މިހާރު ކުރިއަށްދާ ޑޭވިސް ކަޕް ޓެނިސް މުބާރާތުގައި އިންގްލަންޑާ ދެކޮޅަށް ކުޅުނު މެޗު ކާމިޔާބުކޮށް، މުބާރާތުގެ ކުއާޓާ ފައިނަލުގެ ޖާގައެއް ކެނެޑާއިން ހޯދައިފިއެވެ.
އިނގިރޭސިވިލާތުގެ މެންޗެސްޓާގައި ކުޅުނު މި މެޗަށް ނިކުތްއިރު، އެންމެ މެޗަކުން ކުރި ހޯދައިގެން އިނގިރޭސިންގެ މައްޗަށް ކުރި ލިބެން ކެނެޑާއަށް އޮތްއިރު, ޑެނިސް ޝަޕޮވަލޯވް ވަނީ ޑޭން އިވާންސްއާ ދެކޮޅަށް ކުޅުނު މެޗު ސީދާ ދެ ސެޓުން ކާމިޔާބުކޮށްފައެވެ. މި ދެ ސެޓް އޭނާ ކާމިޔާބުކޮށްފައިވަނީ 6-0 އަދި 7-5 ގެ ނަތީޖާއަކުންނެވެ.
މީގެ އިތުރުން 2022 ވަނަ އަހަރުގެ ޗެމްޕިއަން ކެނެޑާގެ ފެލިކްސް އޮގާ ވަނީ އިންގްލޭންޑްގެ އެއްވަނަ ކުޅުންތެރިޔާ ޖެކް ޑްރެޕާއާ ދެކޮޅަށް ކުޅުނު މެޗު ވާދަވެރި ކުޅުމަކަށްފަހު 7-6 އަދި 7-5 ގެ ނަތީޖާއަކުން ކާމިޔާބުކޮށް ކެނެޑާއަށް 2-0 ގެ ލީޑެއް ނަގައިދީފައެވެ.
ޑޭވިސް ކަޕްގެ ކުއާޓާ ފައިނަލާއި ސެމީ ފައިނަލުގެ އިތުރުން ފައިނަލް މެޗް ކުޅުމަށް ހަމަޖެހިފައިވާ ސްޕޭނުގެ މަލާގާގައި އަންނަ ނޮވެމްބަރު މަހުގެ 19 އިން 24 އަށެވެ. އަދި މި މެޗުތަކުގެ ގުރުއަތުލުން މި ހަފުތާގައި ކުރިއަށް ގެންދާނެއެވެ.
މި މުބާރާތުގެ ކުއާޓާ ފައިނަލުން ޖާގަ ހޯދާފައިވާ އެހެން ގައުމުތަކުގެ ތެރޭގައި އިޓަލީ އާއި, ނެދަލޭންޑްސް އާއި, ސްޕެއިން އާއި, އޮސްޓްރޭލިއާ އާއި, އެމެރިކާ އާއި, ޖަރުމަންވިލާތް އަދި އާޖެންޓީނާ ހިމެނެއެވެ.