ފްރާންސް ފުޓްބޯލް މަޖައްލާއިން ހޮވާ ދުނިޔޭގެ އެންމެ މޮޅު ފުޓްބޯޅަ ކުޅުންތެރިޔާއަށް ދޭ ބަލޮންޑޯ އެވޯޑަށް މި އަހަރު ނޮމިނޭޓް ވެފައިވާ ކުޅުންތެރިންގެ ނަނަތްތައް އިއުލާން ކުރިއިރު, 21 އަހަރުގެ ތެރޭގައި ފުރަތަމަ ފަހަރަށް ލިއޮނެލް މެސީ އާއި ކްރިސްޓިއާނޯ ރޮނާލްޑޯއަށް ފުރުސަތު ގެއްލިއްޖެއެވެ.
ފާއިތުވެދިޔެ ގިނަ އަހަރުތަކެއްގައި ފުޓްބޯޅަ އެވޯޑް ހަފްލާތަކުގެ ސްޓޭޖްތައް ފަޅު ފިލުވަމުން ގޮސްފައިވާ މެސީ އާއި ރޮނާލްޑޯ ނެތި ބަލޮންޑޯއަށް ވާދަކުރާ 30 ކުޅުންތެރިންގެ ނަންތައް އިއުލާނު ކުރިއިރު، މިއީ 2003 ވަނަ އަހަރަށްފަހު މި ދެ ކުޅުންތެރިންގެ ނަން ނެތި ނޮމިނީސް އިއުލާން ކުރި ފުރަތަމަ ފަހަރެވެ.
ފީފާ ވޯލްޑް ކަޕް އަދި ކޯޕާ އެމެރިކާ ފުޓްބޯޅަ މުބާރާތް ކާމިޔާބު ކުރުމަށްފަހު މެސީ ވަނީ މިދިޔަ އަހަރު ބަލޮންޑޯ އަށްވަނަ ފަހަރަށް ހޯދާފައެވެ. ސައުދީގެ އަލް ނަސްރަށް މިހާރު ކުޅެމުންދާ ރޮނާލްޑޯއަށް މި އެވޯޑް ލިބިފައިވަނީ ފަސް ފަހަރެވެ. އެހެން ކަމުން މި ދެކުޅުންތެރިން ވަނީ 13 އަހަރު މި މަގާމުގައި ފައިތިލަ ސާބިތުކޮށްފައެވެ.
މި ފަހަރުގެ އެވޯޑަށް ވާދަކުރާ 30 ކުޅުންތެރިންގެ ނަން ފްރާންސް ފުޓްބޯލް އިން ހާމަކޮށްފައިވާއިރު, އޭގެ ތެރޭގައި އިނގިރޭސިވިލާތުގެ 6 ކުޅުންތެރިއަކު ހިމެނެއެވެ. އެގޮތުން ޖޫޑް ބެލިންހަމާއި, ފިލް ފޯޑެން އާއި, ކޯލް ޕާމާ އާއި, ޑެކްލަން ރައިސް އާއި, ހެރީ ކޭން އަދި ބުކަޔޯ ސަކާ ހިމެނެ އެވެ.
މީގެ އިތުރުން އާޖެންޓީނާގެ ލައުޓާރޯ މާޓިނޭޒް އާއި, އެމިލިއާނޯ މާޓިނޭޒް އާއި, ޖަރުމަނުގެ ޓޯނީ ކްރޫސް އާއި, މެޓް ހަމެލްސް އާއި, އެންޓޯނިއޯ ރުޑިގާ އާއި, އަދި ސްޕޭނުގެ އަލެހަންދްރޯ ގްރިމާލްޑޯ އާއި, ލަމީން ޔަމާލް އާއި, ޑެނީ ކާވަހާލް އާއި, ރޮޑްރީ އަދި ޑަނީ އޮލްމޯ ހިމެނެއެވެ. މި ފަހަރުގެ ނޮމިނީސްތަކުގެ ތެރޭގައި ހިމެނޭ ފްރާންސްގެ ކުޅުންތެރިންނަކީ ކިލިއަން އެމްބާޕޭ އާއި ވިލިއަން ސަލީބާއެވެ.
މީގެ ކުރިން ބަލޮންޑޯ ކާމިޔާބުކޮށް އަދި މިހާރުވެސް ކުޅެމުންދާ ކުޅުންތެރިންގެ ތެރެއިން މި ފަހަރުގެ ނޮމިނީސް ތަކުގެ ތެރޭގައި ކްރޮއޭޝިއާގެ ލޫކާ މޮޑްރިޗް އަދި ފްރާންސްގެ ކަރީމް ބެންޒެމާ ނުހިމެނެ އެވެ. އެންމެ މޮޅު ގޯލުކީޕަރަށް ދޭ ޔަޝީން އެވޯޑަށް، އެންމެ ފަހުން މި އެވޯޑް ކާމިޔާބުކުރި އާޖެންޓީނާގެ އެމިލިއާނޯ މާޓިނޭޒް ވަނީ މި ފަހަރުވެސް ނޮމިނޭޓް ވެފައެވެ.
މި ފަހަރުގެ އެވޯޑް ހަފްލާ ބޭއްވުމަށް ހަމަޖެހިފައިވަނީ ފްރާންސްގެ ޕެރިހުގައި އަންނަ އޮކްޓޯބަރ މަހުގެ 28 ވަނަ ދުވަހު އެވެ.