ޔުއެފާ ނޭޝަންސް ލީގުގައި ރޭ ސާބިއާ އާއި އެންމެ ފަހުގެ ޔޫރޯގެ ޗެމްޕިއަން ސްޕެއިން ލަނޑެއް ނުޖެހި އެއްވަރުވިއިރު، ޑެންމާކާއި ޕޮލަންޑުން ކުޅުނު މެޗުތަކުން މޮޅުވެއްޖެއެވެ.
މިއީ މިދިޔަ މާރިޗް މަހުގެ ފަހުން ސްޕެއިނުން މެޗަކުން މޮޅުނުވެ ނިންމާލަންޖެހުނު ފުރަތަމަ ފަހަރެވެ. އަދި އެ ޓީމުން ދަމަހައްޓަމުންއައި މެޗުތަކުން މޮޅުވުމުގެ ސިލްސިލާ ވަނީ ނުވަ މެޗާއެކު ނިމުމަކަށް އައިސްފައެވެ.
އަމިއްލަ ދަނޑުގައި ޑެންމާކުން 2-0 އިން ސްވިޒަލެންޑް ބަލިކުރިއިރު، ޕޮލެންޑުން ވަނީ ރަށުން ބޭރުގައި 3-2 އިން ސްކޮޓްލެންޑް އަތުން މޮޅުވެފައެވެ.
ސްޕެއިނުން ރޭގެ މެޗަށް ނިކުތީ ސަސްޕެންޝަންގެ ސަބަބުން ކެޕްޓަން، އަލްވާރޯ މޮރާޓާ އާއި މިޑްފީލްޑަރު، ރޮޑްރީ އާ ނުލައެވެ. އަދި މިވަގުތު އަނިޔާގައި ހުރި އެއްވަނަ ގޯލްކީޕަރު، އުނާއި ސިމޯން ވެސް ރޭގެ މެޗުގައި ނުކުޅެއެވެ. މި މެޗުގައި އެ ޓީމުގެ ގޯލްބެލެހެއްޓީ އާސެނަލްގެ ޑޭވިޑް ރާޔާ އެވެ.
ސާބިއާގެ ބެލްގްރޭޑްގައި ރޭ ކުޅުނު މެޗު ފެށިގެން ސްޕެއިނުން ޑޮމިނޭޓްކުރިއިރު، މުޅި މެޗުގައި އެ ޓީމުން ވަނީ ގޯލަށް އަމާޒުކޮށް 22 ހަމަލާ ފޮނުވާލައިފައެވެ. މީގެތެރެއިން، ފުރަތަމަ ހާފުގައި ސާބިއާގެ ގޯލަށް އަމާޒުކޮށް ސްޕެއިނަށް ފޮނުވާލެވުނީ އެންމެ ދެ ހަމަލާ އެވެ. މި ހާފުގައި ސާބިއާ އަށް ލަނޑެއްޖަހައިދޭން އެ ޓީމުގެ ފޯވާޑް، ލޫކަ ޔޮވިޗް އަށް ވަނީ ރަނުގެ ފުރުޞަތެއްލިބި ބޭކާރުވެފައެވެ.
ދެވަނަ ހާފުގައި ސްޕެއިނުގެ ކެޕްޓަން، ޑަނީ ކަރްވަހާލް އަށް ލަނޑެއްޖަހައިދޭން ލިބުނު ފުރުޞަތުގެ ބޭނުންހިފޭގޮތްނުވިއިރު، އެ ޓީމުގެ ޒުވާން ވިންގް، ލަމީން ޔަމާލް ވަނީ މި ހާފުގައި ގިނަ ފުރުޞަތުތަކެއް ތަނަވަސްކޮށްދީފައެވެ.
މެޗަށްފަހު ސްޕެއިނުގެ ކޯޗު، ލުއިސް ޑެ ލަ ފުއެންޓޭ ވަނީ، ފުރަތަމަ ހާފުގައި އޭނާގެ ޓީމަށް އެންމެ އެދެވޭ ކުޅުން ދެއްކޭގޮތްނުވި ކަމަށް ބުނެފައެވެ.
