ޗެލްސީއަށް ކުޅެމުން އަންނަ ސްޕެއިނުގެ ގޯލްކީޕަރު ކެޕާ އަރިއްޒަބަލާގާ، ލޯނު އެއްބަސްވުމެއްގެ ދަށުން ބޯންމަަތަށް ބަދަލުވާން އެއްބަސްވެއްޖެއެވެ.
އުމުރުން 29 އަހަރުގެ ކެޕާ، ޗެލްސީ އާއެކު ހަދާފައިވާ އެއްބަސްވުން ހަމަވާން ބާކީ އަހަރަކަށްވެފައިވަނިކޮށް ކޮންޓްރެކްޓް ވަނީ 2026 ގެ ނިޔަލަށް އިތުރުކޮށްފައެވެ. މިއީ ކުރިއަށް އޮތް ސީޒަނަށް ލޯން އުސޫލުން ބޯންމައުތަށް ދޫކޮށްލުމުގެ ގޮތުން ޗެލްސީން ކުރި ކަމެކެވެ.
މީގެ ހަ އަހަރު ކުރީން، އެތުލެޓިކް ބިލްބާއޯ އިން ދުނިޔޭގެ އެންމެ އަގުބޮޑު ގޯލްކީޕަރުގެ ގޮތުގައި ކެޕާ، ޗެލްސީ އަށް ބަދަލުވީ ގާތްގަނޑަކަށް 71 މިލިއަން ޕައުންޑް (93.61 މިލިއަން އެމެރިކާ ޑޮލަރު) ގެ ޓްރާންސްފާ ފީ އަކަށެވެ. މިހާތަނަށްއައިއިރު އެ ޓީމާއެކު 2019 ވަނަ އަހަރުގެ ޔުއެފާ ޔުރޮޕާ ލީގާއި، އޭގެ ދެ އަހަރު ފަހުން ޔުއެފާ ޗެމްޕިއަންސް ލީގު އަދި، 2022 ގައި ފީފާ ކްލަބް ވޯލްޑްކަޕް ކާމިޔާބުކުރިއެވެ.
ނިމިދިޔަ ސީޒަނުގައި ލޯން އެއްބަސްވުމެއްގެ ދަށުން ކެޕާ ކުޅުނީ ސްޕެއިނުގެ ރެއާލް މެޑްރިޑަށެވެ. އެ ފަހަރުގެ ސީޒަނުގައި އަނިޔާގެ ސަބަބުން ތިބައުޓް ކޯޓުއާގެ ބަދަލުގައި ރެއާލަށް މުހިއްމު މެޗުތަކެއް ކުޅެފައިވެއެވެ. އެގޮތުން، އޭނާ ވަނީ މުޅި ސީޒަނުގައި 20 މެޗު ކުޅެފައެވެ. ސީޒަން ނިންމާލީ ރެއާލް އާއެކު ސްޕެނިޝް ލީގާއި، ޗެމްޕިއަންސް ލީގު ކާމިޔާބުކޮށްގެންނެވެ.
ކެޕާ، އެންމެ ފަހުން ގައުމީ ޓީމަށް ކުޅުނީ 2019 ވަނަ އަހަރު ކުޅެވުނު ޔޫރޯ ކޮލިފައިންގ މެޗުތަކުގައެވެ. 2017 ގައި ކުޅެން ފެށި ފަހުން މިހާތަނަށްއައިއިރު އޭނާ ވަނީ ސްޕެއިނަށް 13 މެޗު ހަމަކޮށްފައެވެ.