"ލިބުނީ އިންޒާރެއް ކަމަށް ނުބަލަން، ބީޑަބްލިއުއެފްގެ ބަހެއް ލިބުމަކީ މައްސަލަތައް ހައްލުކުރުމަށް ލިބިގެންދިޔަ ކުރިއެރުމެއް"
ދުނިޔޭގެ ބެޑްމިންޓަން ފެޑެރޭޝަން (ބީޑަބްލިއުއެފް) އިން ދިނީ އިންޒާރެއް ކަމަށް ނުބަލާ ކަމަށާއި، އެ ފެޑެރޭޝަނުގެ ބަހެއް ލިބުމަކީ ބެޑްމިންޓަންގައި ހުރި މައްސަލަތައް ހައްލުކުރުމަށް ލިބިގެންދިޔަ އިތުރު ކުރިއެރުމެއް ކަމަށް ކޮމިޝަނަރ އޮފް ސްޕޯޓްސް މުޙައްމަދު ޠަލާލް ވިދާޅުވެއްޖެއެވެ.
މި މަހުގެ މެދުތެރޭގައި ކޮމިޝަނަރ އޮފް ސްޕޯޓްސް ޠަލާލް، އެކްސްގައި ކުރެއްވި ޕޯސްޓެއްގައި ވިދާޅުވީ ބެޑްމިންޓަން އެސޯސިއޭޝަން އޮފް މޯލްޑިވްސް (ބީއޭއެމް) ގެ ހިންގުން ވަގުތީ ގޮތުން އެ އެސޯސިއޭޝަންގެ މުއައްސިސް (ކުޅިވަރާ ބެހޭ ގައުމީ މަޖިލިސް) އާ ހަވާލު ކުރުމަށް ނިންމައި، އެކަން އެ އެސޯސިއޭޝަނަށް އަންގާފައިވާ ކަމަށެވެ. އަދި އެސޯސިއޭޝަންގެ އައު ހިންގާ ކޮމިޓީ އިންތިޚާބު ކުރުމަށްޓަކައި ކުރަންޖެހޭ މަސައްކަތްތައް ކުޅިވަރާ ބެހޭ ގައުމީ މަޖިލީހުގެ މަޝްވަރާއާއެކު ފަށާފައިވާ ކަމަށްވެސް ވިދާޅުވިއެވެ.
އެކަމަކު ބީޑަބްލިއުއެފް އިން މޯލްޑިވްސް އޮލިމްޕިކް ކޮމިޓީ (އެމްއޯސީ) އަށް ފޮނުވި ސިޓީއެއްގައި ބުނެފައިވާ ގޮތުގައި ބީއޭއެމްގެ ހިންގުން ކުޅިވަރާ ބެހޭ ގައުމީ މަޖިލީހާ ހަވާލުކުރީ، މި އަހަރު ފަހުކޮޅު އެ އެސޯސިއޭޝަންގެ އިންތިޚާބު ބޭއްވުމަށް މަގުފަހި ކުރުމަށް ތިން މެންބަރުންގެ އެޑްހޮކް ކޮމިޓީއެއް އެކުލަވާލުމަށް މަޝްވަރާ ކުރަމުންދަނިކޮށެވެ. އަދި ބީއޭއެމްގެ ހިންގުން ކުޅިވަރާ ބެހޭ ގައުމީ މަޖިލީހާ ހަވާލުކޮށްފައިވާ ނިންމުން ބަދަލުނުކޮށް ކުރިއަށްދާން ނިންމައިފިނަމަ، ބީއޭއެމަށް އެކަމުގެ ނޭދެވޭ އަސަރު ފޯރާނެ ކަމަށް ބެލެވޭތީ ރާއްޖެއަށް ފިޔަވަޅު އަޅަން ބީޑަބްލިއުއެފްގެ ކައުންސިލަށް ހުށަހަޅަން ޖެހިދާނެ ކަމަށްވެސް ވަނީ ބުނެފައެވެ.
މީގެ އިތުރުން ސްޕޯޓްސް ކޮމިޝަނަރުގެ ނިންމުމާ ދެކޮޅަށް ބީއޭއެމް އިން ވަނީ ސިވިލް ކޯޓަށް މައްސަލަވެސް ހުށަހަޅާފައެވެ. އަދި އެ މައްސަލައިގެ އަޑުއެހުމެއް އަންނަ އާދިއްތަ ދުވަހުގެ މެންދުރު ފަހަށް ވަނީ ތާވަލުކޮށްފައެވެ.
