ނިއުކާސަލް ޔުނައިޓެޑަށް ކުޅެމުން އަންނަ އިނގިރޭސި ފުލްބެކް ކިއެރަން ޓްރިޕިއާ، ގައުމީ ޓީމަށް ކުޅުން ހުއްޓާލައިފިއެވެ.
އުމުރުން 33 އަހަރުގެ ޓްރިޕިއާއަށް މި ފަހަރުގެ ސީޒަނުގައި ނިއުކާސަލްގެ ފުރަތަމަ އެގާރައިން ޖާގަ ހޯދުމުގައި އުނދަގޫތައް ކުރިމަތިވެފައިވާއިރު، އައު ކޯޗު، ލީ ކާސްލީ އެންމެ ފަހުން އެކުލަވާލި އިނގިރޭސި ސްކޮޑުން ވެސް އޭނާ އަށް ޖާގަ ނުލިބުނެވެ.
2017 ވަނަ އަހަރުން ފެށިގެން މިހާތަނަށް އިނގިރޭސި ގައުމީ ޓީމަށް 54 މެޗު ކުޅެދީފައިވާ ޓްރިޕިއާ ވަނީ އެންމެ ފަހުން ކުޅެވުނު ޔޫރޯ ފުޓްބޯޅަ މުބާރާތުގެ ރަނަރަޕް މަގާމު ހާސިލްކުރި ޓީމަށް ހަތް މެޗުގެ ތެރެއިން ހަ މެޗުގައި ކުޅެފައެވެ. އޭނާ ވަނީ އެންމެ ފަހުން ކުޅެވުނު ފީފާ ވޯލްޑް ކަޕްގެ ދެ މުބާރާތުގެ އިތުރުން ޔޫރޯގެ އެއްމުބާރާތުގައި ކުޅެފައެވެ.
އިންސްޓަގްރާމްގައި ޓްރިޕިއާ ކުރި ޕޯސްޓެއްގައިވަނީ، ބަރީ އަށް ނިސްބަތްވާ ޒުވާން ކުއްޖެއްގެ ގޮތުގައި ދުވަހަކުވެސް އިނގިރޭސި ގައުމީ ޓީމަށް ކުޅެވިދާނެކަމަށް ހީ ނުކުރާ ކަމަށެވެ. އަދި ގައުމީ ޖާޒީގައި 54 މެޗު ކުޅެވިދާނެ ކަމަށް ވެސް އޭރު ގަބޫލުނުކުރާ ކަމަށެވެ.
އެގޮތުން، ބޮޑު ހަތަރު މުބާރާތުގައި އިނގިރޭސި ގައުމީ ޓީމު ތަމްޞީލްކުރުމުގެ ފުރުޞަތު ލިބިގެންދިއުމަކީ މިހާތަނަށް ހަޔާތުގައި ލިބުނު އެންމެ ބޮޑު އެއް ޝަރަފު ކަމަށް ވެސް ޓްރިޕިއާ ބުނެފައިވެއެވެ.
ބޮޑެތި މުބާރާތްތަކުގައި އިނގިރޭސި ޓީމާއެކު ޓްރިޕިއާގެ އެންމެ ފާހަގަކޮށްލެވޭ އުސްއަލިތަކަށް ބަލާއިރު، 2018 ވަނަ އަހަރުގެ ވޯލްޑް ކަޕްގެ ސެމީ ފައިނަލްގައި ކްރޮއޭޝިއާ އަތުން 2-1 އިން އިނގިރޭސީން ބަލިވިއިރު އެ ޓީމުގެ ހަމައެކަނި ލަނޑުޖަހައިދިނީ އޭނާ އެވެ.
ޓްރިޕިއާ ރިޓަޔާކުރުމުން ފީފާ އިން ނެރުނު ބަޔާނުގައިވަނީ، ވަރަށް ފުރިހަމައަށް ނިންމާލީ ބައިނަލްއަގުވާމީ ފުޓްބޯޅައިގެ ކެރިއަރަށް މަރުހަބާ ކިޔާ ކަމަށެވެ.
"54 މެޗާއެކު، ވަރަށް ހާއްސަ އެއް ގޯލް ކާމިޔާބުކޮށް، ބަޔާން ކުރަން ނޭނގޭފަދަ ހަނދާންތަކަށް ވަރަށް ބޮޑަށް ޝުކުރު އަދާކުރަން." އިނގިރޭސި ގައުމީ ޓީމުގެ ބަޔާނުގައިވެއެވެ.
ޓްރިޕިއާ ކުޅެމުން އަންނަ ނިއުކާސަލުން ބުނީ، އޭނާ ގައުމު ފަޚުރުވެރިކޮށްދީފައިވާ ކަމަށެވެ.
މިހާރުގެ ކޯޗު، ކާސްލީ އާއެކު އިނގިރޭސީން ކުޅޭ ފުރަތަމަ މެޗުގައި ނޭޝަންސް ލީގުގައި އަންނަ މަހުގެ 7 ވަނަ ދުވަހު ނިކުންނާނީ އަޔާލެންޑާ ދެކޮޅަށެވެ.