ޓީ20 ވޯލްޑް ކަޕް ކޮލިފައިންގެ އޭޝިއާ ކޮލިފަޔާ އޭގައި ރާއްޖޭގެ ގައުމީ ކްރިކެޓް ޓީމުން މެލޭޝިއާ އާއި ސިންގަޕޫރާ ދެކޮޅަށް ކުޅުނު ފުރަތަމަ ދެ މެޗުން ބަލިވެއްޖެއެވެ.
ޖުމްލަ ހަތް ގައުމު ވާދަކުރާ ކޮލިފައިންގައި ރާއްޖެއިން ވަނީ މެލޭޝިއާ އަތުން 94 ލަނޑުން ބަލިވެފައެވެ. އަދި ދެވަނަ މެޗުގައި އިއްޔެ ސިންގަޕޫރު އަތުން ބަލިވެފައިވަނީ 47 ލަނޑުންނެވެ.
މެލޭޝިއާ އަތުން ބަލިވި މެޗުގެ ޓޮސް ދިމާވުމުން ރާއްޖެއިން ނިންމީ ހޮވާށެެވެ. އެގޮތުން ފުރަތަމަ އިނިންގްސްގައި މެލޭޝިއާއިން ކުޅެން އަރާ 20 އޯވަރުގެ ތެރޭގައި ތިން ކުޅުންތެރިން ނުބައިވެގެން 203 ލަނޑު ހެދިއެވެ.
މެލޭޝިއާ އިން އެންމެ ރަނގަޅަށް ކުޅުނީ 43 ބޯޅައިން 59 ލަނޑު ހެދި ޓީމުގެ ކެޕްޓަން ސައީދު އަޒީޒެވެ.
ޖަވާބުގައި ރާއްޖޭން ކުޅެން އަރާ 20 އޯވަރުގެ ތެރޭގައި ހަ ކުޅުންތެރިން ނުބައިވެގެން ހެދުނީ 109 ލަނޑެވެ. ރާއްޖޭން އެންމެ ރަނގަަޅަށް ކުޅުނީ ޓީމުގެ ވައިސް ކެޕްޓަން، އާދަމް ނާސިފް އުމަރެވެ. އޭނާ ވަނީ 32 ބޯޅައިން 46 ލަނޑު ހަދާފައެވެ.
ސިންގަޕޫރުން ރާއްޖެއާ ދެކޮޅަށް ކުޅުނު މެޗުގައި ޓޮސް ދިމާވުމުން، ނިންމީ ކުޅެން އަރާށެވެ. ސިންގަޕޫރަށް 20 އޯވަރުގެ ތެރޭގައި ހަތް ކުޅުންތެރިން ނުބައިވެގެން ހެދުނީ 153 ލަނޑެވެ.
ޖަވާބުގައި ރާއްޖޭން ކުޅެން އަރާ 20 އޯވަރުގެ ތެރޭގައި އަށް ކުޅުންތެރިން ނުބައިވެގެން ހެދުނީ 106 ލަނޑެވެ. އެންމެ ރަނގަޅަށް ކުޅުނީ ނުބައިނުވެ 25 ލަނޑު ހެދި މުހައްމަދު ޝިޔާމް އާއި 14 ބޯޅައިން 20 ލަނޑު ހެދި އިސްމާއިލް އަލީއެވެ.
ކޮލިފައިންގައި ރާއްޖެ ދެން ކުޅޭ މެޗުގައި، ހޯމަ ދުވަހު ކުޅޭނީ ކުވެއިތުއާ އެވެ. އަދި އަންގާރަ ދުވަހު، ހޮންގް ކޮންގާ ކުޅުމަށް ފަހު، އެއް ދުވަހުގެ ބްރޭކެއް ލިބޭނެ އެވެ. އެ ބްރޭކަށް ފަހު ފުރަތަމަ މެޗުގައި، މިޔަންމާއާ ކުޅުމަށް ފަހު ކޮލިފައިން ފަހު މެޗުގައި ބައްދަލުކުރާނީ، މޮންގޯލިއާއާ އެވެ.