އޯލެވެލް އަދި އޭލެވެލްގެ ސައްޙަ ނޫން ސަނަދު ބޭނުންކުރާކަމުގެ މައްސަލަތަކެއް ފުލުހުންނަށް ހުށަހަޅައިފި
-
ފަހަކަށް އައިސް ޞައްޙަ ނޫން ސަނަދު ބޭނުންކުރުމުގެ 2 މައްސަލަ ހުށައަޅާފައިވޭ
-
ޞައްޙަ ނޫން ސަނަދު ބޭނުންކޮށްގެން މަންފާ ހޯދާ މީހުން ރާއްޖޭގައި އުޅޭ
އޯލެވެލް އަދި އޭލެވެލްގެ ޞައްޙަ ނޫން ސަނަދު ބޭނުންކުރާކަމުގެ މައްސަލަތަކެއް ދިވެހި ފުލުހުންގެ ޚިދުމަތަށް ހުށައަޅާފައިވާކަމަށް މޯލްޑިވްސް ކޮލިފިކޭޝަންސް އޮތޯރިޓީ، އެމްކިޔުއޭއިން ވިދާޅުވެއްޖެއެވެ.
އެމް.ކިޔު.އޭއިން ވިދާޅުވީ، އޯލެވެލް އަދި އޭލެވެލްގެ ޞައްޙަ ނޫން ސަނަދު ބޭނުންކުރާކަމުގެ 2 މައްސަލައެއް ދިވެހި ފުލުހުންގެ ޚިދުމަތަށް ހުށައަޅާފައިވާ ކަމަށެވެ. އަދި އެފަދަ އިތުރު މައްސަލައެއް ފުލުހުންނަށް ހުށައެޅުމުގެ މަސައްކަތްކުރަމުންދާކަމަށް އެމްކިޔުއޭއިން ވިދާޅުވިއެވެ.
އޯލެވެލް ނުވަތަ އޭލެވެލްގެ ސަނަދުތަކުގައި ހުންނަ ގުރޭޑު ބަދަލުކޮށް ޞައްޙަ ނޫން ސަނަދު ބޭނުންކޮށްގެން، މަންފާ ހޯދައި މީހުން ރާއްޖޭގައި އުޅޭކަން އެމް.ކިޔު.އޭއިން ފާހަގަކުރެއެވެ. މިކަމާ ގުޅިގެން މަތީ ތަޢުލީމުދޭ މަރުކަޒުތަކުން ދަރިވަރުންނަށް އެންރޯލްމެންޓް ނުވަތަ ޕްލޭސްމެންޓް ދިނުމުގައި އޯލެވެލް އަދި އޭލެވެލް ސަނަދުތަކަކީ ޞައްޙަ ސަނަދުތަކެއްކަން ކަށަވަރުކުރުމަށް އެމް.ކިޔު.އޭއިންވަނީ އެދިފައެވެ.
އެމް.ކިޔު.އޭއިން ވިދާޅުވީ ޞައްޙަ ނޫން ސަނަދުތައް ބޭނުންކުރުމާ ގުޅިގެން އެ އޮތޯރިޓީއަށް ހުށައެޅޭ މައްސަލަތައް ބަލައި ފުލުހުންނަށް ހުށައަޅަމުންދާނެ ކަމަށެވެ.