މި އަހަރުގެ މިހާތަނަށް ސަރުކާރުން ކުޅިވަރު ކުރިއެރުވުމަށް ކޮށްފައިވާ މަސައްކަތްތަކުގެ ތެރެއިން، ފާއިތުވި ނުވަ މަސް ދުވަހުގެ ތެރޭގައި 127 މިލިޔަން ރުފިޔާ ޕީީއެސްއައިޕީ މަޝްރޫއުތަކަށް ޚަރަދުކޮށްފައިވާ ކަމަށް ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވިދާޅުވެއްޖެއެވެ.
ސަރުކާރުގެ ކުޅިވަރު މެނިފެސްޓޯގައި ހިމެނޭ ކަންކަމުގެ އެންމެ ފަހުގެ މައުލޫމާތުތައް ހާމަކުރުމަށް ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި މި ސަރުކާރުން ކުޅިވަރު ކުރިއެރުވުމަށް ކުރަމުންދާ މަސައްކަތްތަކުގެ ތަފްސީލް ވަނީ ހާމަކޮށްދެއްވާފައެވެ.
މިދިޔަ އަހަރު ސަރުކާރުން ޕީއެސްއައިޕީ މަޝްރޫއުތަކަށް ހަރަދުކުރީ 123 މިލިއަން ރުފިޔާއެވެ. އެހެންކަމުން މިއީ މިދިޔަ އަހަރާ ބަލާއިރު ހަތަރު މިލިއަން ރުފިޔާގެ އިތުރުވުމެކެވެ. މީގެ އިތުރުން މިއަހަރުގެ ޖެނުއަރީން ފެށިގެން ކުޅިވަރާ ގުޅުންހުރި މަޝްރޫއުތަކަށް ޖުމްލަ 118 މިލިއަން ރުފިޔާ ހަރަދުކޮށްފައިވާ ކަމަށް ވަޒީރު ވަނީ ވިދާޅުވެފައެވެ. ހަރަދުކޮށްފައިވާ މަޝްރޫއުތަކުގެ ތެރޭގައި ފުޓުބޯޅަ ދަނޑުތަކާއި، ވޮލީ ކޯޓުތަކާއި، ފުޓްސަލް ދަނޑުތަކާއި، އައުންޑޯ ވޮލީ ކޯޓުތައް ހިމެނެއެވެ.
މިވަގުތު ރާއްޖޭގެ އެކި ކަންކޮޅުތަކުގައި 264 މަޝްރޫއު ކުރިއަށްދާ ކަމަށްވެސް ވަޒީރު ވިދާޅުވިއެވެ. މީގެ ތެރެއިން މި ސަރުކާރުން އެންމެ ބޮޑު އިސްކަމެއް ދިނީ ރާއްޖޭގެ އެކި ސަރަހައްދުތަކުގެ ޒޯން ސްޓޭޑިއަމްތަކުގެ ހާލަތު ރަނގަޅުކުރުމަށްކަމަށް ވަޒީރު ވިދާޅުވިއެވެ. އެގޮތުން ހިތަދޫ ޒޯން ސްޓޭޑިއަމް މަރާމާތުކުރުމުގެ މަސައްކަތް ވަނީ ނިންމާލާފައެވެ. އަދި ކުޅުދުއްފުށީ ޒޯން ސްޓޭޑިއަމް މަރާމާތުކުރުމުގެ ފޭސް އެކެއްގެ މަސައްކަތް ވަނީ ނިންމާލާފައެވެ. އެގޮތުން މި މަސައްކަތްތަކަށް ޖުމްލަ 1.2 މިލިއަން ރުފިޔާ ވަނީ ހަރަދުކޮށްފައެވެ. އަދި ތިނަދޫ ޒޯން ސްޓޭޑިއަމް މަރާމާތުކުރުމުގެ މަސައްކަތް 9 ލައްކަ ރުފިޔާއަށް ވަނީ ކުރިއަށްގެންގޮސްފައެވެ.
ސަރުކާރުގެ އެންމެ ބޮޑު ޗެލެންޖެއްގެ ގޮތުގައި ފާހަގަކުރީ މާލޭގައި ކުރިއަށްދިޔަ ފުޓުބޯޅަ މުބާރާތްތައް ކުރިއަށްގެންދެވޭނެ ގޮތެއް ހޯދުމަށެވެ. އޭގެ ތެރޭގައި ގަލޮޅު ފުޓުބޯޅަ ދަނޑުގެ ލައިޓް މަރާމާތުކުރުމުގެ މަސައްކަތަށް ޖުމްލަ ހަތަރު މިލިއަން ރުފިޔާ ވަނީ ހަރަދުކޮށްފައެވެ. މިއަހަރުގެ މިހާތަނަށް ބައިނަލްއަގްވާމީ 10 ކުޅިވަރު މުބާރާތެއް ރާއްޖޭގައި ބާއްވާފައިވާއިރު މިއަހަރުގެ ކުރިއަށްއޮތް ތަނުގައި އިތުރު 6 މުބާރާތެއް ބޭއްވުމަށް ތާވަލުކޮށްފައިވާ ކަމަށްވެސް ވަޒީރު ވިދާޅުވިއެވެ.
ގައުމީ އެތުލީޓުންނާއި ކުޅުންތެރިން އަދި އޮފިޝަލުންނަށް މުސާރަ ދިނުމުގެ އުސޫލު ބަދަލުކުރުމުގެ މަސައްކަތް ގައުމީ މަޖިލީހުން ކުރިއަށްގެންދާ ކަމަށްވެސް ވަޒީރު ވަނީ ވިދާޅުވެފައެވެ. އަދި އެތުލީޓުންގެ އިންޝުއަރެންސް ފައިސާ 2025 ގެ ބަޖެޓަށް ހުށައަޅާފައިވާ ކަމަށްވެސް ކުޅިވަރާބެހެ ވަޒީރު ޢަބްދުﷲ ރާފިޢު ވިދާޅުވެފައެވެ.