ބެޑްމިންޓަން އެސޯސިއޭޝަން އޮފް މޯލްޑިވްސް (ބީއޭއެމް) ގެ ހިންގުން ކުޅިވަރާ ބެހޭ ގައުމީ މަޖިލީހަށް ހަވާލުކުރަން ކޮމިޝަނަރ އޮފް ސްޕޯޓްސްއިން ނިންމި ނިންމުމާ ގުޅިގެން ރާއްޖެއަށް ފިޔަވަޅު އަޅަން ޖެހިދާނެކަމުގެ އިންޒާރު ދުނިޔޭގެ ބެޑްމިންޓަން ފެޑެރޭޝަން (ބީޑަބްލިއުއެފް) އިން ދީފައި ވަނިކޮށް، އެ ނިންމުމާ ދެކޮޅަށް ބީއޭއެމް އިން ސިވިލް ކޯޓަށް މައްސަލަ ހުށަހަޅައިފިއެވެ.
މި މަހުގެ މެދުތެރޭގައި ކޮމިޝަނަރ އޮފް ސްޕޯޓްސް މުޙައްމަދު ޠަލާލް، އެކްސްގައި ކުރެއްވި ޕޯސްޓެއްގައި ވިދާޅުވީ ބެޑްމިންޓަން އެސޯސިއޭޝަންގެ ހިންގުން ވަގުތީ ގޮތުން އެ އެސޯސިއޭޝަންގެ މުއައްސިސް (ކުޅިވަރާ ބެހޭ ގައުމީ މަޖިލިސް) އާ ހަވާލު ކުރުމަށް ނިންމައި، އެކަން އެ އެސޯސިއޭޝަނަށް އަންގާފައިވާ ކަމަށެވެ. އަދި އެސޯސިއޭޝަންގެ އައު ހިންގާ ކޮމިޓީ އިންތިޚާބު ކުރުމަށްޓަކައި ކުރަންޖެހޭ މަސައްކަތްތައް ކުޅިވަރާ ބެހޭ ގައުމީ މަޖިލީހުގެ މަޝްވަރާއާއެކު ފަށާފައިވާ ކަމަށްވެސް ވިދާޅުވިއެވެ.
އެކަމަކު އެ ނިންމުން ބަލައިނުގަންނާނެ ކަމަށާއި، އެގޮތުގައި ކުރިއަށްދާނަމަ ރާއްޖެއަށް ފިޔަވަޅު އަޅަން ޖެހިދާނެކަމުގެ އިންޒާރު ބީޑަބްލިއުއެފް އިން ދީފައިވަނީ މޯލްޑިވްސް އޮލިމްޕިކް ކޮމިޓީ (އެމްއޯސީ) އަށް ފޮނުވި ސިޓީއެއްގައެވެ. އެ ސިޓީގައި ބުނެފައިވާ ގޮތުގައި، ބީއޭއެމްގެ ހިންގުން ކުޅިވަރާ ބެހޭ ގައުމީ މަޖިލީހާ ހަވާލުކުރީ، މި އަހަރު ފަހުކޮޅު އެ އެސޯސިއޭޝަންގެ އިންތިޚާބު ބޭއްވުމަށް މަގުފަހި ކުރުމަށް ތިން މެންބަރުންގެ އެޑްހޮކް ކޮމިޓީއެއް އެކުލަވާލުމަށް މަޝްވަރާ ކުރަމުންދަނިކޮށެވެ. އަދި އެ އެސޯސިއޭޝަންގެ އިންތިޚާބު ބާއްވައި ނިމެންދެން ބީއޭއެމްގެ ހިންގުމުގައި ދެމިތިބޭނީ އެންމެ ފަހުން އިންތިޚާބުވި ހިންގާ ކޮމިޓީ ކަމަށް އެމްއޯސީ އާއި، ބީޑަބްލިއުއެފް އަދި ބީއޭއެމްގެ ހިންގާ ކޮމިޓީއާއެކު ކުރިއަށްދާ މަޝްވަރާތަކުގައި އެއްބަސްވެފައިވާކަންވެސް ވަނީ ފާހަގަކޮށްފައެވެ.
