުޞަދަކީ އެފަރާތްތަކަށް ބޭނުންވާ ފަރުވާއާއި އަޅާލުން ފޯރުކޮށްދީ، ފައިދާހުރި ބައެއްގެ ގޮތުގައި މުޖުތަމަޢުއާ ގުޅުވައިދިނުމެވެ.

މިކަމުގެ އެއްބަސްވުމުގައި ނެޝަނަލް ޑްރަގް އެޖެންސީގެ ފަރާތުން ސޮއިކުރެއްވީ އެ އިދާރާގެ ސީއީއޯގެ މަސްޢޫލިއްޔާތާ ވަގުތީގޮތުން ހަވާލުވެ ހުންނެވި، ދާޚިލީ ސަލާމަތާ ފަންނިއްޔާތާ ބެހޭ ވުޒާރާގެ ނައިބު މުޙައްމަދު ރާޝިދުއެވެ. އަދި ނ.އަތޮޅު ކައުންސިލްގެ ފަރާތުން ސޮއިކުރެއްވީ ރައީސް މުޙައްމަދު ބަޝީރުއެވެ.

މި އެއްބަސްވުމުގެދަށުން މަސައްކަތްކުރާނީ މަސްތުވާތަކެތި ބޭނުންކުރާ މީހުންނަށް ފަރުވާދީ އެފަދަ މީހުން މުޖުތަމަޢުން މަދުކުރުމާއި މުޖުތަމަޢު ބަލައިގަންނަ ފައިދާހުރި ބައެއްގެ ގޮތުގައި އެފަދަ މީހުން މުޖުތަމާޢުއަށް އަނބުރާ ނެރުމަށެވެ.

މި ޕްރޮގްރާމް ހިންގާނީ އެންޑީއޭއިން ރާވާ ޚާއްސަ ޕްރޮގްރާމެއްގެ ގޮތުގައެވެ. އެގޮތުން ނ. އަތޮޅުގައި މަސްތުވާތަކެތީގެ މައްސަލަ އޮތް މިންވަރު ދެނެގަތުމާއި، މަސްތުވާތަކެތިން ރައްކާތެރިކުރުމާއި ފަރުވާ ބޭނުންވާ ފަރާތްތަކަށް ދޭން އެންމެ އެކަށީގެންވާ ފަރުވާގެ ބާވަތްތައް ދެނެގަތުމަށް "ނީޑް އެންޑް ރެޑިނަސް އެސެސްމަންޓް" ހަދާ މަޢުލޫމާތު އެއްކުރާނެއެވެ.

އެއްބަސްވުމުގެދަށުން، އެސެސްމަންޓްގެ ނަތީޖާއަށް ބަލާ އަތޮޅުގެ ކޮންމެވެސް އެއް ރަށެއްގައި 6 މަސް ދުވަހުގެ ޕައިލެޓް ޕްއޮގްރާމެއް ހިންގާނެއެވެ. މި ޕްރޮގްމްގެތެރެއިން ފަރުވާ ހޯދަމުންދާ މީހުންނަށް ބޭނުންވާ ސިއްޙީ، ޖިސްމާނީ އަދި ނަފްސާނީ އެހީތެރިކަންވެސް ފޯރުކޮށްދޭނެއެވެ.
މީގެއިތުރުން ފަރުވާގެ ޚިދުމަތާ ގުޅެން ބޭނުންވާ މީހުންނަށް ޕްރޮގްރާމްގައި ރެޖިސްޓްރީ ކުރެވޭނެ ނިޒާމެއްގެސް ޤާއިމުކުރާނެއެވެ.

މި އެސްބަވުމުގެދަށުން ޕްރޮގްރާމް ހިންގާ ފަރާތްތަކަށް ބޭނުންވާ ފަންނީ ޤާބިލުމަށް އިތުރުކުރާމާއެކު، މި ޕްރޮގްރާމްގައި ހިލޭ ސާބަހަށް އިސްކޮށް މަސައްކަތް ކުރާނެ ޓީމެއް ތަމްރީންކޮށް އެކުލަވާލާނެއެވެ.

މި ޕްރޮގްރާމުން ފޯރުކޮށްދޭ ޚިދުމަތްތަކުގެ ފައިދާއާއި އަސަރު ވަޒަންކުރުމަށްޓަކައި މޮނިޓަރިންގ އެންޑް އިވެލުއޭޝަން ފްރޭމްވޯކެއް އެކުލަވާލައި ތަންފީޒުކުރާނެއެވެ. އަދި ޚިދުމަތުގެ މަޤްޞަދުތައް ޙާސިލްކޮށްދީ، ރަނގަޅުވަމުން އަންނަ ފަރުދުންގެ ދިރިއުޅުމަށް ހެޔޮ އަސަރުތަކެއް ކުރަމުންދާކަން ކަށަވަރުކުރުމަށް ޤަވާއިދުން މޮނިޓަރިންގ އަދި އިވެލުއޭޝަން ހަރަކާތްތައް ހިންގާނެއެވެ.

މި ޕްރޮގްރާމްގެ މޮނިޓަރިންގ އަދި އިވެލުއޭޝަންގެ އެންމެހާ ކަންތައްތައް ކުރާނީ ނޭޝަނަލް ޑްރަގް އޭޖެންސީންނެވެ.