އެމެރިކާގެ ނިއު ޔޯކުގައި މިހާރު ކުރިއަށްދާ ޔޫއެސް އޯޕަން ޓެނިސް މުބާރާތުގެ ސެމީ ފައިނަލުގެ ޖާގައެއް އިނގިރޭސިވިލާތުގެ ޖެކް ޑްރެޕާ ހޯދައިފިއެވެ.
ޑްރެޕަރ މި މުބާރާތުގެ ސެމީ ފައިނަލުގެ ޖާގައެއް ހޯދާފައިވަނީ ދިހަވަނަ އަށް ސީޑް ކޮށްފައިވާ އޮސްޓްރޭލިއާގެ އެލެކްސް ޑިމިނޯ އާއި ދެކޮޅަށް ކުޅުނު މެޗު ދެ ސެ ޓް އެއް ސެޓުން މެޗު ކާމިޔާބު ކޮށްގެންނެވެ.
އުމުރުން 22 އަހަރުގެ ޑްރެޕަރ މެޗުގެ ފުރަތަމަ ސެޓް ހައެއް ތިނެއް އިން ކާމިޔާބު ކުރިއިރު މެޗުގެ ދެވަނަ ސެޓް ޑެމިނޯ ވަނީ ހަތެއް ފަހެއް އިން ކާމިޔާބުކޮށްފަ އެވެ. މި ސެޓުގައި ޑްރެޕަރ ވަނީ ފަޔަށް ލިބުނު އަނިޔާއަކަށް ފަރުވާ ހޯދާފަ އެވެ. ނަމަވެސް މެޗުގެ ތިންވަނަ ސެޓް ޑްރެޕަރ ވަނީ ހައެއް ދޭއް އިން ކާމިޔާބުކޮށް މުބާރާތުގެ ސެމީ ފައިނަލުގެ ޖާގައެއް ހޯދާފަ އެވެ. މިއީ 2012 ވަނަ އަހަރު އެންޑީ މަރޭ ޔޫއެސް އޯޕަން މުބާރާތް ކާމިޔާބު ކުރި ފަހުން މި މުބާރާތުގެ ގަދަ ހަތަރަކާއި ހަމައަށް އިނގިރޭސި ކުޅުންތެރިއަކު ދަތުރު ކުރި ފުރަތަމަ ފަހަރެވެ.
ސެމީ ފައިނަލުގައި ޑްރެޕަރ އާއި ދެކޮޅަށް ކުޅޭ ކުޅުންތެރިއެއް އެނގޭނީ މިއަދު ދުނިޔޭގެ އެއްވަނަ ކުޅުންތެރިޔާ އިޓަލީގެ ޔަނިކް ސިނާ އާއި ޑެނީލް މެދްވެދޭވް ކުޅޭ މެޗަށް ފަހުގަ އެވެ.
މި މުބާރާތުގައި އިއްޔެ ކުޅުނު އެހެން މެޗުތަކަށް ބަލާއިރު އެމެރިކާގެ ފްރެންސެސް ޓިއަފޯ ވަނީ ގްރިގޯ ޑިމިޓްރޯވް ބަލިކޮށް މުބާރާތުގެ ސެމީ ފައިނަލުގެ ޖާގައެއް ހޯދާފަ އެވެ.
މުބާރާތުގެ އަންހެން އިވެންޓުގެ ސެމީ ފައިނަލުގެ ޖާގައެއް ކެރޮލޯނާ މުޗޯވާ ހޯދާފައިވަނީ ބީޓްރިޒް ހަދާދް ބަލި ކުރުމަށްފަހުގަ އެވެ.