އެތުލެޓިކްސް އެސޯސިއޭޝަން އޮފް މޯލްޑިވްސްއިން އިންތިޒާމުކޮށްގެން ބާއްވާ 33 ވަނަ ގައުމީ އެތުލެޓިކްސް ޗެމްޕިއަންޝިޕުގައި ވާދަކޮށް، އަންހެނުންގެ ލޯންގް ޖަމްޕުގެ ގައުމީ ރިކޯޑު އައްޑޫ އެތުލެޓިކްސްގެ އައިޝަތު ޝައިމް އަޒީޒް މުގުރާލައިފިއެވެ.
ޝައިމް މި ރިކޯޑު މުގުރާލީ މިއަދު ހެނދުނު ކުރިއަށްދިޔަ އިވެންޓުގައި 5.20 މީޓަރު ދުރަށް ފުންމައިގެންނެވެ. މީގެ ކުރިން މި ރިކޯޑު އޮތީ މަރިޔަމް ރޫޔާ އަލީގެ އަތުގައެވެ. އެއީ މީގެ ދެ އަހަރު ކުރިން ބޭއްވި ގައުމީ ގްރޯން ޕްރީ މުބާރާތުގައި 5.19 މީޓަރު ދުރަށް ފުންމައިގެންނެވެ. ރޫޔާގެ ރިކޯޑު ޝައިމް މުގުރާލިއިރު، އޭނާ ވަނީ މިދިޔަ އަހަރުގެ އިންޓަރ ސްކޫލް އެތުލެޓިކްސް މީޓުގެ 19 އަހަރުން ދަށުގެ އަންހެން ހައި ޖަމްޕް އިވެންޓުގައި ވާދަކޮށް، އެ ރިކޯޑު މުގުރާލާފައެވެ.
މާލޭ އެކުވެނި ސިންތެޓިކް ޓްރެކުގައި ކުރިއަށްދާ ގައުމީ މުބާރާތުގެ އަންހެން ލޯންގް ޖަމްޕް އިވެންޓުން ރިހި މެޑަލް ހޯދި ޝަރީފް ސްޕޯޓްސްގެ ރިފާ މުޙައްމަދު ފުންމާފައިވަނީ 4.88 މީޓަރަށެވެ. އަދި ލޯ މެޑަލް ހޯދި އައިޝަތު ސަބާ ސަލީމް ފުންމާފައިވަނީ 4.64 މީޓަރަށެވެ.
މީގެ އިތުރުން ގައުމީ މުބާރާތުގައި މިއަދު ހެނދުނު ވަނީ ފިރިހެނުންގެ 10000 މީޓަރުގެ ފައިނަލް ކުރިއަށް ގެންގޮސްފައެވެ. މި އިވެންޓުން ރަން މެޑަލް ހޯދާފައިވަނީ ދިވެހި ސިފައިންގެ ކުލަބުގެ ޝިފާޒް މުޙައްމަދެވެ. އޭނާ ރޭސް ނިންމީ 35 މިނެޓު 51.60 ސިކުންތުންނެވެ. މި އިވެންޓުން ރިހި މެޑަލް ހޯދި މެރަތަން ރަނާސް މޯލްޑިވްސްގެ މުޙައްމަދު އިރުފާން ރޭސް ނިންމާފައިވަނީ 36 މިނެޓު 13.61 ސިކުންތުންނެވެ. އަދި ލޯ މެޑަލް ހޯދި ސިފައިންގެ ކުލަބުގެ މުޙައްމަދު ރަޝީދު (މޯޑު) ރޭސް ނިންމީ 36 މިނެޓު 37.14 ސިކުންތުންނެވެ.