އެއާ ހިލާފަށް ދެވަނަ ހާފުގައި ގިނަ ކަންތައްތައް ރަނގަޅުކުރި ކަމަށާއި، އެހެންނަމަވެސް ގޯލެއް ކާމިޔާބުކުރެވޭގޮތްނުވީ ކަމަށް ފުއެންޓޭ ބުންޏެވެ. އަދި، ފަހު ހާފުގައި ނަތީޖާ ބަދަލުކޮށްނުލެވުމުގެ މައިގަނޑު ސަބަބަކަށްވީ ކުޅުންތެރިން މާބޮޑަށް ވަރުބަލިވުން ކަމަށް ވެސް ފުއެންޓޭ ފާހަގަކުރިއެވެ.
މި މުބާރާތުގައި ރޭ ކުޅުނު އަނެއް މެޗުގައި އަށްވަނަ މިނެޓުގައި ޕޮލެންޑުން ލީޑްނެގީ ސެބާސްޓިއަން ޝިމަންސްކީ އެވެ. އޭގެފަހުން، ފުރަތަމަ ހާފު ނިމެންދަނިކޮށް ލިބުނު ޕެނަލްޓީއަކުން ޕޮލެންޑްގެ ކެޕްޓަން، ރޮބަޓް ލެވަންޑޯސްކީ ވަނީ ނަތީޖާ 2-0 އަށް ބަދަލުކޮށްލާފައެވެ.
ދެވަނަ ހާފުގެ ކުރީކޮޅު ސްކޮޓްލެންޑްގެ ފުރަތަމަ ލަނޑުޖަހައިދިނީ ބިލީ ގިލްމޯ އެވެ. އަދި އޭގެފަހުން، މެޗުގެ 76 ވަނަ މިނެޓުގައި ސްކޮޓްލެންޑަށް އެއްވަރުކޮށްދިނީ ސްކޮޓް މެކްޓޮމިނޭ އެވެ. މި ނަތީޖާގައި އޮވެ، މެޗު ނިމެންދަނިކޮށް ޕޮލެންޑް މޮޅުކޮށްދިނީ އިތުރުވަގުތުގައި ލިބުނު ޕެނަލްޓީއަކުން ނިކޮލާ ޒަލެވްސްކީ އެވެ.
ނުވަ ކުޅުންތެރިންނާއެކު ކުޅެމުންދިޔަ ސްވިޒަލެންޑް އަތުން ޑެންމާކް މޮޅުވިއިރު، އެ ޓީމުގެ ދެލަނޑުވެސް ޖެހީ ފަހު 10 މިނެޓުގެ ތެރޭގައެވެ. މި މެޗުގެ ދެވަނަ ހާފުގެ ކުރީކޮޅު، ސްވިޒަލެންޑްގެ ނިކޯ އެލްވެޑީ އަށް ސީދާ ރަތެއް ދައްކާ ދަނޑުން ފޮނުވާލައިފައިވާއިރު، އޭގެފަހުން މެޗު ނިމެން ތިން މިނެޓަށްވެފައިވަނިކޮށް އެ ޓީމުގެ ކެޕްޓަން، ގްރޭނިޓް ޒާކާ އަށް ވަނީ ދެވަނަ ރީނދޫ ކާޑާއެކު ރަތެއް ދައްކާފައެވެ.
ޑެންމާކުން މި މެޗުގައި ޖެހި ފުރަތަމަ ލަނޑު، 82 ވަނަ މިނެޓުގައި ޕެޓްރިކް ޑޯރްގޫ ކާމިޔާބުކޮށްދިންއިރު، އޭގެފަހުން މެޗުގެ އިތުރުވަގުތުގެ ދެވަނަ މިނެޓުގައި އެ ޓީމުގެ ކެޕްޓަން، ޕިއޭ-އެމީލް ހޮއިބިއޭ ވަނީ ތިން ޕޮއިންޓް ކަށަވަރުކޮށްދީފައެވެ.