އޮލިމްޕިކްސްގެ ޕެރަ ގޭމްސްގައި ދެ ފަހަރެއްގެ މަތިން ރާއްޖެ ތަމްސީލުކޮށްފައިވާ ފާތުމަތު އިބްރާހީމް (ފާތުން)، އަންހެން ގައިޑް ރަނާއެއް ހޯދަން އަމިއްލަ ފޭސްބުކްގައި އިއުލާން ކޮށްފިއެވެ.
ފާތުން ވަނީ ފްރާންސްގެ ވެރިރަށް ޕެރިހުގައި މި އަހަރު ބޭއްވި ޕެރަލިމްޕިކްސް އާއި ޖަޕާނުގެ ޓޯކިޔޯގައި 2021 ވަނަ އަހަރު ބޭއްވި ޕެރަލިމްޕިކްސްގައިވެސް ވާދަކޮށްފައެވެ. މީގެ ތެރެއިން މި އަހަރުގެ ގޭމްސްގެ އަންހެނުންގެ 100 މީޓަރު ދުވުން 17:10 ސިކުންތުން ނިންމައި، ޕެރަ އިވެންޓުގެ ގައުމީ ރިކޯޑު ފާތުން ވަނީ ގާއިމުކޮށްފައެވެ.
ފޭސްބުކްގައި ޝާއިއުކުރި ޕޯސްޓެއްގައި ފާތުން ބުނެފައިވަނީ ކުރިއަަށް އޮތް އޭނާގެ ބައިނަލްއަގުވާމީ މުބާރާތްތަގައި އެކުގައި ދުވަން، އަންހެން ގައިޑް ރަނާއެއް ބޭނުންވާ ކަމަށެވެ. އަދި އެ މަގާމަށް ހޮވިއްޖެނަމަ ޤައުމީ އެތުލީޓުންނަށް ސަރުކާރުންދޭ 5000 ރުފިޔާގެ އެލަވަންސާއި، އެތުލެޓިކްސްގެ އެހެނިހެން އިނާޔަތްތައް ލިބޭނެ ކަމަށްވެސް ވަނީ ބުނެފައެވެ.
މިހާތަނަށް އައިރު ދެ ފަހަރެއްގެ މަތިން ޕެރަލިމްޕިކްސްގައި ފާތުން ދުވެފައިވާއިރު، އޭނާ ވަނީ މިދިޔަ އަހަރު މަޑަގަސްކަރައިގައި ބޭއްވި އިންޑިއަން އޯޝަން އައިލެންޑް ގޭމްސް (އައިއޯއައިޖީ) ގައިވެސް ރާއްޖެ ތަމްސީލުކޮށް، ލޯ މެޑަލް ހޯދާފައެވެ.