ބާރުގަދަ ތޫފާން ޔާގީގެ ސަބަބުން ވިއެޓްނާމުން މަރުވި މީހުންގެ ޢަދަދު 254އަށް އުފުލިއްޖެއެވެ. އޭޝިޔާ ބައްރުގެ ސަރަޙައްދުގައި މި އަހަރު އުފެދުނު އެންމެ ބާރުގަދަ އަދި ނުރައްކާތެރި ތޫފާން ކަމުގައިވާ ޔާގީ އެ ޤައުމުގެ ސަރަޙައްދުތަކަށް އަރާފައި ވަނީ ސެޕްޓެންބަރު 7ވަނަ ދުވަހުއެވެ. ތޫފާނާ ގުޅިގެން ކުރި ވިއްސާރައިގައި ފެންބޮޑުވެފައިވާ ސަރަޙައްދުތަކުން ފެންގަނޑު ހިނދެން ފަށާފައިވީ ނަމަވެސް, ތޫފާނާ ގުޅިގެން ހިނގި ހާދިސާތަކުގައި ގެއްލުނު ކަމަށް ބެލެވޭ މީހުން ހޯދުމަށް އަދިވެސް ދަނީ މަސައްކަތް ކުރަމުންނެވެ.
މީގެ ހަފުތާއެއްހާ ދުވަސް ކުރިން ތޫފާން އަރާފައި ވަނީ ވިއެޓްނާމުގެ އިރުއުތުރުގެ ސަރަޙައްދުތަކަށެވެ. ތޫފާނާ ގުޅިގެން ގިނަ ސަރަޙައްދުތަކެއްގައި ފެންބޮޑުވެފައިވާއިރު, ގިނަ ޢަދަދެއްގެ ނުރައްކާތެރި ހާދިސާތައް ހިނގިއެވެ. އޭގެ ތެރޭގައި ބުރިޖުތައް ވެއްޓުމާއި, ބިންގަނޑު ކެނޑުމާއި ކިސަޑު ފޭބުން ފަދަ ހާދިސާތައް ހިމެނެއެވެ. އެ ހާދިސާތަކުގައި އަނިޔާވި މީހުންގެ ޢަދަދު 820އަށް އުފުލިފައިވާއިރު, އަދިވެސް އިތުރު 82 މީހަކު ގެއްލިފައިވާ ކަމަށް އެ ޤައުމުގެ ކާރިސާތަކާ ބެހޭ އިދާރާއިން ހާމަކުރިއެވެ.
އޭގެ ތެރެެއިން 41 މީހުން ގެއްލިފައި ވަނީ އުތުރު ލައޮ ކާއީ ޕުރޮވިންސުގެ ފަރުބަދަމަތީ ސަރަޙައްދެއްގައި އޮންނަ ޚޮންގ އަވަށުގައި ކުއްލިއަކަށް ފެންބޮޑުވެ, 37 ގެއެއް ފެންގަނޑާ އެކު ދަމައިގަތުމާ ގުޅިގެންނެވެ. އެ ހާދިސާގައި އެކަނިވެސް 46 މީހުން މަރުވި ކަމުގައި އެ ޤައުމުގެ ކާރިސާތަކާ ބެހޭ އިދާރާއިން ބުންޏެވެ.
ޚޮންގ އަވަށާ އިންވެގެން އޮތް އެހެން އަވަށެއްގައި ދިރިއުޅޭ 115 މީހަކު ގެއްލިފައިވާ ކަމަށް ރިޕޯޓު ކޮށްފައިވީ ނަމަވެސް, އެ މީހުން ވަނީ ސަލާމަތާއެކު ފެނިފައެވެ. ފެންބޮޑުވާން ފެށުމުން އެ މީހުން ވަނީ ފަރުބަދައިގެ އުސް ހިސާބުތަކަށް ބަދަލުވެ, ރައްކާތެރިކަން ހޯދާފައެވެ. އެ މީހުން ފެނުނީ ދެ ދުވަސް ފަހުންނެވެ. "ކުއްލިއަކަށް ފެންބޮޑުވާން ފެށުމުން އަޅުގަނޑުމެން ރައްކާތެރި ހިސާބުތަކަށް ބަދަލުވީ ކާބޯތަކެތި ވެސް ނުލައި. ގެންދިޔަ މަދު ކާއެތިކޮޅު ކުޑަ ވަގުތުކޮޅެއްގެ ތެރޭގައި ހުސްވި،" އެ އަވަށުގެ ވެރިޔާ ވަންގ ސެޔޮ ޗޫ ބުންޏެވެ.
