މެލޭޝިޔާގައި މިހާރުކުރިޔަށްދާ "ޕަރމާޓާއިންޓަރނޭޝަނަލް ކޮންފަރެންސް، ޗިލްޑްރަން ބިޔޯންޑް ޓުމޯރޯ" ކޮންފަރެންސްގައި ރައީސުލްޖުމްހޫރިއްޔާގެ އަނބިކަނބަލުން ފާޠިމަތު އިބްރާހިމް ތަޤްރީރު ކުރައްވައިފިއެވެ.
އެކަމަނާގެ ތަޤްރީރުގައި ޤަައުމެއްގެ މުސްތަޤްބަލް ހެޔޮގޮތުގައި ބިނާކުރުމަށް މިއަދުގެ ކުޑަކުދިންނަށް ފެންވަރު ރަނގަޅު ތަޢުުލީމް ލިބިދިނުމުގެ މުހިންމު ކަމުގެ މައްޗަށް އަލިއަޅުއްވާލައްވާފައިވެއެވެ. ރާއްޖޭގެ ތަޢުލީމީ ނިޒާމް ރޭވިފައިވާ ގޮތުގެ މަޢުލޫމާތު ކޮންފަރެންސްގެ ބައިވެރިންނާ ޙިއްސާ ކުރައްވަމުން، އެކަމަނާ ވަނީ، އެއްވެސް ކުއްޖަކު ބާކީނުކުރުމުގެ ސިޔާސަތުގެ ދަށުން، ނުކުޅެދުންތެރިކަން ހުންނަ ކުދިވެސް ހިމެނޭގޮތަށް ރާއްޖޭގެ ހުރިހާކުދިންނަށްވެސް ތަޢުލީމް ފޯރުކޮށް ދެވެމުންދާކަން ފާހަގަކުރައްވާފައެވެ. އަދި މިއަދުގެ ކުޑަކުދިންނަކީ އަމާން ތަނަވަސް މުސްތަޤްބަލަކަށް އަޅުގަޑުމެންކުރާ އުންމީދު ހަގީގަތަކަށްހަދާދޭނެ ފަރާތްތަކެއްކަމަށް ވިދާޅުވިއެވެ.
ޤައުމީ އަދި ބައިނަލްއަޤްވާމީ ފެންވަރެއްގައިކުޑަކުދިންނަށް ވަކި ޝަރުތެއްނެތި ލޯތްބާއި އޯގާތެރިކަމާ އަޅާލުންދީ،އެކުދިންނަކީ ޤައުމާ ވަޒަންދެކެ ލޯބިވާ ބޭނުންތެރި ބަޔަކަށް ހެދުމަށް މަސައްކަތް ކުރުމަށްގޮވާލެއްވިއެވެ.
ޕަރމާޓާ ކޮންފަރެންސަކީ މިއަދުގެ ކުޑަކުދިންގެހާލަތު ރަގަޅުކޮށް، މާދަމާގެ އިންސާނީ ޖީލު ރަގަޅުކުމަށް ކުރެވޭ މަސައްކަތުގެ ދަށުން ބޭއްވޭ ކޮންފަރެންސެކެވެ. އެކަމަނާވަނީ މިފަދަ މުހިންމު ކޮންފަރެންސެއް އިންތިޒާމް ކުރެއްވި ކަމަށްޓަކައި މެލެޝިޔާގެ ބޮޑުވަޒީރުގެ އަނބިކަބަލުން ރޮސްމާ މަންސޫރު އަށް ޝުކުރު އަދާ ކުރައްވާފައެވެ.
މި ކޮންފަރެންސްގައި ކުޑަކުދިންނާ ގުޅުންހުރި ތަފާތު ދާއިރާތަކުން މެމްބަރުން ބައިވެރިވެއެވެ. މިގޮތުން އިލްމީ ބޭފުޅުންނާ ރިސަރޗްކުރާ ފަރާތްތަކާ، ސަރުކާރު ތަކުގެ އިސް މަސްއޫލުވެރިންނާ، ޓީޗަރުން އަދި އެންޖީއޯތައްވެސް ހިމެނެއެވެ.