ޒުވާން މިޑްފީލްޑަރު އަޙްމަދު އައިހަމް، ރާއްޖޭގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަނާ ގުޅިއްޖެއެވެ.
ކުރިއަށް އޮތް އޭއެފްސީ ޗެލެންޖް ލީގަށް މާޒިޔާއިން ސްކޮޑު ވަރުގަދަ ކުރަމުން އަންނައިރު، އައިހަމް އަކީ އެ ޓީމާ އަލަށް ގުޅުނު ފުރަތަމަ ކުޅުންތެރިޔާއެވެ. ސުޕަ ޔުނައިޓެޑް ސްޕޯޓްސް (ސަސް) ދޫކޮށް އައިހަމް މާޒިޔާއާ ގުޅުނުއިރު، އޭނާ ވަނީ ސަސްގެ ފުރަތަމަ އެގާރައިގައި ހިމެނިގެން މިދިޔަ ސީޒަނުގައި މޮޅު ކުޅުމެއް ދައްކާފައެވެ. އެއާއެކު ގައުމީ ފުޓްބޯޅަ ޓީމުންވެސް އައިހަމް ވަނީ ޖާގަ ހޯދާފައެވެ.
ޗެލެންޖް ލީގަށް މާޒިޔާއިން ތައްޔާރުވަމުން އަންނައިރު، އެ ޓީމުން ދާދި ފަހުން ވަނީ އައު ކޯޗުގެ މަގާމަށް ސާބިއާއަށް ނިސްބަތްވާ ޑްރަގަން ޑުކަނޯވިޗް ހަަމަޖައްސާފައެވެ. ޔުއެފާ ޕްރޯ ލައިސަންސް ހާސިލުކޮށްފައިވާ އުމުރުން 54 އަހަރުގެ ޑްރަގަންގެ އެންމެ ބޮޑު މަސްއޫލިއްޔަތަކަށް ވާނީ ޗެލެންޖް ލީގަށް ޓީމު ތައްޔާރުކުރުމެވެ. އަންނަ އޮކްޓޯބަރު މަހު ފަހުކޮޅު މުބާރާތް ބާއްވާއިރު، މިއީ މާޒިޔާއަށް ހަމަޖެއްސި ބިދޭސީ ހަވަނަ ކޯޗެވެ.
ޗެލެންޖް ލީގުގައި ރާއްޖޭގެ ޗެމްޕިއަން މާޒިޔާ އާއި އެއް ގްރޫޕެއްގައި ހިމެނެނީ ކުވެއިތުގެ އަލް އަރަބީ ސްޕޯޓްސް ކުލަބާއި، ތުރުކުމެނިސްތާންގެ އެފްސީ އަކްރަޑަގް އަދި ކިރްގިސްތާން އެފްސީ އަބްދީޝް އާޓާއެވެ. ސެންޓްރަލައިޒްކޮށް މި މުބާރާތް ބޭއްވުމަށް ހަމަޖެހިފައިވަނީ ކުވެއިތުގައެވެ.