ބެޑްމިންޓަން އެސޯސިއޭޝަނުގެ ހިންގުމާ ގުޅޭ ގޮތުން ސްޕޯޓްސް ކޮމިޝަނަރުގެ ނިންމުމަކީ އެކަމުގެ ތެރެއަށް ސަރުކާރު ވަދެ ނުފޫޒު ފޯރުވުން ކަމަށާއި، އަދި އެކަމަކީ އޮލިމްޕިކް ޗާޓަރާއި ބީޑަބްލިއުއެފްގެ އުސޫލުތަކާ ޚިލާފު ކަމެއް ކަމަށްވެސް އެ ސިޓީގައި ބުނެފައިވެއެވެ. އަދި ބީއޭއެމްގެ ހިންގުން ކުޅިވަރާ ބެހޭ ގައުމީ މަޖިލީހާ ހަވާލުކޮށްފައިވާ ނިންމުން ބަދަލުނުކޮށް ކުރިއަށްދާން ނިންމައިފިނަމަ، ބީއޭއެމަށް އެކަމުގެ ނޭދެވޭ އަސަރު ފޯރާނެ ކަމަށް ބެލެވޭތީ ރާއްޖެއަށް ފިޔަވަޅު އަޅަން ބީޑަބްލިއުއެފްގެ ކައުންސިލަށް ހުށަހަޅަން ޖެހިދާނެ ކަމަށްވެސް ވަނީ ބުނެފައެވެ.
ސްޕޯޓްސް ކޮމިޝަނަރުގެ ނިންމުމާ ގުޅިގެން ބީޑަބްލިއުއެފް އިން ރާއްޖެއަށް އިންޒާރުދީފައިވާއިރު، އެ ނިންމުމާ ދެކޮޅަށް ބީއޭއެމް އިން ވަނީ ސިވިލް ކޯޓަށް މައްސަލަ ހުށަހަޅާފައެވެ. އަދި އެ މައްސަލައިގެ އަޑުއެހުމެއް އަންނަ އާދިއްތަ ދުވަހުގެ މެންދުރު ފަހަށް ތާވަލުކޮށްފައިވާއިރު، އެއީ ބީއޭއެމް އިން ކުޅިވަރާ ބެހޭ ވުޒާރާއާ ދެކޮޅަށް ހުށަހަޅާފައިވާ މައްސަލައިގެ، ޖުޑީޝަލް ރިވިއުގެ ދައުވާގެ އަޑުއެހުމެކެވެ.
ބީއޭއެމްގެ ހިންގާ ކޮމިޓީގެ މުއްދަތު ހަމަވެފައި އޮންނަތާ ފަސް މަހަށް ވުރެ ގިނަ ދުވަސް ވެފައިވާއިރު، އެ އެސޯސިއޭޝަނުން އެންމެ ފަހުން ހިންގާ ކޮމިޓީ އިންތިހާޚާބުކޮށްފައިވަނީ 2021 ވަަނަ އަހަރުގެ ފެބްރުއަރީ މަހެވެ. މިދިޔަ ޖުލައި މަހުގެ މެދު ތެރޭގައި ބީއޭއެމްގެ ރައީސްގެ މަގާމުން މޫސާ ނާޝިދު (މޫސަ) ވަނީ އިސްތިއުފާ ދެއްވާފައެވެ. ނަމަވެސް އެ އެސޯސިއޭޝަނުގެ ރައީސްކަން މިދިޔަ ތިން ދައުރުގައި ކުރެއްވި މޫސަ އިސްތިއުފާދެއްވާފައިވަނީ މަގާމުގެ މުއްދަތު ހަމަވިތާ ހަތަރު މަސް ފަހުންނެވެ.
މީގެ އިތުރުން މިދިޔަ ފަސް ވަރަކަށް މަސް ދުވަހުގެ ތެރޭގައި ބީއޭއެމްއާ ގުޅޭ ކޮރަޕްޝަންގެ ގިނަ މައްސަލަތަކެއް ފެންމަތިވެފައިވާއިރު، ފުލުހުންނާއި އެންޓި ކޮރަޕްޝަން ކޮމިޝަން (އޭސީސީ) ގެ ޓީމަކުން ގުޅިގެން ވަނީ ބުރާސްފަތި ދުވަހު ބީއޭއެމްގެ އޮފީސް ބަލައި ފާސްކޮށްފައެވެ.