ޔޫރޯއަށް ތައްޔާރުކުރާ ބެލްފާސްޓް ސްޓޭޑިއަމް މަރާމާތުކުރުމަށް އެހީތެރިކަން ނުދޭން ނިންމައިފި

2028 ވަނަ އަހަރުގެ ޔޫރަޕިއަން ޗެމްޕިއަންޝިޕަށް ނޯދަން އަޔަލެންޑްގެ ކޭސްމެންޓް ޕާކް އަލުން ތަރައްޤީކުރުމަށް ފައިސާ ނުދޭނެ ކަމަށް އިނގިރޭސިވިލާތުގެ ސަރުކާރުން ބުނެފިއެވެ.

މިހާތަނަށް ދިގުމުއްދަތެއް ވަންދެން ބޭނުންނުކޮށް އޮތް، ބެލްފާސްޓްގެ ހުޅަނގު ފަރާތުގައިވާ މި ސްޓޭޑިއަމްގައި އިންގްލެންޑާއި އަޔަލެންޑުން ގުޅިގެން ބާއްވާ ޔޫރޯ 2028 ގެ 5 މެޗެއް ކުޅެން ހަމަޖެހިފައިވެއެވެ.

ބްރިޓިޝް ސަރަހައްދުގެ ކޮމިއުނިޓީސް މިނިސްޓަރު ގޯޑަން ލަޔަންސްއަށް ފޮނުވި ސިޓީއެއްގައި، ޔޫކޭގެ ނޯދަން އަޔަލެންޑް މިނިސްޓަރު ހިލަރީ ބެން ބުނެފައިވަނީ، ކޭސްމެންޓް ޕާކް ތަރައްޤީކޮށް، އިމާރާތްކުރުމުގެ އަގު 400 މިލިއަން ޕައުންޑް (524.8 މިލިއަން ޑޮލަރު) އަށް އަރާފައިވާ ކަމަށާއި، މުބާރާތް ފެށުމާ ދޭތެރެ އޮތް ވަގުތަށް ބަލާއިރު ނިމޭނެކަމުގެ ޔަގީންކަން ނެތުމުން އިނގިރޭސި ސަރުކާރުން މި މަޝްރޫޢަށް ފައިސާ ނުދޭނެ ކަމަށެވެ.

"އަންދާޒާކުރެވުނު މިންވަރަށް ވުރެ އިމާރާތްކުރުމުގެ އަގު ވަރަށް ބޮޑަށް އިތުރުވެފައިވޭ - 2023 ގެ އޮކްޓޯބަރުގައި ޔޫރޯ 2028 ގެ ބިޑް ކާމިޔާބުކުރިއިރު 180 މިލިއަން ޕައުންޑް އިން 400 މިލިއަން ޕައުންޑަށްވުރެ މައްޗަށް - އަދި މުބާރާތަށް ވަގުތު އޮތް މިންވަރަށް ބަލާއިރު ނިމޭނެކަމުކަމުގެ ޔަގީންކަން ނެތް،" ބެން ބުނެފައިވެއެވެ.

"އެހެންކަމުން، ހިތާމަޔާއެކު ދަންނަވަން. ޔޫރޯ 2028 ގެ މެޗުތައް ބޭއްވުމަށް ކޭސްމެންޓް ޕާކް އިމާރާތްކުރުމަށް ބްރިޓިޝް ސަރުކާރުން ފައިސާ ދިނުމަކީ އެކަށީގެންވާ ކަމެއް ނޫން ކަމަށް ނިންމައިފީމު."

"ޔޫރޯ 2028 ގެ ޕާޓްނަރޝިޕަށް އަޅުގަނޑުމެން ގަބޫލުކުރާ މިންވަރަށް ބަލާއިރު، މިއީ ވަރަށް އުނދަގޫ ނިންމުމެއް. އެކަމަކު މިއީ މިހާރުގެ ހާލަތުގައި ކުރިއަށް ދެވޭނެ ހަމައެކަނި ގޮތް." ބެން ބުންޏެވެ.

މި ނިންމުމާ ގުޅޭގޮތުން، ނޯދަން އަޔަލެންޑްގެ ސަރަހައްދީ ސަރުކާރުގެ އައިރިޝް ނެޝަނަލިސްޓް ލީޑަރު މިޝެލް އޯނީލް ބުނެފައިވަނީ، ޔޫއެފާ ޔޫރޯ 2028 އަށް ވަގުތަށް ނިންމުމަށް ކުރިއަށް ނުދިއުމަށް ނިންމި ނިންމުމަކީ "ވަރަށް ބޮޑަށް ހިތާމަކުރަންޖެހޭ ކަމެއް ކަމަށާއި، އަދި މިއީ އެ ގައުމުގެ ކުޅިވަރުގެ އިތުރުން އިޤްތިޞާދަށް ވެސް ގެއްލުނު ފުރުޞަތެއް" ކަމަށެވެ.