ތިލަފުށި ކުނިން ފުރިފައިވާތީ، ކުނި މެނޭޖުކުރަން އިތުރު ތަނެއް ހޯދަނީ

ތިލަފުށީގެ ކުނި އަޅާ ސަރަޙައްދު ފުރިފައިވާތީ، ތިލަފުށި ނޫން އެހެންތަނަކަށް ކުނި ގެންދެވޭނެ އިންތިޒާމެއް ހަމަޖެއްސުމަށް މަސައްކަތް ކުރަމުންދާކަމަށް ވޭސްޓް މެނޭޖްމަންޓް ކޯޕަރޭޝަން، ވެމްކޯގެ މެނޭޖިން ޑިރެކްޓަރ މުޖުތަބާ ޖަލީލް ވިދާޅުވެއްޖެއެވެ. ތިލަފުއްޓަކީ މުޅި ރާއްޖޭގައި އުފައްދާ ކުނި ނައްތާލުމަށް ގެންދާ މައި ރަށެވެ.

ޕީއެސްއެމް ނިއުސްގެ ރާއްޖެމިއަދު ޕްރޮގްރާމްގައި ވާހަކަދައްކަވަމުން ވެމްކޯގެ ޚިދުމަތްތަކާ ގުޅޭގޮތުން މެނޭޖިން ޑިރެކްޓަރ މުޖުތަބާ ޖަލީލް ވިދާޅުވީ ސަރުކާރު ހަވާލުވިއިރު ވެމްކޯގައި ދަރަނީގެ ގޮތުގައި 160 މިލިޔަން ރުފިޔާ އޮތްކަމަށެވެ. މިހާރުގެ އެންމެ ބޮޑު އަމާޒަކީ ދަރަނިން ސަލާމަތްވެ ކުންފުނިން ފޯރުކޮށްދޭ ޚިދުމަތްތައް މެދުކެނޑުމެން ނެތި ކުރިއަށް ގެންދިޔުންކަމަށާއި މިހާރުވެސް ދަރަނި އަދާކުރަމުން ގެންދާކަމަށެވެ.

ކުނީގެ މައްސަލައަކީ ރާއްޖެއަށް ދިމާވެފައި އޮތް ބޮޑު މައްސަލައަކަށްވާއިރު މުޅި ރާއްޖޭގައި އުފައްދާ ކުނީގެ 90 އިންސައްތަ ތިލަފުއްޓަށް ގެންދަން ޖެހޭކަމަށް އޭނާ ވިދާޅުވިއެވެ. ނަމަވެސް މިހާރު ތިލަފުށީގައި ކުނި އަޅާ ސަރަޙައްދު ފުރިފައިވާކަމަށާއި އެކަން ޙައްލުކުރުމަށް އެކި ޕްލޭންތައް ތައްޔާރުކޮށްފައިވާކަމަށް މުޖުތަބާ ވިދާޅުވިއެވެ. އެގޮތުން މުޅި ރާއްޖޭގައި އުފައްދާ ކުނި ނައްތާލުމަށް ކުނި ގެންދާ ރަށް، ތިލާފުށި އޮތީ ފުރިފައިކަމަށާއި، އިތުރު ގޮތެއް ހޯދަންޖެހޭކަން ފާހަގަކުރައްވަމުން މުޖުތަބާ ވިދާޅުވީ، އެ މައްސަލައަށް ހައްލެއް ގެނައުމަށް ސަރުކާރާއެކު މަޝްވަރާކޮށްފައިވާކަމަށެވެ. ކުރިއަށް އޮތް 6 މަސްދުވަހުގެ ތެރޭގައި ހައްލުތަކެއް ގެނެވޭނެކަމަށް އުންމީދުކުރައްވާކަމަށް މުޖުތަބާ ވިދާޅުވިއެވެ.

"އެތަނުގައި އަންދާޒާކޮށްފައި އޮތީ އެންމެ މައްޗަށް ކުނިފުނި ނެގޭނީ 50 މީޓަރަށްކަމަށް. ނަމަވެސް މިހާރުވެސް އެތަނުގައި 47 މީޓަރު އެބަހުރި. އެތަނަކީ ވަރަށް ރިސްކީ ލެވެލްއެއްގައި އޮތް ތަނެއް. ކޮންމެ ދުވަހަކުވެސް މެނޭޖްކޮށްގެން ކުރިއަށް މި ގެންދަނީ." ވެމްކޯގެ މެނޭޖިން ޑިރެކްޓަރ މުޖުތަބާ ޖަލީލް ވިދާޅުވިއެވެ.

މުޖުތަބާ ވިދާޅުވީ މާލެ ސަރަޙައްދަކީ ރާއްޖޭގައި އެންމެ ގިނައިން ކުނި އުފައްދާ ސަރަޙައްދުކަމަށާއި މާލެ ކައިރިން ތަނެއް ހަމަޖެއްސުމަކީ މުހިންމުކަމެއްކަމަށެވެ.

މުޖުތަބާ ވިދާޅުވީ ވެމްކޯއިން ދެމުންދާ ކުނީގެ ޚިދުމަތް ރަނގަޅުކުރުމަށްޓަކައި ގިނަ މަސައްކަތްތަކެއް ކުރަމުން އަންނަކަމަށެވެ. ޚާއްސަގޮތެއްގައި ކުންފުނީގެ ވެހިކަލް ފްލީޓްގައ ހިމެނޭ ވެހިކަލްތަކުގެ 99 އިންސައްތަ ފުރަތަމަ ފަހަރަށް ބޭނުންކުރަމުން އަންނަކަމަށެވެ.

ތިލަފުއްޓަށް ކޮންމެ ދުވަހަކު 1000 ވުރެ ގިނަ ޓަނުގެ ކުނި ޖަމާކުރެއެވެ. ތިލަފުށީގައި ޤާއިމުކުރާ ކުނި އަންދައިގެން ހަކަތަ އުފެއްދުމަށް ދުވާލަކު 500 ޓަނުގެ ކުނި އެންދޭވަރުގެ ނިޒާމެއް ޤާއިމްކުރުމުގެ މަސައްކަތް ދަނީ ކުރަމުންނެވެ. ނަމަވެސް ކުނި އުފައްދާ މިންވަރު އިތުރުވުމާއެކު ތިލަފުށީގައި ދުވާލަކު 1000 ޓަނުގެ ކުނި އަންދާއިގެން ހަކަތަ އުފައްދާ ނިޒާމެއް ޤާއިމުކުރައްވާނެކަމަށް މޫސުމީ ބަދަލުތަކާއި ތިމާވެށްޓާއި، ހަކަތައާއި ބެހޭ ވަޒީރު ޠާރިޤް އިބްރާހީމް ވަނީ ވިދާޅުވެފައެވެ. އަދި ކުނި ނައްތާލުމަށް ބޭނުންވާ އިތުރު ބިމެއް ހަމަޖެއްސެވުމަށް މަސައްކަތް ކުރާނެކަމަށްވެސް ވަޒީރު ވަނީ ވިދާޅުވެފައެވެ.