"ސިނަމާލެ ބްރިޖުގެ މަސައްކަތް މިނިސްޓްރީއާ ހަވާލުކުރި ފަހުން ލޭނުގެ އަދަދަށް ބަދަލެއް ނުގެނޭ"

2014 ވަނަ އަހަރުގެ ފަހުކޮޅު ސިނަމާލެ ބްރިޖް މަޝްރޫއުގެ މަސައްކަތް ހައުސިންގ މިނިސްޓްރީއާ ހަވާލުކުރިފަހުން ބްރިޖުގެ ލޭނުގެ އަދަދަށް ބަދަލެއްގެނެސްފައި ނުވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސް މިހެން ވިދާޅުވީ ސިނަމާލެ ބްރިޖުގެ ލޭނެއް މަދުކަމަށާއި އެކަމުގެ ޒިންމާ އޭރުގެ ހައުސިން މިނިސްޓަރުކަމުގައި ހުންނެވިއިރު އެމަނިކުފާނު ނަންގަވަންޖެހޭކަމަށް ދެކެވޭ ވާހަކަތަކަށް ރައްދުދެއްވައެވެ.

އަމިއްލަ ޓީވީ ޗެނަލަކަށް ދެއްވި ޚާއްސަ ބަސްދީގަތުމެއްގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ ސިނަމާލެ ބްރިޖަކީ ރާއްޖޭގެ ރައްޔިތުންގެ ތަރައްގީއަށް ހިންގި މުހިންމު މަޝްރޫއެއް ކަމަށާއި އެމަނިކުފާނު ހައުސިން މިނިސްޓަރުކަމުގައި ހުންނަވައިގެން ކުރިއަށްގެންދެވި އެންމެ މުހިންމު އެއް މަޝްރޫއުކީވެސް ބްރިޖް މަޝްރޫޢުކަމަށެވެ.

އެ މަޝްރޫއުގެ މަސައްކަތް އޭރުގެ ސަރުކާރުން ހައުސިން މިނިސްޓްރީއާ ހަވާލުކުރީ 2014ވަނަ އަހަރުގެ ފަހުކޮޅުގައި ކަމަށާއި މަޝްރޫއު ކުރިއަށްގެންދިއުމުގައި ބެއްލެވީ ވީހާވެސް ފެންވަރު ރަނގަޅަށް ބަޖެޓުގެ ތެރެއިން ކަނޑައެޅުނު މުއްދަތުގެ ތެރޭގައި މަޝްރޫޢުގެ މަސައްކަތް ނިންމުމަށް ކަމަށެވެ.

ބްރިޖުގެ މަސައްކަތް ކުރިއަށްދާގޮތް ވަރަށް ކައިރިން ބައްލަވަމުން ގެންދެވިކަން ފާހަގަކުރައްވައި ރައީސުލްޖުމްހޫރިއްޔާ ވިދާޅުވީ އެ މިނިސްޓްރީއާ ހަވާލުކުރި ފަހުން ލޭނުގެ އަދަދަށް ބަދަލެއް ގެނެސްފައިނުވާނެ ކަމަށެވެ.

"ޕްރީ ފީޒިބިލިޓީ ސްޓޭޖާއި ފީޒިބިލިޓީ ސްޓޭޖާއި ކޮންސެޕްޓް ޑިޒައިނިންއާއި ޑީޓެއިލް ޑިޒައިނާ މިހުރިހާ މަރުހަލާއެއް ދިޔައީ އޭގެ ފަހުން (ސެޕްޓެމްބަރު 2014ގެ ފަހުން) އަޅުގަނޑުގެ ބެލުމުގެ ދަށުން. އެއްވެސް އިރެއްގައި ލޭނުގެ އަދަދު ބަދަލުވެފައެއް ނެތް. އެންމެ ފުރަތަމަވެސް އަޅުގަނޑާ ހަވާލުވި ހިސާބުން އޮތީ ހަމަ ކޮޅަކަށް ދެލޭން. ދެން ސައިޑްގައި ޕެޑެސްޓްރިއަން ނުވަތަ ބައިސްކަލް ލޭންގެ ގޮތުގައި ކަނޑައެޅި ލޭން އެއޮތީ،" ރައީސް ވިދާޅުވިއެވެ.

ރައީސް ވިދާޅުވީ ހައުސިން މިނިސްޓްރީއާ މަޝްރޫއު ހަވާލުކުރުމުގެ ކުރިން އެ މަޝްރޫއާ ގުޅޭ އެއްވެސް ކަމެއް އެމަނިކުފާނަށް އެނގިވަޑައުނުގަންނަވާކަމަށެވެ. އެހެނީ އޭރު އެފަދަ މަޝްވަރާތައް ކުރެވުނު އިކޮނޮމިކް އެންޑް ޔޫތު ކައުންސިލުގައި އެމަނިކުފާނު ހިމެނިވަޑައިނުގަންނަވާކަމަށް ރައީސް ފާހަގަކުރެއްވިއެވެ.

ސިނަމާލެ ބްރިޖުގައި ލޭނެއް އިތުރުކުރުމަށް މަޝްރޫއުގެ މަސައްކަތް ނިމެން ކައިރިވެފައިވަނިކޮށް އޭރުގެ ރައީސް އަބްދުﷲ ޔާމީން އެދިވަޑައިގަތުމުން އެކަން ކުރެވޭތޯ ބެއްލެވިނަމަވެސް އެބަދަލު ގެނެވެން ނެތްކަމަށް އޭރުގެ ހައުސިންގ މިނިސްޓަރުކަމުގައި ހުނެނެވި އަދުގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.