17 އަހަރުން ދަށުގެ ސާފް ޗެމްޕިއަންޝިޕް: ރާއްޖެއާ އެއް ގްރޫޕެއްގައި އިންޑިއާ އާއި ބަންގްލަދޭޝް

ކުރިއަށް އޮތް 17 އަހަރުން ދަށުގެ ސާފް ޗެމްޕިއަންޝިޕުގައި އިންޑިއާ އާއި ބަންގްލަދޭޝް އާއެކު ގްރޫޕް އޭގައި ރާއްޖެ ލައްވާލައިފިއެވެ.

ބޫޓާނުގައި މި މަހު 20-30 އަށް ބާއްވާ މި މުބާރާތުގެ ގްރޫޕް ބީގައި ހިމެނެނީ އެ ގައުމުގެ އިތުރުން ނޭޕާލާއި، ޕާކިސްތާން އަދި ސްރީ ލަންކާއެވެ.

ގްރޫޕް އޭގައި ރާއްޖެ އާއެކު އިންޑިއާ އަދި ބަންގްލަދޭޝް ހިމެނޭއިރު، ރާއްޖޭގެ ފުރަތަމަ މެޗުގައި މި މަހުގެ 22 ވަނަ ދުވަހު ބައްދަލުކުރާނީ ބަންގްލަދޭޝް އާއެވެ. އަދި އޭގެ ދެ ދުވަސް ފަހުން އިންޑިއާއާ ދެކޮޅަށް ނުކުންނާނެއެވެ. މި މުބާރާތުގެ ސެމީ ފައިނަލަށް ދާނީ ކޮންމެ ގްރޫޕަކުން އެންމެ ގިނަ ޕޮއިންޓް ހޯދާ ދެ ޓީމެވެ.

މި މުބާރާތުގައި ވާދަކުރާ ރާއްޖޭގެ ޒުވާން ޓީމުގެ ކޯޗަކީ މުޙައްމަދު އާދަމެވެ. އޭނާ އަކީ މީގެ ކުރިން ވިކްޓަރީ ސްޕޯޓްސް ކުލަބާއި ޔުނައިޓެޑް ވިކްޓަރީއަށް ފުރަތަމަ ޑިވިޝަނުގައި ކޯޗުކޮށްދީފައިވާ ކޯޗެކެވެ. މުޙައްމަދު އާދަމްގެ އިރުޝާދުގެ ދަށުން މީގެ މަހެއްހާ ދުވަސް ކުރިން ޒުވާން ޓީމުން ވަނީ ފަރިތަކުރުންތައް ފަށާފައެވެ.