މާލޭގައި މިއަދު ފެށި ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ) ވިމެންސް ވޮލީބޯލް ޗެލެންޖް ކަޕް 2024 ގައި ކުޅުނު ފުރަތަމަ މެޗުގައި ކިރްގިސްތާނުން ފަސޭހަކަމާއެކު ތަޖިކިސްތާން ބަލިކޮށްފިއެވެ.
މިއަދު ފެށި ކާވާ ވިމެންސް ވޮލީބޯލް ޗެލެންޖް ކަޕް ކުރިއަށްދާނީ މި މަހުގެ 11 ވަނަ ދުވަހުގެ ނިޔަލަށް ޒުވާނުންގެ މަރުކަޒުގެ އެތެރޭ ކޯޓުގައެވެ. މި މުބާރާތުގައި ހަތަރު ގައުމެއް ވާދަކުރާއިރު، އެ ގައުމުތަކަކީ ރާއްޖޭގެ އިތުރުން ތަޖިކިސްތާނާއި، ކިރްގިސްތާން އަދި އަފްޣާނިސްތާނެވެ.
މިއަދު ހަވީރު ކުޅުނު ފުރަތަމަ މެޗު ކިރްގިސްތާނުން ކާމިޔާބުކޮށްފައިވަނީ ސީދާ ތިން ސެޓުންނެވެ. އެގޮތުން ފުރަތަމަ ސެޓު ފަށައިގެން ވާދަވެރި ކުޅުމެއް ފެނިގެންދިޔަ ނަމަވެސް، ކިރްގިސްތާނުން ވަނީ 25-17 އިން މި ސެޓު ކާމިޔާބުކޮށްފައެވެ. އަދި ދެވަނަ ސެޓު ކިރްގިސްތާނުން ކާމިޔާބުކޮށްފައިވަނީ 25-15 އިންނެވެ. މި މެޗުގެ ތިންވަނަ ސެޓުގައި ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔަ ނަމަވެސް، ކިރްގިސްތާނުން ވަނީ ފަހުކޮޅު މޮޅު ކުޅުމެއް ދައްކައި މި ސެޓު 25-21 އިން ކާމިޔާބުކޮށްފައެވެ.
މި މޮޅާއެކު މުބާރާތުގެ ފެށުން ކިރްގިސްތާނުން ރަނގަޅުކުރިއިރު، އެ ޓީމުން ކުޅޭ ދެވަނަ މެޗުގައި މާދަމާ ހަވީރު ނުކުންނާނީ އަފްޣާނިސްތާނާ ދެކޮޅަށެވެ.
މި މުބާރާތުގައި ރާއްޖެއިން ކުޅޭ ފުރަތަމަ މެޗުގައި މިރޭ އަފްޣާނިސްތާނާ ދެކޮޅަށް ނުކުންނާނެއެވެ. ކާވާ ވިމެންސް ވޮލީބޯލް ޗެލެންޖް ކަޕާ ރާއްޖޭގެ އަންހެން ޓީމު ކުރިމަތިލާއިރު، އެ ޓީމުން ވަނީ މިދިޔަ އޯގަސްޓް މަހު ނޭޕާލުގައި ބޭއްވި ކާވާ ވިމެންސް ވޮލީބޯލް ނޭޝަންސް ލީގުގައިވެސް ވާދަކޮށްފައެވެ.