އެތުލެޓިކްސް އެސޯސިއޭޝަން އޮފް މޯލްޑިވްސްއިން އިންތިޒާމުކޮށްގެން ބާއްވާ 33 ވަނަ ގައުމީ އެތުލެޓިކްސް ޗެމްޕިއަންޝިޕުގެ ފިރިހެނުންގެ 800 މީޓަރު ދުވުމުގެ ރަން މެޑަލް ހުސެއިން ފަޒީލް ހާރޫން ހޯދައިފިއެވެ.
މާލޭ އެކުވެނި ސިންތެޓިކް ޓްރެކުގައި ކުރިއަށްދާ މި މުބާރާތުގައި މިއަދު ހެނުދުނު ކުރިއަށްދިޔަ ފައިނަލް ހީޓު ދިވެހި ސިފައިންގެ ކުލަބުގެ ފަޒީލް ކާމިޔާބުކުރީ ދެ މިނެޓު 2.32 ސިކުންތުން ރޭސް ނިންމައިގެންނެވެ. މި ބައިން ރިހި މެޑަލް ހޯދީ ސާއިދު ސްޕޯޓްސްގެ އަޙްމަދު ވިސާމެވެ. އޭނާ ރޭސް ނިންމާފައިވަނީ ދެ މިނެޓު 3.40 ސިކުންތުންނެވެ. އަދި ލޯ މެޑަލް ހޯދި ސިފައިންގެ ކުލަބުގެ އަބްދުﷲ އިކްރާމް ރޭސް ނިންމާފައިވަނީ ދެ މިނެޓު 9.03 ސިކުންތުންނެވެ.
މީގެ އިތުރުން މިއަދު ކުރިއަށްދިޔަ އަންހެނުންގެ 800 މީޓަރު ދުވުމުގެ ރަން މެޑަލް ހޯދާފައިވަނީ ސިފައިންގެ ކުލަބުގެ ފަސޫހާ އަޙްމަދެވެ. އޭނާ މި ހީޓު ކާމިޔާބުކުރީ ދެ މިނެޓު 15.96 ސިކުންތުން ރޭސް ނިންމައިގެންނެވެ. މި ބައިން ރިހި މެޑަލް ހޯދީ ޓްރެކް އެންޑް ފީލްޑް އެސޯސިއޭޝަނުގެ ޒީކް އަޝްރަފް ރަޝީދެވެ. އޭނާ ރޭސް ނިންމާފައިވަނީ ދެ މިނެޓު 30.58 ސިކުންތުންނެވެ. އަދި ލޯ މެޑަލް ހޯދި އައިލެންޑް ރަނާސް މޯލްޑިވްސްގެ ސަމްހާ އަޙްމަދު ރޭސް ނިންމާފައިވަނީ ދެ މިނެޓު 33.27 ސިކުންތުންނެވެ.
މީގެ އިތުރުން މާސްޓާ ކެޓެގަރީގެ ފިރިހެނުންގެ 1500 މީޓަރުގެ ދުވުމުން ރަން މެޑަލް ހޯދީ އެލީޓް ރަނާސް މޯލްޑިވްސްގެ ސުނާން އަޙްމަދެވެ. އޭނާ ރޭސް ނިންމީ ހަތަރު މިނެޓު 58.02 ސިކުންތުންނެވެ. މި ބައިން ރިހި މެޑަލް ހޯދީ ސިފައިންގެ ކުލަބުގެ އަބްދުﷲ އިބްރާހީމެވެ. އޭނާ ރޭސް ނިންމާފައިވަނީ ފަސް މިނެޓު 4.56 ސިކުންތުންނެވެ. އަދި ލޯ މެޑަލް ހޯދި އައިލެންޑް ރަނާސްގެ އަޙްމަދު މުޙައްމަދު ރޭސް ނިންމާފައިވަނީ ފަސް މިނެޓު 17.41 ސިކުންތުންނެވެ.
މާސްޓާ ކެޓެގަރީގެ އަންހެނުންގެ 1500 މީޓަރުގެ ދުވުމުގެ ރަން މެޑަލް އެލީޓް ރަނާސް މޯލްޑިވްސްގެ އައިޝަތު ރިޝްމީ ހޯދިއިރު، އޭނާ ރޭސް ނިންމީ ހަ މިނެޓު 35.73 ސިކުންތުންނެވެ. މި ބައިން ރިހި މެޑަލް ހޯދީ އެލީޓް ރަނާސްގެ ހުސްނާ މުޙައްމަދެވެ. އޭނާ ރޭސް ނިންމާފައިވަނީ އަށް މިނެޓު 0.27 ސިކުންތުންނެވެ. މި އިވެންޓުގައި ވާދަކޮށްފައިވަނީ ދެ އެތުލީޓުންނެވެ.
މާދަމާގެ ނިޔަލަށް މި އަހަރުގެ ގައުމީ މުބާރާތް ކުރިއަށްދާއިރު، އިއްޔެ ހަވީރު ވަނީ 100 މީޓަރު ދުވުންތަކުގެ ހީޓުތައް ކުރިއަށްގެންގޮސްފައެވެ. އެގޮތުން ފިރިހެނުންގެ 100 މީޓަރު ދުވުމުގެ ރަން މެޑަލް އިބާދުﷲ އާދަމް ހޯދިއިރު، އޭނާ ވަނީ ރާއްޖޭގައި އުފެދުނު އެންމެ ކާމިޔާބު ދުވުންތެރިޔާ, ދިވެހި ސިފައިންގެ ކުލަބުގެ ހަސަން ސާއިދު ފަހަތަށް ޖައްސާލާފައެވެ. އަދި އަންހެނުންގެ 100 މީޓަރު ދުވުމުން ރަން މެޑަލް ހޯދާފައިވަނީ ޝަރީފް ސްޕޯޓްސްގެ އަހުނާ ނިޒާރެވެ.