އިޓާލިއަން ލީގުގައި ރޭ ކުޅުނު މެޗުގައި އޭއެސް ރޯމާއާ ދެކޮޅަށް ލަނޑެއް ނުޖެހި އެއްވަރުވެ، ޔުވެންޓަސްގެ މޮޅުވުމުގެ ރިކޯޑު ނިމުމަކަށް އަތުވެއްޖެއެވެ.
މި ނަތީޖާއާއެކު ޔުވެންޓަސް ވަނީ ލީގު ތާވަލްގެ ދެވަނަ އަށް ވެއްޓިފައެވެ. ޔުވެންޓަސްގެ އިތުރުން އެންމެ ކުރީގައި އުޅޭ އިންޓަ މިލާނާއި، ޓޮރީނޯ އަދި އުދިނޭޒީ އަށް ވެސް ތިން މެޗުން ލިބިފައިވަނީ ހަތް ޕޮއިންޓެވެ. އިންޓަ އަށް ކުރިލިބެނީ ޖެހި ގޯލްގެ ތަފާތުންނެވެ.
ޔުވެންޓަސްގެ އެލިއާންޒް ސްޓޭޑިއަމްގައި ރޭ ކުޅުނު މި މެޗުގައި އެ ޓީމަށް ލަނޑުޖަހަން ލިބުނު އެންމެ ރަނގަޅު ފުރުޞަތުގައި ފުރަތަމަ ހާފުގައި ސާބިއާގެ ފޯވާޑް، ޑޫސާން ވްލާހޮވިޗް ފޮނުވާލި ބޯޅަ ރޯމާގެ ގޯލްކީޕަރު، މިލޭ ސްވިލާ ވަނީ މަތަކޮށްފައެވެ.
ދެވަނަ ހާފުގައި ދެ ޓީމުގެ ކޯޗުން ގެނައި ބަދަލުތަކާއެކު ވެސް ނަތީޖާއަށް ބަދަލުގެނައުމުގައި ނާކާމިޔާބުވެފައެވެ. އިތުރުވަގުތުގެ ތެރޭގައި ރޯމާގެ އެންޖެލީނޯ ފޮނުވާލި ބޯޅަ ދަނޑިކައިރިން ކިރިޔާ ބޭރަށް ދިޔައިރު، ޔުވެންޓަސްގެ ތުރުކީ ފޯވާޑް، ކެނާން ޔިލްޑީޒް ފޮނުވާލި ބޯލަ ދިޔައީ ހުރަސްދަނޑިމަތިންނެވެ.
މިއީ ލީގުގައި އެންމެ ފުރަތަމަ ކުޅުނު ތިން މެޗަށްފަހު ރޯމާ އަށް މޮޅެއްނުލިބި ޖެހިޖެހިގެން ފުރިހަމަކުރި ދެވަނަ ސީޒަނެވެ. މީގެކުރީން، 2010-2011 އާއި 2011-2012 ވަނަ އަހަރުގެ ސީޒަނުގެ ލީގުގައި އެންމެ ފުރަތަމަ ކުޅުނު ތިން މެޗުން އެ ޓީމަށް މޮޅެއް ނުލިބުނެވެ.
މި މުބާރާތުގައި ރޭ ކުޅުނު އެހެން މެޗުތަކަށް ބަލާއިރު، ޖެނޯއާގެ ދަނޑުގައި 0-2 އިން ހެލާސް ވެރޯނާ ވަނީ މޮޅުވެފައެވެ. އަމިއްލަ ދަނޑުގައި އުދިނޭޒީ އިން ވަނީ 1-0 އިން ކޯމޯ ބަލިކޮށްފައެވެ.
ލީގުގައި ޔުވެންޓަސް ދެން ކުޅޭ މެޗުގައި ކުރިއަށް އޮތް އިންޓަނޭޝަނަލް ބްރޭކަށްފަހު މި މަހުގެ 15 ވާ އާދީއްތަ ދުވަހު ރަށުން ބޭރުގައި ނިކުންނާނީ އެމްޕޯލީއާ ދެކޮޅަށެވެ. އެއަށްފަހު، މި މަހުގެ 17 ވަނަ ދުވަހު ޔުއެފާ ޗެމްޕިއަންސް ލީގުގައި އަމިއްލަ ދަނޑުގައި ބައްދަލުކުރާނީ ނެދަލެންޑްސްގެ ޕީއެސްވީ އެއިންދޯވަންއާ އެވެ. ރޯމާ އަށް ދެން އޮތީ ރަށުން ބޭރުގައި ޖެނޯއާ އާ ބައްދަލުކުރާ މެޗެވެ.