އިޓާލިއަން ލީގުގައި ރޭ ރަށުން ބޭރުގައި ކަލިއާރީ ބަލިކޮށް ނާޕޮލީ އެއްވަނައަށް ޖެހިލިއިރު، މޮންޒާއާ އެއްވަރުވެ އެންމެ ފަހުގެ ޗެމްޕިއަން އިންޓަރ މިލާން ދެވަނައަށް ވެއްޓިއްޖެއެވެ.
ކަލިއާރީގެ ދަނޑުގައި ނާޕޮލީ މޮޅުވީ 0-4 ގެ ނަތީޖާއަކުންނެވެ. އަދި މޮންޒާ އާއި އިންޓަރ ކުޅުނު މެޗު ނިމުނީ 1-1 ގެ ނަތީޖާއަކުން އެއްވަރުވެގެންނެވެ.
މި ނަތީޖާތަކާއެކު ނާޕޮލީ އެއްވަނައިގައި އޮތީ ކުޅުނު ހަތަރު މެޗުން ނުވަ ޕޮއިންޓް ހޯދައިގެންނެވެ. އޭގެ އެއް ޕޮއިންޓް ފަހަތުން ދެވަނައިގައި އިންޓަރ އޮތްއިރު، ތިންވަނައިގައި އޮތް ޔުވެންޓަސް އާއި ހަތަރުވަނައިގައި އޮތް ޓޮރީނޯއަށް ވެސް ވަނީ އެ އަދަދަށް ޕޮއިންޓް ލިބިފައެވެ. އިންޓައަށް ކުރިލިބެނީ ލަނޑުގެ ތަފާތުންނެވެ. މިވަގުތު ތިން މެޗުން ހަތް ޕޮއިންޓާއެކު ފަސްވަނައިގައި އޮތް އުދިނޭޒީއަށް ކުރިއަށް އޮތް މެޗުގައި ޕާމާ ބަލިކޮށްގެން އެއްވަނައަށް އެރޭނެއެވެ.
ރޭގެ މެޗުގައި ނާޕޮލީން ލީޑު ނެގީ ފުރަތަމަ ހާފުގެ 18 ވަނަ މިނެޓުގައި އެ ޓީމުގެ ކެޕްޓަން، ޖިއޮވާނީ ޑި ލޮރެންޒޯ ކާމިޔާބުކުރި ލަނޑުންނެވެ. ޕެނަލްޓީއޭރިޔާ ބޭރުން ޑި ލޮރެންޒޯ ފޮނުވާލި ބޯޅަ ގޯލުގެ ތެރެއަށް ވަނީ ކަލިއާރީގެ ޑިފެންޑަރު، ޔެރީ މިނާގެ ގައިގައި ޖެހިފައެވެ.
މި މެޗުގެ ފުރަތަމަ ހާފުގެ މެދަކާ ހިސާބުން ވަނީ ދެ ޓީމުގެ ސަޕޯޓަރުންގެ މެދުގައި ހިނގި ހަމަނުޖެހުމާ ގުޅިގެން ކުޅުން މެދުކަނޑާލައިފައެވެ. އެއަށްފަހު ކުޅުން އަލުން ކުރިއަށްގެންގޮސްފައިވާއިރު، މި ހާފު ނިމުނީ 1-0 ގެ ނަތީޖާއަކުން ނާޕޮލީ ކުރީގައި އޮވެގެންނެވެ.
މި މެޗުގެ ދެވަނަ ހާފު ފެށިގެން ކަލިއާރީން ކުޅުން ރަނގަޅުކޮށް، ނާޕޮލީގެ ގޯލަށް ފޮނުވާލި ހަމަލާތައް އެ ޓީމުގެ ގޯލްކީޕަރު، އަލެކްސް މެރެޓް ވަނީ ހުއްޓުވައިފައެވެ.
ނާޕޮލީން މި މެޗުގައި ޖެހި ދެވަނަ ލަނޑު، 66 ވަނަ މިނެޓުގައި ބެލްޖިއަމް ފޯވާޑް، ރޮމެލޫ ލުކާކޫ ދިން ބޯޅައަކުން ކާމިޔާބުކޮށްދިނީ ޖޯޖިއާގެ ވިންގް، ކްވިޗާ ޚްވަރަޝްކޭލިއާއެވެ. އަދި އޭގެ ހަތަރު މިނެޓުފަހުން ލުކާކޫ ވަނީ ކަލިއާރީގެ ކުޅުންތެރިންނަށް ހެދުނު ގޯހެއްގެ ފައިދާނަގައި، 3-0 އަށް ނަތީޖާ ބަދަލުކޮށްލާފައެވެ.
އަދި އޭގެ ފަހުން މި މެޗުގެ އިތުރު ވަގުތުގެ ތެރޭގައި ނާޕޮލީގެ ހަތަރުވަނަ ލަނޑު، އިޓަލީގެ ޑިފެންޑަރު، އަލެސެންދްރޯ ބުއޮންޖިއޯނޯ ޖަހައިދިނީ ކޯނަރެއްގެ އެހީގައި ޑޭވިޑް ނެރޭސް ދިން ބޯޅައަކުންނެވެ.
މީގެ އިތުރުން ލީގުގައި ރޭ ކުޅުނު އަނެއް މެޗުގައި މޮންޒާގެ ކައިރީގައި އިންޓައަށް މާއެދެވޭ ކުޅުމެއް ދެއްކިފައެއް ނުވެއެވެ. މި މެޗުގައި ފެނިގެންދިޔަ ހުރިހާ ލަނޑެއްވެސް ކާމިޔާބުކުރީ ފަހު ހާފުގެ އެންމެ ފަހު 10 މިނެޓުގެ ތެރޭގައެވެ. އެގޮތުން، މެޗުގެ 81 ވަނަ މިނެޓުގައި މޮންޒާއިން ލީޑްނެގީ ޑެނީ މޮޓާގެ ލަނޑުންނެވެ. މެޗު ނިމެން ދެ މިނެޓަށްވެފައިވަނިކޮށް، އިންޓައަށް އެއްވަރުކޮށްދިނީ ނެދަލެންޑްސްގެ ވިންގް ބެކް، ޑެންޒެލް ޑަމްފްރީސްއެވެ.