ސަރަޙައްދީ މީޑިއާތަކުގެ އެންމެ ބޮޑު ބައްދަލުވުން، 19ވަނަ އޭޝިއާ މީޑިއާ ސަމިޓް ފަށައިފި
-
މިފަހަރުގެ ސަމިޓްގައި 44 ގައުމުން ބައިވެރިވޭ
-
މީޑިއާގެ އެކި ދާއިރާތަކުން 300އަށްވުރެ ގިނަ މީހުން ބައިވެރިވޭ
-
މީޑިއާތައް ހަރުދަނާކުރުމަށް ޕެނަލްތައް ކުރިއަށްގެންދާނެ
ސަރަޙައްދީ މީޑިއާތަކުގެ އެންމެ ބޮޑު ބައްދަލުވުން، "އޭޝިއާ މީޑިއާ ސަމިޓް"ގެ 19 ވަނަ ބައްދަލުވުން ފަށައިފިއެވެ. މިފަހަރުގެ ބައްދަލުވުން ކުރިއަށްދަނީ މެލޭޝިއާގައެވެ.
އޭޝިއާ ޕެސިފިކް އިންސްޓިޓިއުޓް ފޮރ ބްރޮޑްކާސްޓިންއިން ބާއްވަމުން އަންނަ މި ސަމިޓަކީ އެޖަމްޢިއްޔާއިން ކޮންމެ އަހަރަކު ތާވަލުކޮށްގެން ބާއްވަމުން އަންނަ އެންމެ ބޮޑު ހަރަކާތެވެ.
މިއަހަރުގެ ސަމިޓުގައިވެސް އޭޝިއާގެ ޤައުމުތަކާއި ދެކުނުގެ ބޮޑެތި ޤައުމުތަކުން އިސް މީހުން ބައިވެރިވެއެވެ. އެގޮތުން މަތީ ފަންތީގައި ފާހަގަކޮށްލެވޭ މީޑިއާތަކާއި ދާއިރާގައި މަޝްހޫރު މީހުން ހިމެނޭހެން 44 ޤައުމުން 300އަށްވުރެ ގިނަ މީހުން މިއަހަރުގެ ސަމިޓްގައި ބައިވެރިވެއެވެ. މީގެތެރޭގައި އޭޝިއާ، ޔޫރަޕް އަދި އެފްރިކާގެ ޤައުމުތައް ހިމެނެއެވެ. އަދި ދުނިޔޭގެ ބައެއް ބޮޑެތި ޖަމްޢިއްޔާ ޖަމާޢަތްތައް ހިމެނެއެވެ.
މިފަހަރުގެ ސަމިޓް ޚާއްސަކޮށްފައިވަނީ ބަދަލުވަމުންދާ ދުނިޔޭގައި އެއްވެސް މީހަކު ބާކީ ނުކޮށް ޚަބަރާއި މައުލޫމާތު ލިބޭނެ ގޮތްތައް ފަހިކޮށްދިނުމާއި ޒަމާނީ ގޮތްތަކަށް މީޑިއާތަކުގެ މަސައްކަތްތައް ބައްޓަންކުރުމާއި ގުޅޭގޮތުންނެވެ. އެގޮތުން މީޑިއާތަކުގެ މަސައްކަތްތަކުގައި އަރޓިފިޝަލް އިންޓެލިޖެންސްގެ ޒަމާނީ ވަސީލަތްތައް ބޭނުންކުރާނެ ގޮތްތަކާ ގުޅޭގޮތުން ސަމިޓްގެ ޕެނަލްތަކުގައި ފުޅާ ދާއިރާއެއްގައި މަޝްވަރާކުރާނެއެވެ.
ސަމިޓްގެ ކުރިން، ކުރިމަގަށް މީޑިއާތައް ތައްޔާރުކުރުމާއި ގުޅޭ ގިނަ ވޯކްޝޮޕްތަކެއް ވަނީ ބާއްވާފައެވެ. ވޯކްޝޮޕްތަކުގައި ވަނީ، މި ދާއިރާއިން ފުޅާ ދާއިރާއެއްގައި މީޑިއާތަކާ މަޢުލޫމާތު ހިއްސާކޮށްފައެވެ. އަދި ޚަބަރާއި މަޢުލޫމާތު ފެތުރުމުގައި ސޯޝަލް މީޑިއާގެ ވަސީލަތްތައް ނަހަމަގޮތުގައި ބޭނުންކުރުން ހުއްޓުމަށް މަސައްކަތްކުރުމާއި ގުޅޭގޮތުން ވަނީ މަޢުލޫމާތު ދީފައެވެ. މީގެއިތުރުން މީޑިއާތަކުން ގެނެސްދޭ ކޮންޓެންޓް ރަނގަޅުކުރުމާއި ހިންގުމުގެ ނިޒާމު ހަރުދަނާކުރުމާއި ގުޅޭގޮތުން ވަނީ ވޯކްޝޮޕްތައް ހިންގާފައެވެ.
އޭޝިއާ މީޑިއާ ސަމިޓް ބާއްވަން ފަށާފައިވަނީ 2004 ވަނަ އަހަރުއެވެ. މިސަމިޓްގެ އެންމެ ބޮޑު ބޭނުމަކަށް ވަނީ މީޑިއާތަކާއި މިދާއިރާގައި މަސައްކަތް ކުރާ ފަރާތްތައް އެއްތަނަކުން ބައްދަލުވެ، މީޑިއާގެ ދާއިރާ ކުރިއެރުވުމަށް ގެންނަންޖެހޭ ބަދަލުތަކާއި ގުޅޭގޮތުން މަޝްވަރާކޮށް ޚިޔާލު ބަދަލުކުރުމެވެ. އަދި ކުރިއަރާފައިވާ މީޑިއާތަކުގެ ތަޖުރިބާ ހިއްސާކުރުމެވެ.