މިކަމާ ގުޅިގެން "ޕީއެސްއެމް ސްޕޯޓްސް" އަށް މައުލޫމާތުދެއްވަމުން ޠަލާލް ވިދާޅުވީ ބީއޭއެމްގެ ހިންގުން ކުޅިވަރާ ބެހޭ ގައުމީ މަޖިލީހާ ހަވާލުކުރަން ނިންމީ އެ އެސޯސިއޭޝަނުގެ ގިނަ މައްސަލަތަކެއް ފެންމަތިވެ، ބެޑްމިންޓަން ކޮމިއުނިޓީ އާއި ކުޅުންތެރިންގެ ގިނަ ޝަކުވާތަކެއް ލިބެމުން އައުމާއެކު، އެ މައްސަލަތައް ހައްލުކޮށް، އިދާރީ ގޮތުން ކުރަން ޖެހޭ ކަންކަން ކުރުމަށް މަގުފަހިކޮށްދިނުމުގެ މަގުސަދުގައި ކަމަށެވެ. އަދި ބީއޭއެމްގައި ހުރި މައްސަލަތައް ހައްލުކުރުމަށް އެ އެސޯސިއޭޝަނުގެ ހިންގާ ކޮމިޓީގެ ފަރާތުން އެއްބާރުލުން ލިބިފައިނުވާކަންވެސް ޠަލާލް ވަނީ ފާހަގަކުރައްވާފައެވެ.
ޠަލާލް ވިދާޅުވީ ކަންކަން ހިނގަމުންދާ ގޮތާއި، ކަމުގެ ހަގީގަތް އެސޯސިއޭޝަނުން ބީޑަބްލިއުއެފް އަށް ވަރަށް ބޮޑަށް އޮޅުވާލާފައިވާކަން ފާހަގަކުރެވިފައިވާ ކަމަށެވެ. އަދި ބީޑަބްލިއުއެފް އިން އައީ އިންޒާރެއް ކަމަށް ނުބަލާ ކަމަށާއި، ބީޑަބްލިއުއެފްގެ ބަހެއް ލިބުން އެއީ ބެޑްމިންޓަންގައި ހުރި މައްސަލަތައް ހައްލުކުރުމަށް ކުރާ މަސައްކަތަށް ލިބިގެންދިޔަ އިތުރު ކުރިއެރުމެއް ކަމަށްވެސް ވަނީ ވިދާޅުވެފައެވެ.
މީގެ އިތުރުން ޠަލާލް ވަނީ ބީޑަބްލިއުއެފް އިން އެމްއޯސީ އާއެކު ކުރިއަށްގެންދަމުން އަންނަ މަޝްވަރާތަކަށް ފުރިހަމަ އެއްބާރުލުން ދެއްވާނެ ކަމަށްވެސް ވިދާޅުވެފައެވެ. އެގޮތުން އެޑްހޮކް ކޮމިޓީ އެކުލަވާލުމުގައިވެސް އެމްއޯސީ އާއި ބީޑަބްލިއުއެފްގެ މަޝްވަރާ އާއެކު ރަނގަޅު ކުރިއެރުން ލިބޭނެ ކަމަށް ގަބޫލުކުރާ ކަމަށްވެސް ވިދާޅުވިއެވެ.
ޠަލާލް ވިދާޅުވީ ބީޑަބްލިއުއެފްގެ ނިންމުންތަކަށް ގޮންޖަހައި، ގޮތްދޫނުކުރުމުގެ ވިސްނުމެއް ނެތް ކަމަށާއި، ބެޑްމިންޓަންގެ ކުރިއެރުމަށް، އެ ކުޅިވަރު ރަނގަޅު ކުރުމަށް ކުރަންޖެހޭ ކޮންމެ ކަމެއްގައި މަޝްވަރާކޮށް، ދޫދޭންޖެހޭ ކަންކަމުގައި ދޫދޭނެ ކަމަށެވެ.
ބީއޭއެމްގެ ހިންގާ ކޮމިޓީގެ މުއްދަތު ހަމަވެފައި އޮންނަތާ ފަސް މަހަށް ވުރެ ގިނަ ދުވަސް ވެފައިވާއިރު، އެ އެސޯސިއޭޝަނުން އެންމެ ފަހުން ހިންގާ ކޮމިޓީ އިންތިޚާބުކޮށްފައިވަނީ 2021 ވަަނަ އަހަރުގެ ފެބްރުއަރީ މަހެވެ. މިދިޔަ ޖުލައި މަހުގެ މެދު ތެރޭގައި ބީއޭއެމްގެ ރައީސްގެ މަގާމުން މޫސާ ނާޝިދު (މޫސަ) ވަނީ އިސްތިއުފާ ދެއްވާފައެވެ. ނަމަވެސް އެ އެސޯސިއޭޝަނުގެ ރައީސްކަން މިދިޔަ ތިން ދައުރުގައި ކުރެއްވި މޫސަ އިސްތިއުފާދެއްވާފައިވަނީ މަގާމުގެ މުއްދަތު ހަމަވިތާ ހަތަރު މަސް ފަހުންނެވެ.
މީގެ އިތުރުން މިދިޔަ ފަސް ވަރަކަށް މަސް ދުވަހުގެ ތެރޭގައި ބީއޭއެމްއާ ގުޅޭ ކޮރަޕްޝަންގެ ގިނަ މައްސަލަތަކެއް ވަނީ ފެންމަތިވެފައެވެ.