ޔުއެފާ ނޭޝަންސް ލީގުގައި އަމިއްލަ ދަނޑުގައި އޮސްޓްރިއާ އަތުން 1-2 ގެ ނަތީޖާއަކުން ނޯވޭ މޮޅުވިއިރު، އެ ޓީމުގެ ކެޕްޓަން މާޓިން އޮޑެގާޑަށް އަނިޔާވެއްޖެއެވެ.
މިއީ މި ފަހަރުގެ ނޭޝަންސް ލީގުގައި ނޯވޭ މޮޅުވި ފުރަތަމަ މެޗެވެ. އެ ޓީމުން މިދިޔަ ހުކުރު ދުވަހު ރަށުން ބޭރުގައި ކަޒަކިސްތާނާ ވަނީ ލަނޑެއްނުޖެހި އެއްވަރުވެފައެވެ.
މި ނަތީޖާއާއެކު، ނޯވޭ ވަނީ ނޭޝަންސް ލީގުގެ ބީގެ ތިންވަނަ ގްރޫޕުގެ ދެވަނައަށް ޖެހިލައިފައެވެ. މިހާތަނަށް ކޮންމެ ޓީމަކުން ދެ މެޗު ކުޅުނުއިރު، އެއްވަނައިގައި އުޅޭ ސްލޮވީނިއާ އާއި ދެވަނައިގައި އޮތް ނޯވޭ އަށް ލިބިފައިވަނީ ހަތަރު ޕޮއިންޓެވެ. ސްލޮވީނިއާ އަށް ކުރިލިބެނީ ފައިދާ ގޯލްގެ ތަފާތުންނެވެ. ތިންވަނައިގައި އޮތް އޮސްޓްރިއާ އާއި ފުލުގައި އޮތް ކަޒަކިސްތާނަށް ލިބިފައިވަނީ އެއް ޕޮއިންޓެވެ.
އޮސްލޯގައި ހުންނަ އުލެވާލް ސްޓޭޑިއޯންގައި ރޭ ކުޅުނު މި މެޗު ފެށިގެން ނުވަވަނަ މިނެޓުގައި ނޯވޭ އިން ލީޑްނެގީ ފެލިކްސް މީހްރެ އެވެ. މިއީ އަވަސް އެޓޭކެއްގައި އެ ޓީމުގެ ފޯވާޑް، އަލެކްސެންޑާ ސޯލޯތު ދިން ބޯޅައަކުން ފެލިކްސް މީހްރެ ކާމިޔާބުކުރި ގޯލެކެވެ.
އޮސްޓްރިއާ އިން އެއްވަރުކުރި ލަނޑު، ފުރަތަމަ ހާފުގެ 37 ވަނަ މިނެޓުގައި ކާމިޔާބުކޮށްދިނީ އެ ޓީމުގެ ކެޕްޓަން، މާސެލް ސަބިޓްޒާ އެވެ. މިއާއެކު، މެޗުގެ ފުރަތަމަ ހާފު ނިމުނީ 1-1 އިން ދެ ޓީމު އެއްވަރުވެގެންނެވެ.
މެޗުގެ 67 ވަނަ މިނެޓުގައި ނޯވޭ އާއި އިނގިރޭސި ކްލަބު، އާސެނަލްގެ ކެޕްޓަންކަން ކުރަމުންއަންނަ އޮޑެގާޑްގެ ފައިގެ ކުޑަހުޅަށް ލިބުނު އަނިޔާއެއްގެ ސަބަބުން ވަނީ ބަދަލުކޮށްފައެވެ. އޭނާ ދަނޑުން ފައިބައިގެންދިޔައީ މެޑިކަލް ޓީމުގެ އޮފިޝަލުންގެ އެހީތެރިކަމާއެކު އެވެ.
ނޯވޭ މޮޅުވި ލަނޑު، 80 ވަނަ މިނެޓުގައި ކާމިޔާބުކޮށްދިނީ މެންޗެސްޓާ ސިޓީގެ ފޯވާޑް، އާލިން ބްރައުޓް ހާލަންޑް އެވެ. އޭނާ މި ލަނޑުޖެހީ ޖޮސްޓެއިން ގުންޑާސަން ދިން ބޯޅައަކުންނެވެ. މިއީ އެންމެ ފަހުން ކަޒަކިސްތާނާ ދެކޮޅަށް ކުޅުނު މެޗުގައި އެދެވޭ ކުޅުމެއް ނުދެއްކުމުގެ ސަބަބުން ގިނަ ބައެއްގެ ފާޑުކިޔުންތައް އަމާޒުވި ހާލަންޑް ގައުމީ ޓީމަށް ކުޅުނު 35 މެޗުގައި ޖެހި 32 ވަނަ ގޯލެވެ.
މި ގްރޫޕުގެ އަނެއް މެޗުގައި ސްލޮވީނިއާގެ ދަނޑުގައި އެ ޓީމުން ވަނީ 3-0 އިން ކަޒަކިސްތާން ބަލިކޮށްފައެވެ. މި މެޗުގައި ސްލޮވީނިއާ އިން ޖެހި ތިން ލަނޑުވެސް ކާމިޔާބުކުރީ އާރްބީ ލީޕްޒިގުގެ ފޯވާޑް، ބެންޖަމިން ސެޝްކޯ އެވެ.
މި މުބާރާތުގައި ރޭ ކުޅުނު އެހެން މެޗުތަކަށް ބަލާއިރު، ތުރްކިޔޭގެ ދަނޑުގައި އެ ޓީމުން ވަނީ 3-1 އިން އައިސްލެންޑް އަތުން މޮޅުވެފައެވެ. މި މެޗުގައި އެ ޓީމުން ޖެހި ތިންލަނޑުވެސް ކާމިޔާބުކޮށްދިނީ ބެންފީކާގެ ވިންގް، ކެރެމް އަކްތަކޮގްލޫ އެވެ. އައިސްލެންޑްގެ ހަމައެކަނި ލަނޑުޖަހައިދިނީ ވިކްޓާ ޕައެލްސަން އެވެ.
ވޭލްސް އިން ރަށުން ބޭރުގައި މޮންޓެނީގްރޯ އަތުން މޮޅުވީ 2-1 އިންނެވެ. މި މެޗު ފެށިގެން ފުރަތަމަ ތިން މިނެޓުގެ ތެރޭގައި ވޭލްސް އިން ވަނީ ދެލަނޑުގެ ލީޑެއްނަގައިފައެވެ. އެ ޓިމަށް މި ލަނޑުތައް ޖަހައިދިނީ ކީފާ މޫރ އާއި ހެރީ ވިލްސަން އެވެ. ފަހު ހާފުގައި މޮންޓެނީގްރޯ އަށް ސުން ކަނޑުވާލައިދިނީ ޑްރިޓަން ކަމާޖް އެވެ.