ސުއަރޭޒް ގައުމީ ޓީމަށް ކުޅުން ހުއްޓާލަން ނިންމައިފި

އުރުގުއޭގެ ފޯވާޑް ލުއިސް ސުއަރޭޒް, ގައުމީ ޓީމަށް ކުޅުން ހުއްޓާލަން ނިންމައިފިއެވެ.

އުމުރުން 37 އަހަރުގެ ސުއަރޭޒް ބުނީ، އަންނަ ހޮނިހިރު ދުވަހު ފީފާ ވޯލްޑްކަޕްގެ ކޮލިފައިންގައި ޕެރަގުއޭއާ ދެކޮޅަށް އުރުގުއޭ ކުޅުމަށް ހަމަޖެހިފައިވާ މެޗަކީ ގައުމީ ޓީމަށް އޭނާ ކުޅޭނެ އެންމެ ފަހު މެޗު ކަމަށެވެ.

"މިހެން ބުނަން ވަރަށް ދެރަވޭ، އެކަމަކު ހޮނިހިރު ދުވަހަކީ އަހަރެން ގައުމީ ޓީމާއެކު ކުޅޭ އެންމެ ފަހު މެޗު،" ނޫސްވެރިންނާ ވާހަކަދައްކަމުން ސުއަރޭޒް ބުންޏެވެ.

2007 އިން ފެށިގެން އުރުގުއޭއަށް ކުޅެމުން އަންނަ ސުއަރޭޒް ބުނީ، މިއީ ގައުމީ ޓީމަށް ކުޅުން ހުއްޓާލަން އެންމެ ރަނގަޅު ވަގުތު ކަމަށް އޭނާ ގަބޫލުކުރާ ކަމަށެވެ.

އުރުގުއޭގެ ގައުމީ ޓީމަށް މިހާތަނަށް އެންމެ ގިނަ ލަނޑުޖަހައިދީފައިވާ ސުއަރޭޒް ވަނީ އެ ޓީމަށް ކުޅުނު 142 މެޗުގައި 69 ގޯލް ޖަހައިފައެވެ. އޭނާ ވަނީ އެ ޓީމާއެކު ހަތަރު ވޯލްޑް ކަޕާއި، ކޮޕާ އެމެރިކާގެ ފަސް މުބާރާތުގައި ކުޅެފައެވެ. އޭގެތެރެއިން، 2011 ވަނަ އަހަރުގެ ކޮޕާ އެމެރިކާ ފުޓްބޯޅަ މުބާރާތް ކާމިޔާބުކޮށްފައިވެއެވެ.

ކުރީން، ލިވަޕޫލާއި ބާސެލޯނާ އަށް ކުޅެފައިވާ ސުއަރޭޒް މިހާރު ކުޅެމުން އަންނަނީ، އޭނާގެ އެކުވެރި ލިއޮނަލް މެސީ އާއެކު އެމެރިކާގެ މޭޖާ ލީގު ސޮކާގެ އިންޓަ މިއާމީ އަށެވެ. މި ދެ ކުޅުންތެރިން އެކުގައި 2014 އިން 2020 އާ ދެމެދު ބާސެލޯނާގައި ވަނީ ކުޅެފައެވެ. ސުއަރޭޒް ކުރީން ކުޅެފައިވާ ޓީމުތަކުގެ ތެރޭގައި، ނެދަލެންޑްސްގެ އަޔެކްސް އެމްސްޓެޑަމް އާއި ސްޕެއިނުގެ އެތުލެޓިކޯ މެޑްރިޑް އަދި ބްރެޒިލްގެ ގްރެމިއޯ ހިމެނެއެވެ.