އިޓަލީގެ ނާޕޮލީއަށް ކުޅެމުން އައި ނައިޖީރިއާގެ ފޯވާޑް ވިކްޓަ އޮސީމެން، ލޯނު އެއްބަސްވުމެއްގެ ދަށުން ތުރުކީގެ ގަލަތަސަރާއީއަށް ބަދަލުވެއްޖެއެވެ.
އުމުރުން 25 އަހަރުގެ އޮސީމެން ގަލަތަސަރާއީއަށް ބަދަލުވީ އަންނަ އަހަރުގެ ޖޫން މަހުގެ ނިޔަލަށެވެ. ގަލަތަސަރާއީއިން ވަނީ އެ މުއްދަތުގައި ނާޕޮލީއަށް ލޯން ފީގެ ގޮތުގައި ގާތްގަނޑަކަށް 6 މިލިއަން ޔޫރޯ ދޭން އެއްބަސްވެފައެވެ.
މިދިޔަ ޑިސެންބަރު މަހު ނާޕޮލީ އާއެކު ހަދާފައިވާ އެއްބަސްވުން 2026 ގެ ނިޔަލަށް އިތުރުކޮށްފައިވާއިރު، އޭރު އޭނާގެ އެއްބަސްވުން އުވާލުމަށް ދައްކަންޖެހޭ ރިލީޒް ފީގެ ގޮތުގައި ކަނޑައަޅާފައިވަނީ 130 މިލިއަން ޔޫރޯ ކަމަށް ރިޕޯޓްތައް ބުނެއެވެ. ނާޕޮލީން އިތުރަށް ބުނިގޮތުގައި، މި އެއްބަސްވުމުގެ ތެރެއިން އޮސީމެން އާއެކު ހަދާފައިވާ ކޮންޓްރެކްޓް 2027 ގެ ނިޔަލަށް އިތުރުކުރުމުގެ އިހްތިޔާރު ލިބިގެންވެއެވެ.
ނައިޖީރިއާގެ ގައުމީ ޓީމަށް މިހާތަނަށް ކުޅުނު 35 މެޗުގައި 21 ލަނޑުޖަހައިދީފައިވާ އޮސީމެން ވަނީ ކްލަބު ކެރިއަރުގައި ނާޕޮލީގެ އިތުރުން ފްރާންސްގެ ލިލް އާއި ޖަރުމަނުގެ ވުލްފްސްބާގަށް ކުޅެފައެވެ. މީގެތެރެއިން، ނާޕޮލީ އަށް ކުޅެދިން 133 މެޗުގައި ވަނީ 76 ލަނޑުޖަހައިފައެވެ.
ފަހުގެ މީޑިއާ ރިޕޯޓްތައް ބުނާގޮތުން، ނާޕޮލީ ދޫކޮށްލަން އޮސީމެން ނިންމި ހިސާބުން ނިމިދިޔަ ޓްރާންސްފާ ބާޒާރުގައި ގިނަ ކުލަބުތަކަކުން ވަނީ އޭނާ ހޯދުމަށް މަސައްކަތްކޮށްފައެވެ. އޭގެތެރޭގައި، ސަޢުދީ ޢަރަބިއްޔާގެ އަލް-އަހްލީ އާއި އިންގްލަންޑްގެ ޗެލްސީ ހިމެނެއެވެ.
މި ހުރިހާ ސަބަބުތަކާހުރެ، ނާޕޮލީން ވަނީ އޮސީމެންގެ ބަދަލުގައި ޗެލްސީން ބެލްޖިއަމްގެ ފޯވާޑް، ރޮމެލޫ ލުކާކޫ ގެނެސްފައެވެ. އަދި، މި ފަހަރުގެ ސީޒަނަށް ނާޕޮލީން ލީގުގައި ކުޅުމަށް ރަޖިސްޓްރީކުރި 23 ކުޅުންތެރިންގެ ސްކޮޑުގައި ވެސް އޭނާ ނުހިމެނެއެވެ.