ފުރަތަމަ ހާފުގައި ސްޕެއިނުގެ ޒުވާން ވިންގް ލަމީން ޔަމާލް ކާމިޔާބުކުރި ދެ ލަނޑާއެކު 4-1 ގެ ނަތީޖާއަކުން ޖިރޯނާ ބަލިކޮށް، ސްޕެނިޝް ލީގުގައި ބާސެލޯނާއިން ސައްތައިން ސައްތައިގެ ރިކޯޑު ދަމަހައްޓައިފިއެވެ.
މިއީ ޖިރޯނާއާ ދެކޮޅަށް ލީގުގައި ބާސެލޯނާ އެންމެ ފަހުން ކުޅުނު ތިން މެޗުގެ ތެރެއިން މޮޅުވި ފުރަތަމަ ފަހަރެވެ. ނިމިދިޔަ ސީޒަނުގައި ކުޅުނު އަނެއް ދެ މެޗުން މޮޅުވީ ޖިރޯނާ އެވެ.
ރޭގެ ނަތީޖާއާއެކު ބާސެލޯނާ އިން ވަނީ މިހާތަނަށް ކުޅުނު ފަސް މެޗުން 15 ޕޮއިންޓް ހަމަކޮށްފައެވެ. ދެވަނައިގައި އޮތް ވާދަވެރި ރެއާލް މެޑްރިޑާއި، ތިނެއްގައި އޮތް އެތުލެޓިކޯ މެޑްރިޑްގެ އިތުރުން ހަތަރުވަނައިގައި އޮތް ވިޔަރެއާލަށް ފަސް މެޗުން ލިބިފައިވަނީ 11 ޕޮއިންޓެވެ. ރެއާލާއި އެތުލެޓިކޯ އަށް ކުރިލިބެނީ ފައިދާގޯލްގެ ތަފާތުންނެވެ.
ޖިރޯނާގެ އެސްޓާޑީ މުނިސިޕާލް ޑެ މޮންޓިލީވީގައި ރޭ ކުޅުނު މި މެޗުގައި ބާސެލޯނާ އިން ލީޑްނެގީ 30 ވަނަ މިނެޓުގައި ޔަމާލް ކާމިޔާބުކުރި ގޯލުންނެވެ. މިއީ ޖިރޯނާގެ ޑިފެންޑަރެއްގެ އަތުން ހޯދި ބޯޅައަކުން ޔަމާލް ކާމިޔާބުކުރި ގޯލެކެވެ.
އޭގެ ހަތް މިނެޓުފަހުން، ޔަމާލް، ބާސެލޯނާގެ ދެވަނަ ލަނޑުޖަހައިދިނީ އެ ޓީމުގެ ޕޮލެންޑް ފޯވާޑް، ރޮބަޓް ލެވަންޑޯސްކީ ދިން ބޯޅައަކުންނެވެ. މިއީ މި ފަހަރުގެ ސީޒަނުގެ ލީގުގައި ޔަމާލް ޖެހި ތިންވަނަ ލަނޑެވެ. މި ގޯލާއެކު ފުރަތަމަ ހާފު ނިމުނީ 2-0 އިން ބާސެލޯނާ ކުރީގަ އޮވެގެންނެވެ.
ދެވަނަ ހާފުގެ ކުރީކޮޅު، ޑަނީ އޯލްމޯ ވަނީ ބާސެލޯނާގެ ތިންވަނަ ލަނޑުޖަހައިދީފައެވެ. މެޗުގެ 47 ވަނަ މިނެޓުގައި ވަރަށް ހަނި އޭންގަލަކުން އޯލްމޯ މި ލަނޑުޖެހީ ފްރާންސްގެ ޑިފެންޑަރު، ޖޫލްސް ކޫންޑޭ ދިން ބޯޅައަކުންނެވެ. މިއީ ބާސެލޯނާ އަށް ބަދަލުވި ފަހުން އޭނާ ޖަހައިދިން ތިންވަނަ ގޯލެވެ.
މެޗުގެ 64 ވަނަ މިނެޓުގައި ޕެނަލްޓީއޭރިޔާ ތެރެއިން ފޮނުވާލި ހަމަލާއަކުން ބާސެލޯނާގެ ހަތަރުވަނަ ލަނޑުޖަހައިދިނީ ސްޕެއިނުގެ މިޑްފީލްޑަރު، ޕެޑްރީ އެވެ. އޭގެފަހުން، މެޗު ނިމެން 10 މިނެޓަށްވެފައިވަނިކޮށް ޖިރޯނާގެ ހަމައެކަނި ލަނޑުޖަހައިދިނީ ކްރިސްތިއަން ސްޓުއާނީ އެވެ. އަދި އޭގެފަހުން، މެޗުގެ 87 ވަނަ މިނެޓުގައި ބާސެލޯނާގެ ސްޕެއިން ފޯވާޑް، ފެރާން ޓޮރޭޒަށް ސީދާ ރަތެއް ދެއްކުމުން އެ ޓީމުން ނިންމާލީ 10 ކުޅުންތެރިންނާއެކު އެވެ. ޓޮރޭޒަށް ރަތް ކާޑު ދެއްކީ އިދިކޮޅު ޓީމުގެ ކުޅުންތެރިއަކަށް ކުރި ނުރައްކާތެރި ފައުލަކާ ގުޅިގެންނެވެ.
މި މެޗުގައި ޖެހި ގޯލާއެކު އޯލްމޯ ވަނީ 2011 ވަނަ އަހަރުގެ ފަހުން ލީގުގައި ބާސެލޯނާ އަށް ކުޅެދިން ފުރަތަމަ ތިން މެޗުގައި ލަނޑުޖެހި ފުރަތަމަ ކުޅުންތެރިޔާގެ ޝަރަފު ހޯދާފައެވެ. އެފަހަރުގެ ސީޒަނުގައި ސްޕެއިނުގެ ކުރީގެ މިޑްފީލްޑަރު، ސެސްކް ފަބްރެގާސް ވަނީ ފުރަތަމަ ތިން މެޗުގައި ބާސެލޯނާ އަށް ލަނޑުޖަހައިދީފައެވެ. އޭގެކުރީން، މި ގަރުނުގެ ތެރޭގައި އެ ޓީމަށް ލީގުގައި ކުޅެދިން ފުރަތަމަ ތިން މެޗުގައި ލަނޑުޖެހި ފުރަތަމަ ކުޅުންތެރިއަކީ ސްވިޑެންގެ ކުރީގެ ފޯވާޑް، ޒަލަޓާން އިބްރާހިމޮވިޗް އެވެ. އިބްރާހިމޮވިޗް މި ރެކޯޑް ހެދީ 2009 ގައެވެ.
ލީގުގައި ބާސެލޯނާ އަށް ދެން އޮތީ މި މަހުގެ 22 ވާ އާދީއްތަ ދުވަހު ރަށުން ބޭރުގައި ވިޔަރެއާލްއާ ބައްދަލުކުރާ މެޗެވެ. އޭގެ އެއް ދުވަސް ކުރީން، ރަށުން ބޭރުގައި ޖިރޯނާ ނިކުންނާނީ ވެލެންސިއާ އާ ދެކޮޅަށެވެ.