ކާވާ ވިމެންސް ވޮލީބޯލް ޗެލެންޖް ކަޕް: ފަސޭހަކަމާއެކު އަފްޣާން ބަލިކޮށް ރާއްޖެއިން ފެށުން ރަނގަޅުކޮށްފި

މާލޭގައި މިހާރު ކުރިއަށްދާ ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ) ވިމެންސް ވޮލީބޯލް ޗެލެންޖް ކަޕް 2024 ގައި ރާއްޖެއިން ކުޅުނު ފުރަތަމަ މެޗުގައި ފަސޭހަކަމާއެކު އަފްޣާނިސްތާން ބަލިކޮށްފިއެވެ.

ކާވާ ވިމެންސް ވޮލީބޯލް ޗެލެންޖް ކަޕް ކުރިއަށްދާނީ މި މަހުގެ 11 ވަނަ ދުވަހުގެ ނިޔަލަށް ޒުވާނުންގެ މަރުކަޒުގެ އެތެރޭ ކޯޓުގައެވެ. މި މުބާރާތުގައި ހަތަރު ގައުމެއް ވާދަކުރާއިރު، އެ ގައުމުތަކަކީ ރާއްޖޭގެ އިތުރުން އަފްޣާނިސްތާނާއި، ތަޖިކިސްތާން އަދި ކިރްގިސްތާނެވެ.

މިރޭ ކުޅުނު މެޗު ރާއްޖޭގެ އަންހެން ޓީމުން ކާމިޔާބުކޮށްފައިވަނީ ސީދާ ތިން ސެޓުންނެވެ. މި މެޗުގެ ފުރަތަމަ ސެޓު ފަށައިގެން ވާދަވެރި ކުޅުމެއް ފެނިގެންދިޔަ ނަމަވެސް، ރާއްޖެއިން ވަނީ 25-19 އިން މި ސެޓު ކާމިޔާބުކޮށްފައެވެ. އަދި ޖެހިގެން އައި ދެ ސެޓުގައި ރާއްޖޭގެ ފަރާތުން މޮޅު ކުޅުމެއް ފެނިގެންދިޔައިރު، މި ދެ ސެޓު ވަނީ ފަސޭހަކަމާއެކު ކާމިޔާބުކޮށްފައެވެ. އެގޮތުން މި ސެޓުތައް ރާއްޖެއިން ގެންދިޔައީ 25-12 އަދި 25-11 އިންނެވެ.

މި މޮޅާއެކު މުބާރާތުގެ ފެށުން ރާއްޖެއިން ރަނގަޅުކުރިއިރު، މުބާރާތުގެ ދެވަނަ މެޗުގައި މާދަމާރޭ ނުކުންނާނީ ތަޖިކިސްތާނާ ދެކޮޅަށެވެ. މި މުބާރާތުގައި ތަޖިކިސްތާނުން ކުޅުނު ފުރަތަމަ މެޗުގައި، މިއަދު ހަވީރު ވަނީ ކިރްގިސްތާން އަތުން ސީދާ ތިން ސެޓުން ބަލިވެފައެވެ.

ކާވާ ވިމެންސް ވޮލީބޯލް ޗެލެންޖް ކަޕުގެ ކުޅުން މިއަދު ފެށިއިރު، މުބާރާތް ހުޅުވުމުގެ ރަސްމިއްޔާތު މިރޭ ވަނީ ބާއްވާފައެވެ. މި ރަސްމިއްޔާތުގައި ވަނީ ޗެމްޕިއަން ޓީމަށް ދޭ ޓްރޮފީ ދައްކާލާފައެވެ.