ކުޑަކުދިންނާ ބެހޭ އދގެ އިދާރާ (ޔުނިސެފު)ން ބުނީ, ފެންބޮޑުވުމާ ގުޅިގެން އެތަކެއް ސަތޭކަ ހާސް ބަޔެއްގެ ގެދޮރު ނެތިފައިވާއިރު, އެ ކަމާ ގުޅިގެން ގިނަ ޢަދަދެއްގެ ކުޑަކުދިން ހާލުގައި ޖެހިފައިވާ ކަމުގައެވެ. އަދި, ސާފު ބޯފެނާއި, ސާފުތާހިރުވާނެ ގޮތެއް, އަދި ޞިއްޙީ ޚިދުމަތްތަކުން އެ ކުދިން މަހުރޫމުވެފައިވާ ކަމުގައި އެ އިދާރާއިން ހާމަކުރިއެވެ.
މީގެ އިތުރުން, ތަޢުލީމާއި, ނަފްސާނީ ފަރުވާއާއި މަދަރުސާތަކުގައި ހިންގާ ކާބޯތަކެތި ފޯރުކޮށްދިނުމުގެ ޕުރޮގުރާމުތަކުން މަހުރޫމުވެފައިވާ ކުޑަކުދިންގެ ޢަދަދު 2 މިލިިޔަނަށް އަރާ ކަމުގައި ވެސް އެ އިދާރާއިން ހާމަކުރިއެވެ. "ގެއްލުންވެފައިވާ މަދަރުސާތަކާއި ދަރިވަރުންގެ ޢަދަދު އެއަށްވުރެ ވެސް އިތުރުވާނެ ކަމަށް ބެލެވޭ،" އެ އިދާރާއިން ނެރުނު ބަޔާނެއްގައި ބުންޏެވެ. އަދި, އެ ކުދިންނާއި އެ ކުދިންގެ ޢާއިލާތަކަށް އެހީތެރިކަން ފޯރުކޮށްދޭން 15 މިލިޔަން އެމެރިކާ ޑޮލަރުގެ އެހީއަށް ބޭނުންވެފައިވާ ކަމުގައި ޔުނިސެފުން ހާމަކުރިއެވެ.
ފެންބޮޑުވުމުގެ އަސަރު ވެރިރަށް ހަނޯއީގެ ރަށްބޭރު ސަރަޙައްދުތަކަށް ވެސް ކުރިއެވެ. އަދި, އެ ރަށުން ދެމޭ ރަތް ކޯރުގެ ފެންގަނޑު ފުރި, ބަންޑުންވުމުގެ ބިރު ހީވިއެވެ. ނަމަވެސް, އެ ކޯރުގެ ފެންގަނޑު މިހާރު ހިނދެން ފަށާފައިވާ ކަމުގައި އޮފިޝަލުން ބުންޏެވެ. އެ ޤައުމުގެ މާލީ ވުޒާރާއިން ބުނީ, ގެދޮރާއި މުދަލަށް ގެއްލުން ލިބިގެން ބަދަލުގެ ގޮތުގައި 285.36 މިލިޔަން އެމެރިކާ ޑޮލަރު ހޯދުމަށް އެދި އެކި ފަރާތްތަކުން އިންޝުއަރެންސް ކުންފުނިތަކަށް ހުށަހަޅާފައިވާ ކަމުގައެވެ.
ތޫފާން ޔާގީގެ އަސަރު ތައިލެންޑުގެ އުތުރުގައިވާ ސަރަޙައްދުތަކަށް ވެސް ކުރިއެވެ. މި ގޮތުން, އެ ޤައުމުގައި އުތުރުގައި އޮންނަ ޗިއަންގ މާއީއާއި ޗިއަންގ ރާއީ ޕުރޮވިންސުގެ ބޮޑު ސަރަޙައްދުތަކެއްގައި ފެންބޮޑުވެފައިވާއިރު, ބިންގަނޑު ކެނޑުމާއި ކިސަޑު ފޭބުމުގެ ހާދިސާތަކުގައި ބޮޑެތި ގެއްލުންތަކެއް ލިބުނެވެ. ތޫފާނާ ގުޅިގެން ހިނގި ހާދިސާތަކުގައި އެ ޤައުމުން 10 މީހުން މަރުވިއެވެ. އަދި, މިޔަންމާގެ ސަރަޙައްދުތަކަށް ތޫފާން ޔާގީ އެރުމާ ގުޅިގެން އެ ޤައުމުން ވެސް 33 މީހުން މަރުވެ, 235,000 މީހުންގެ ގެދޮރު ވަނީ ހަލާކުވެފައެވެ.