ގައުމީ ޓޭބަލް ޓެނިސް މުބާރާތުގެ އަންހެން ސިންގަލްސްގެ ޗެމްޕިއަންކަން ޖެހިޖެހިގެން ފަސްވަނަ ފަހަރަށް ފާތިމަތު ދީީމާ އަލީ ހޯދިއިރު، ފިރިހެން ސިންގަލްސްގެ ޗެމްޕިއަންކަން ފުރަތަމަ ފަހަރަށް އަޚްޔާރު އަޙްމަދު ޚާލިދު ހޯދައިފިއެވެ.
62 ވަނަ ގައުމީ މުބާރާތުގެ ފައިނަލް މެޗުތައް މިއަދު ހަވީރު ކުރިއަށްދިޔައިރު، ދީމާ ޗެމްޕިއަންކަން ހޯދީ ފައިނަލުގައި އައިޝަތު ރަފާ ނާޒިމް ސީދާ ހަތަރު ސެޓުން ބަލިކޮށްގެންނެވެ. މި މެޗުގެ ސެޓުތައް ދީމާ ގެންދިޔައީ 11-8، 12-10، 11-3 އަދި 11-8 އިންނެވެ.
މާލޭ ޓީޓީ ހޯލުގައި ކުރިއަށްދިޔަ މި މުބާރާތުގެ ފިރިހެން ސިންގަލްސްގެ ޗެމްޕިއަންކަން އަޚްޔާރު ހޯދީ ފައިނަލުގައި ގައުމީ ތަށި 11 ފަހަރު ހޯދާފައިވާ މޫސާ މުންސިފް އަޙްމަދު، ހަތަރު ސެޓު ތިން ސެޓުން ބަލިކޮށްގެންނެވެ. މި މެޗުގެ ފުރަތަމަ ތިން ސެޓު އަޚްޔާރު ކާމިޔާބުކޮށްފައިވަނީ 12-10، 11-1 އަދި 11-08 އިންނެވެ. އެކަމަކު މުންސިފް ވަނީ ޖެހިގެން އައި ތިން ސެޓު 8-11، 5-11 އަދި 6-11 އިން ގެންގޮސްފައެވެ. އެއާއެކު ނަތީޖާ ނެރުމަށް ކުޅުނު ފަހު ސެޓު އަޚްޔާރު ކާމިޔާބުކުރީ 11-7 އިންނެވެ.
ގައުމީ މުބާރާތުގެ ސިންގަލްސް އިވެންޓުތަކުގެ ޗެމްޕިއަންކަން ދީމާ އާއި އަޚްޔާރު ހޯދިއިރު، އެއް ޕެއާއަކަށް ކުޅެގެން 19 އަހަރުން ދަށުގެ މިކްސް ޑަބަލްސްގެ ޗެމްޕިއަން ހޯދާފައެވެ.