އިންޑިއާއާއި ރާއްޖެއާ ދެމެދު އޮތް އަސްކަރީ ގުޅުން ބަދަހިކުރުމާއި ގުޅޭގޮތުން މަޝްވަރާކުރައްވައިފި

އިންޑިއާއާއި ރާއްޖެއާ ދެމެދު އޮތް އަސްކަރީ ގުޅުން ބަދަހިކުރުމާއި ގުޅޭގޮތުން މަޝްވަރާކުރައްވައިފިއެވެ.

މި މަޝްވަރާތައް ބާއްވާފައި ވަނީ އިންޑިއާގެ ނިއުދިއްލީގައި ބޭއްވި 5 ވަނަ "އިންޑިއާ-މޯލްޑިވްސް ޑިފެންސް ކޯޕަރޭޝަން ޑައިލޮގް" ގައި ބައިވެރިވެވަޑައިގަތުމަށް ޗީފް އޮފް ޑިފެންސް ފޯސް، މޭޖަރ ޖެނެރަލް އިބްރާހީމް ޙިލްމީ އިންޑިޔާއަށް ކުރެއްވި ރަސްމީ ދަތުރުފުޅުގައެވެ.

ސެޕްޓެންބަރު 6 ވަނަ ދުވަހު ފެށި އިންޑިއާ-މޯލްޑިވްސް ޑިފެންސް ކޯޕަރޭޝަން ޑައިލޮގްގައި ބައިވެރިވެވަޑައިގެންނެވި އެމްއެންޑީއެފްގެ ވަފުދުގައި އިސްކޮށް ހުންނެވީ، ޗީފް ޑިފެންސް ފޯސް، މޭޖަރ ޖެނެރަލް އިބްރާހީމް ޙިލްމީއެވެ. އަދި އިންޑިއާ ވަފުދުގެ އެންމެ އިސްވެރިޔަކަށް ހުންނެވީ އިންޑިއާގެ ޑިފެންސް ސެކްރެޓަރީ، ޝްރީ ގިރިދަރު އަރަމަނޭއެވެ.

ޗީފް އޮފް ޑިފެންސް ފޯސްގެ މި ދަތުރުފުޅުގައި، އިންޑިއާގެ ޗީފް އޮފް ޑިފެންސް ސްޓާފް، ޖެނެރަލް އަނިލް ޗޯހާންއާއި، ޗީފް އޮފް ދަ އާމީ ސްޓާފް، ޖެނެރަލް އުޕެންދުރަ ދުވިވެދީގެ އިތުރުން، ޗީފް އޮފް ނޭވަލް ސްޓާފް، އެޑްމިރަލް ދިނޭޝް ކޭ. ތުރިޕާތީ، އަދި އިންޑިއަން ކޯސްޓްގާޑްގެ އެޑިޝަނަލް ޑައިރެކްޓަރ ޖެނެރަލް، އެސް. ޕަރަމޭޝްއާ ބައްދަލު ކުރައްވައި، ދެ ޤައުމުގެ ދެމެދުގައި އޮތް އަސްކަރީ ބަދަހި ގުޅުމާއި، މި ސަރަހައްދުގެ ސަލާމަތާއި ރައްކާތެރިކަމާ ގުޅޭގޮތުން މަޝްވަރާ ކުރެއްވެވިއެވެ. މީގެ އިތުރުން މި ޑައިލޮގްގެ ހަވާސާގައި، ޗީފް އޮފް ޑިފެންސް ފޯސް ވަނީ އިންޑިއާގައި ޤާއިމުކުރެވިފައިވާ އިނފޮމޭޝަން ފިއުޝަން ސެންޓަރ – އިންޑިއަން އޯޝަން ރީޖަން އަށް ޒިޔާރަތްކުރައްވައި އެތަނުގައި ކުރެވޭ މުހިންމު މަސއްކަތްތައް ބައްލަވާލައްވާފައެވެ.

އިންޑިއާ-މޯލްޑިވްސް ޑިފެންސް ކޯޕަރޭޝަން ޑައިލޮގްގައި، އިންޑިއާއާއި ދިވެހިރާއްޖެއާ ދެމެދު ދިފާޢީ ގުޅުން އިތުރަށް ބަދަހިކޮށް، ދިފާޢީ ދާއިރާއިން އެއްބާރުލުން އިތުރު ކުރުމަށާއި، ތަމްރީނާއި އުނގެނުމުގެ ދާއިރާއާ ބެހޭގޮތުންނާއި، މަޢުލޫމާތު ހިއްސާކުރުމުގައި އެއްބާރުލުން އިތުރުކުރުމާއި، ސަރަހައްދުގެ ކަނޑުގެ ސަލާމަތާ ރައްކާތެރިކަން އިތުރު ކުރުމާ ގުޅޭގޮތުން ވެސް މި ޑައިލޮގްގައި މަޝްވަރާކުރައްވާފައިވެއެވެ.

5 ވަނަ އިންޑިއާ - މޯލްޑިވްސް ޑިފެންސް ކޯޕަރޭޝަން ޑައިލޮގްގައި ޗީފް އޮފް ޑިފެންސް ފޯސްގެ އިތުރުން އެމްއެންޑީއެފްގެ ވަފުދުގައި ބައިވެރިވެވަޑައިގެންނެވީ، މެރިން ކޯރގެ ކޮމަޑާންޓް، ބްރިގޭޑިއަރ ޖެނެރަލް ޢަބްދުﷲ ޒުޙުރީއާއި، ދިވެހިރާއްޖެއިން އިންޑިއާއަށް ކަނޑައަޅުއްވާފައި ހުންނަވާ ޑިފެންސް އެޑްވައިޒަރ، ބްރިގޭޑިއަރ ޖެނެރަލް މުޙައްމަދު އިބްރާހީމްއާއި، ސަރވިސް ކޯރގެ ކޮމަޑާންޓް، ބްރިގޭޑިއަރ ޖެނެރަލް ޙުސައިން އިބްރާހީމްއާއި، ކޯސްޓްގާޑްގެ ކޮމަޑާންޓް، ބްރިގޭޑިއަރ ޖެނެރަލް މުޙައްމަދު ސަލީމްއާއި، ނޭޝަނަލް ކައުންޓާރ ޓެރަރިޒަމް ސެންޓަރގެ ޑައިރެކްޓަރ، ކާނަލް އަމާނުﷲ އަޙްމަދު ރަޝީދުގެ އިތުރުން ޑައިރެކްޓްރޭޓް އޮފް ޕްލޭންސް ޕޮލިސީ އެންޑް ރިސޯސް މެނެޖްމެންޓްގެ ޕްރިންސިޕަލް ޑައިރެކްޓަ، ކާނަލް އަޙުމަދު މުޖުތަބާ މުޙަމަދެވެ.

ޗީފް އޮފް ޑިފެންސް ފޯސް މޭޖަރ ޖެނެރަލް އިބްރާހީމް ހިލްމީ އިންޑިއާއަށް ކުރެއްވި ރަސްމީ ދަތުރުފުޅު ނިންމަވާލެއްވުމަށްފަހު މާލެ ވަޑައިގެންނެވީ މިދިޔަ އާދީއްތަ ދުވަހުއެވެ..