"ފަޒީސް ޙިޖާމާ ތެރަޕީ" ހިންގަނީ ހުއްދަ ނެތި: ސިއްޙަތާބެހޭ ވުޒާރާ
-
ސިއްޙީ ޚިދުމަތުގެ ގޮތުގައި ޤަވާއިދާއި ހިލާފަށް ދިވެހި ބޭހާއި ޙިޖާމާގެ ޚިދުމަތްދޭކަން ދަނީ ފާހަގަވަމުން
"ފަޒީސް ޙިޖާމާ ތެރަޕީ" ޙިޖާމާ ފަރުވާދިނުމުގެ ޚިދުމަތްދެމުންދަނީ ޤަވާއިދާއި ޚިލާފަށްކަމަށާއި، އެހެންކަމުން އެ މަސައްކަތް ހުއްޓާލުމަށް އަންގާފައިވާކަމަށް ސިއްޙަތާބެހޭ ވުޒާރާއިން ވިދާޅުވެއްޖެއެވެ.
ސިއްޙަތާބެހޭ ވުޒާރާއިން ވިދާޅުވީ، "ފަޒީސް ޙިޖާމާ ތެރަޕީ" ހިންގަމުންދަނީ ރަޖިސްޓަރ ނުކޮށް އޮޕަރޭޓިން ލައިސެންސްވެސް ނެތިކަމަށެވެ. އެހެންކަމުން އެ ޚިދުމަތް ދިނުމަށް ބޭނުންވާ ކަންކަން ފުރިހަމަވަންދެން އެޚިދުމަތް ދިނުން ހުއްޓާލުމަށް އޭނާއަށް އަންގާފައިވާނެކަމަށް އެ ވުޒާރާއިން ވިދާޅުވެއެވެ.
ސިއްހަތާބެހޭ ވުޒާރާއިން ވިދާޅުވީ "ފަޒީސް ޙިޖާމާ ތެރަޕީ"ގެ ފަރާތުން ސޯޝަލް މީޑިއާގައި އިޝްތިހާރުކުރަމުންދަނީވެސް ހުއްދަ ނުހޯދާ ކޮށްފައިވާކަމަކަށްވާތީ އެއިޝްތިހާރުތައް ނެގުމަށްވެސް އަންގާފައިވާކަމަށެވެ. އަދި ބަލި މީހުންގެ މެޑިކަލް ރިޕޯޓުތައް ސޯޝަލް މީޑިއާގައި ހާމަކުރަމުންދާތީ އެފަދަ ރިޕޯޓުތައްވެސް ނެގުމަށް ވުޒާރާއިން ވަނީ އަންގާފައެވެ.
ސިއްހަތާބެހޭ ވުޒާރާއިން ވިދާޅުވީ "ފަޒީސް ޙިޖާމާ ތެރަޕީ"ގެ ޚިދުމަތްދެމުންދާ ފަޒީލާ އުޘްމާނާ ބައްދަލުކޮށް ނަސޭޙަތްތެރިވެފައިވާކަމަށާއި އަދި އެޚިދުމަތް ރަޖިސްޓަރކޮށް ގަވާއިދުން ކުރުމުގެ ފުރުސަތުވެސް ދީފައިވާކަމަށެވެ. އެހެންނަމަވެސް ޤާނޫނުތަކާއި ގަވާއިދާ ޚިލާފަށް އޭނާ އެމަސައްކަތްކުރާނަމަ ކަމާބެހޭ ފަރާތްތަކާއި ގުޅިގެން އެތަން ބަންދުކުރާނެކަމަށް ސިއްޙަތާ ބެހޭ ވުޒާރާއިން ވިދާޅުވެއެވެ.
ސިއްހަތާބެހޭ ވުޒާރާއިން ވިދާޅުވީ އެ ހިދުމަތް ހުއްޓާލުމަށް 2019 ވަނަ އަހަރުވެސް އަދި 2022 ވަނަ އަހަރުވެސް އަންގާފައިވާކަމަށެވެ.
#UnregisteredHealthServices pic.twitter.com/YU2N4ZykqH
— Ministry of Health (@MoHmv) September 11, 2024
ރަޖިސްޓަރނުކޮށް އަދި ޚިދުމަތް ދިނުމުގެ ލައިސެންސް ނެތި ސިއްޙީ ޚިދުމަތް ބައެއް ފަރާތްތަކުން ދެމުންދާކަން ފާހަގަކުރެވިފައިވާކަމަށާއި އެފަދައިން ޚިދުމަތްދޭ ފަރާތްތަކާ މެދު ފިޔަވަޅު އަޅާނެކަމަށް ސިއްޙަތާ ބެހޭ ވުޒާރާއިން ވިދާޅުވެއެވެ.
މާލެ ސަރަޙައްދުގައި ގަވާއިދާ ޚިލާފަށް ސިއްޙީ ޚިދުމަތް ދެމުންދާކަން ފާހަގަވަމުންދާތީ އެކަން އެގޮތަށް ނުކުރުމަށް ސިއްޙަތާ ބެހޭ ވުޒާރާއިންވަނީ އާއްމުކޮށް ޢިއުލާންކޮށްފައެވެ. ސިއްޙީ ޚިދުމަތްދޭ ތަންތަން ހިންގުމާބެހޭ ގަވާއިދާ ޚިލާފަށް، ޚާއްސަކޮށް ދިވެހި ބޭސްވެރިކަމުގެ ގޮތުގައި ބައެއް ފަރާތްތަކުން ހެލްތު މިނިސްޓްރީގައި ރަޖިސްޓަރ ނުކޮށް އަދި ސިއްޙީ ޚިދުމަތް ދިނުމުގެ ލައިސެންސް ނެތި، ޚިދުމަތް ދެމުންދާކަން ފާހަގަކުރެވިފައިވާކަމަށް އެވުޒާރާއިން ވިދާޅުވެއެވެ. އެހެންކަމުން އެގޮތަށް ޢަމަލުކުރުމަކީ ޤާނޫނީ ކުށެއްކަމަށާއި، އެފަދައިން ޢަމަލުކުރަމުންދާ ފަރާތްތަކާއެކު ފިޔަވަޅު އަޅާނެކަމަށް ސިއްޙަތާ ބެހޭ ވުޒާރާއިން ވިދާޅުވެއެވެ.