އަންނަ ސީޒަނަށް އެންމެ ފުރަތަމަ ތައްޔާރީތައް ފެށި މާޒިޔާ ސްޕޯޓްސް އެންޑް ރެކްރިއޭޝަނަށް އުމުރުން 15 އަހަރުގެ އުންމީދީ ތަރި މުޙައްމަދު އިލާން އިމްރާން ސޮއިކޮށްފިއެވެ.
ރާއްޖޭގެ ލީގު ޗެމްޕިއަން މާޒިޔާއާ ގުޅުނުއިރު، އިލާން ވަނީ މިދިޔަ ސީޒަނުގައި ވެސް މާޒިޔާއާއެކު ފަރިތަކުރުންތަކުގައި ބައިވެރިވެފައެވެ. އިލާން އަކީ ދިވެހި ފުޓުބޯޅައިގެ ރިކޯޑުތަކެއް ދަހަމައްޓަމުން އަންނަ ކުޅުންތެރިއެކެވެ.
މިދިޔަ ސީޒަނުގެ ކުލަބު ވެލެންސިއާއަށް ކުޅުނު އިލާން ވެފައިވަނީ ރާއްޖޭގެ ފުރަތަމަ ޑިވިޝަނުގެ ލީގުގައި ލަނޑު ޖެހި އުމުރުން އެންމެ ހަނގު ކުޅުންތެރިޔާއަށެވެ. އޭނާ މި ރިކޯޑު ގާއިމުކޮށްފައިވަނީ ކުލަބު ގްރީން ސްޓްރީޓްސް ކޮޅަށް ލަނޑު ޖަހައިގެންނެވެ.
މާޒިޔާއާ ގުޅުނުއިރު، އިލާން ދަނީ 17 އަހަރުން ދަށުގެ ގައުމީ ޓީމާ އެކު، ސާފް ޗެމްޕިއަންޝިޕާއި އޭޝިއަން ކަޕް ކޮލިފިކޭޝަނަށް ތައްޔާރުވާން ފަރިތަކުރުންތަކުގައި ބައިވެރިވަމުންނެވެ.
އިލާން އެންމެ ބޮޑަށް ވިދާލީ 2022 ވަނަ އަހަރު ބޭއްވި އެފްއޭއެމް 14 އަހަރުން ދަށުގެ ޔޫތު ލީގާއި 2023 ވަނަ އަހަރު ބޭއްވި 15 އަހަރުން ދަށުގެ އިންޓަ ސްކޫލް ފުޓްބޯޅަ މުބާރާތުގައެވެ. އޭނާ ވަނީ މި ދެ މުބާރާތުގައި ތަފާތު މޮޅު ކުޅުމެއް ދައްކާފައެވެ. އަދި ގިނަ ލަނޑުތަކެއްވެސް އޭނާ ޖެހިއެވެ. އެގޮތުން ޔޫތު ލީގުގައި ކުޅުނު އަށް މެޗުން 35 ލަނޑު އޭނާ ވަނީ ޖަހާފައެވެ. އަދި އިންޓަސްކޫލު މުބާރާތުގެ މޮޅު ކުޅުންތެރިޔާގެ މަގާމުވެސް ހޯދިއެވެ.
މާޒިޔާއިން ތައްޔާރީތައް ފެށިއިރު، އެ ޓީމުން ވަނީ މިސީޒަނަށް ސާބިއާގެ ކޯޗު ޑްރަަގަން ޑުކަނޯވިޗް ގެނެސްފައެވެ. އަދި ހުނަރުވެރި މިޑްފިލްޑަރު އަހުމަދު އައިހަމް ޓީމާ ގުޅުނުއިރު މާޒިޔާ އެކަޑަމީގެ ދެ ކުޅުންތެރިން ކަމަށްވާ، އަނޫފް އަބްދުﷲ އާއި މުހައްމަދު އައިމަން އަހުމަދު ވަނީ ސީނިއާ ޓީމަށް ޕްރޮމޯޓްކޮށްފަ އެވެ.