ޔުވެންޓަސްއަށް ކުޅެމުން އައި އިޓަލީ މިޑްފީލްޑަރު ފެޑެރީކޯ ކިއޭސާ، ދިގު މުއްދަތުގެ އެއްބަސްވުމެއްގެ ދަށުން ލިވަޕޫލަށް ސޮއިކޮށްފިއެވެ.
އުމުރުން 26 އަހަރުގެ ކިއޭސާގެ ސޮއި ހޯދުމަށް ލިވަޕޫލުން އެންމެ ފުރަތަމަ 12 މިލިއަން ޔޫރޯ ދިނުމަށްފަހު، ބޯނަހުގެ ގޮތުގައި އިތުރު 3 މިލިއަން ޔޫރޯ ޔުވެންޓަސް އަށް ދޭން އެއްބަސްވެފައިވާ ކަމަށް އެ ކްލަބުން ވަނީ ކަށަވަރުކޮށްދީފައެވެ.
"ލިވަޕޫލްގެ ކުޅުންތެރިއަކަށް ވެވުމުން ވަރަށް ބޮޑަށް އުފާވޭ،" ކިއޭސާގެ ބަޔާނުގައިވެއެވެ.
ކިއޭސާ ބުނީ، ލިވަޕޫލްގެ ސްޕޯޓިންގ ޑައިރެކްޓަރު ގުޅާފައި އެ ކްލަބާ ގުޅޭނެތޯ ކުރި ސުވާލުގެ އިތުރުން އެ ޓީމުގެ ކޯޗު އެހުމުން ވެސް ޖަވާބަކަށް ވަގުތުން އާނ ބަސް ބުނެފައިވާ ކަމަށެވެ.
އެގޮތުން، ކިއޭސާ ވަނީ، ލިވަޕޫލަށް ބަދަލުވުމާ މެދު ދެވަނަ ވިސްނުމަކަށް ދާން ނުޖެހުނީ އެ ކްލަބުގެ ތާރީޚު ވަރަށް ރަނގަޅަށް އެނގި، ސަޕޯޓަރުންވެސް އެނގޭތީ ކަމަށް ބުނެފައެވެ.
މީގެ ހަތަރުވަރަކަށް އަހަރު ކުރީން، ފިއޮރެންޓީނާ އިން ލޯން އެއްބަސްވުމެއްގެ ދަށުން ޔުވެންޓަސް އަށް ބަދަލުވި ކިއޭސާގެ ކޮންޓްރެކްޓް ވަނީ ފަހުން ދާއިމީކޮށްފައެވެ. އެ ކްލަބަށް އޭނާ ކުޅެދިން 131 މެޗުގައި ވަނީ 32 ލަނޑުޖަހައިފައެވެ.
ޔުވެންޓަސް އާއެކު ހޭދަކުރީ މުއްދަތުގައި 2022 ވަނަ އަހަރު ކިއޭސާގެ ކަކުލަށް ލިބުނު އަނިޔާއެއްގެ ސަބަބުން ވަނީ 10 މަހަށް ކުޅުމާ ދުރުގައި ހުންނަންޖެހިފައެވެ. އެކަމަކު، އަނިޔާއަށްފަހު އެނބުރިއައިސް އޭނާ ވަނީ ހުރިހާ މުބާރާތެއްގައި އެ ޓީމަށް 37 މެޗު ކުޅެ، 10 ލަނޑުޖަހައި އިތުރު ތިން ގޯލްޖެހުމަށް އެހީތެރިވެދީފައެވެ.
މިހާތަނަށް ގައުމީ ޓީމަށް ކުޅުނު 51 މެޗުގައި ހަތް ލަނޑުޖަހައިފައިވާ ކިއޭސާ ވަނީ، 2020 ވަނަ އަހަރުގެ ޔޫރަޕިއަން ޗެމްޕިއަންޝިޕް ކާމިޔާބުކުރި އިޓަލީ ޓީމުގެ އިތުރުން މި އަހަރު ޖަރުމަނުގައި ކުރިއަށްދިޔަ ޔޫރޯ ފުޓްބޯޅަ މުބާރާތުގައި ވާދަކުރި ޓީމަށް ވެސް ކުޅެފައެވެ.